Ingxoxo Yokuphetha Lalabo Abafuna Ukubhabhathizwa

Abantu bajayele ukubhabhathizwa emihlanganweni yeziqinti leyezabelo yaboFakazi bakaJehova. Umzalwane owenza inkulumo yokubhabhathizwa uphetha ngokucela labo abazobhabhathizwa ukuthi basukume baphendule imibuzo emibili elandelayo ngelizwi elizwakalayo:

1. Usuphendukile yini ezonweni zakho, wazinikela kuJehova njalo uyakwamukela yini ukuthi uNkulunkulu usebenzisa uJesu Khristu ukuze asindise abantu?

2. Uyakuzwisisa yini ukuthi ukubhabhathizwa kwakho kutshengisa ukuthi usunguFakazi kaJehova lokuthi usulilunga lenhlanganiso yakhe?

Nxa bangaphendula imibuzo le ngoyebo ozwakalayo bayabe ‘bevuma ebantwini’ ukuthi sebelokholo enhlawulweni kaJesu lokuthi sebezinikele kuJehova. (Rom. 10:9, 10) Labo abafuna ukubhabhathizwa kumele baqale bakhuleke futhi bacabangisise ngemibuzo le kuseselesikhathi ukuze benelise ukuyiphendula ngenhliziyo yonke.

Usuzinikele yini kuJehova ngokukhuleka kuye umthembisa ukuthi uzakhonza yena yedwa lokuthi uzaqakathekisa ukwenza intando yakhe ukwedlula loba yini empilweni yakho?

Uleqiniso yini ukuthi usukulungele ukubhabhathizwa?

Ngezinjani izigqoko okumele umuntu azigqoke nxa ebhabhathizwa? (1 Tim. 2:9, 10; Joh. 15:19; Flp. 1:10)

Kumele sigqoke ngendlela ‘elesithunzi letshengisa ukuthi sizisebenzisa kuhle izingqondo zethu’ ukuze kukhanye ukuthi ‘sizinikele kuNkulunkulu.’ Yikho ababhabhathizwayo akumelanga bagqoke izigqoko ezikhanyiselayo, ezibhaliweyo kumbe ezilama-slogan.

Kufanele bagqoke izigqoko ezifaneleyo, ezihlanzekileyo futhi ezilesithunzi. Kumele uziphathe njani nxa ubhabhathizwa? (Luk. 3:21, 22)

AmaKhristu kumele alandele indlela uJesu enza ngayo ngesikhathi ebhabhathizwa. Wayekwazi ukuthi ukubhabhathizwa yinto eqakatheke kakhulu futhi lokhu wakutshengisa ngendlela enza ngayo. Yikho nxa ubhabhathizwa, ungenzi loba yini ezakwenza kukhanye angani awusiqakathekisi isenzakalo leso njengokudlala kumbe ukubhukutsha. Kanti njalo akumelanga wenze njengomuntu osenqobe emncintiswaneni othile. Lanxa ilanga lokubhabhathizwa liqakatheke kakhulu kuwe, kumele uthabe ngendlela etshengisa inhlonipho.

Ukungena imihlangano lokuhlanganyela kuyo kuzakunceda njani ukuthi uhlale uzinikele kuJehova?

Kungani kuqakathekile ukuthi uqhubeke ulohlelo lokubala iBhayibhili uwedwa lokuthi ukhuthale ekutshumayeleni lanxa usubhabhathiziwe?

OKUMELE KULANDELWE NGABADALA

Nxa ummemezeli ongakabhabhathizwa angalitshela ukuthi sefuna ukubhabhathizwa, kumele limkhuthaze ukuthi ahlolisise “Imibuzo Yalabo Abafuna Ukubhabhathizwa” etholakala ekhasini 185-207. Kufanele abale lesihloko esithi, “Umlayezo Oya Kummemezeli Ongakabhabhathizwa” esisekhasini 182 esizamnceda abone ukuthi angalungiselela njani imibuzo yokubhabhathizwa. Isihloko lesi sizamsiza abone lokuthi nxa esexoxa labadala uyavunyelwa ukusebenzisa ibhuku leli kanye lemicijo ayibhale ngesikhathi elungiselela. Kodwa akulasidingo sokuthi aqale alungiselele lomunye umuntu engakaxoxi labadala.

Umuntu ofuna ukubhabhathizwa kumele atshele umhleli wequla labadala. Nxa esebalile “Imibuzo Yalabo Abafuna Ukubhabhathizwa,” umhleli wequla labadala uzambuza ukuthi usezinikele yini kuJehova ngokukhuleka kuye emthembisa ukuthi usezakwenza intando yakhe. Nxa ummemezeli esekwenzile lokhu, umhleli wequla labadala uzahlela ukuthi abadala ababili baxoxe laye ngemibuzo esesihlokweni esithi, “Imibuzo Yalabo Abafuna Ukubhabhathizwa.” Imibuzo le ilezingxenye ezimbili okumele zenziwe ngabadala abatshiyeneyo. Asikho isidingo sokuthi liqale likwazi ukuthi umhlangano wesiqinti loba owesabelo olandelayo uzabakhona nini ukuze liqalise ukuxoxa lommemezeli ngemibuzo le.

Ingxenye ngayinye kumele ithathe isikhathi esingaba lihora elilodwa kumbe esedlula lapho kusiya ngezimo futhi kufanele iqale njalo iphethe ngomthandazo. Ingxoxo le akumelanga yenziwe abantu bejahile. Abadala kufanele babe leqiniso lokuthi bakwenza masinyane lokhu nxa bangacelwa ukuthi bakwenze.

Kuhle ukuthi umuntu ngamunye ofuna ukubhabhathizwa abuzwe eyedwa, hatshi beliqembu. Indlela azaphendula ngayo umbuzo ngamunye izakwenza abadala benelise ukubona ukuthi uzwisisa kangakanani. Akumelanga basale bethandabuza ukuthi ufanele yini ukubhabhathizwa loba hatshi. Kanti njalo nxa eyedwa kuba lula ukuthi akhululeke ukuveza imibono yakhe. Indoda lomkayo abafuna ukubhabhathizwa bangabuzwa imibuzo le bendawonye.

Nxa ofuna ukubhabhathizwa engudade, kumele kuxoxwe laye endaweni esegcekeni. Loba kunjalo kumele kunanzelelwe ukuthi akulamuntu oyizwayo ingxoxo leyo. Nxa umdala obuza ingxenye ethile efuna ukuhamba lomunye umuntu, kufanele kube ngomunye umdala kumbe inceku ekhonzayo kusiya ngokuthi yiphi ingxenye okuzaxoxwa ngayo.

Emabandleni alabadala abalutshwane, inceku ezikhonzayo ezifaneleyo futhi ezitshengisa ukuthi zilokuqedisisa lokwahlulela okuhle zingacelwa ukuthi zibuze labo abafuna ukubhabhathizwa imibuzo etholakala kungxenye 1 ethi, “Esikukholwayo.” Kodwa ingxenye 2 ethi, “Indlela Okumele AmaKhristu Aphile Ngayo” kumele yenziwe ngabadala kuphela. Nxa kungelabadala abeneleyo ebandleni, lingakhuluma lombonisi wesiqinti ukuze acele abadala kwelinye ibandla eliseduzane ukuthi balincedise.

Nxa lowo obuzwa imibuzo yokubhabhathizwa engumntwana omncane, kumele abazali bakhe abangoFakazi (kumbe oyedwa wabo) babekhona. Nxa bengenelisi ukubakhona, kufanele kube labadala ababili engxenyeni ngayinye (kumbe umdala lenceku ekhonzayo kusiya ngokuthi yiphi ingxenye ehlolwayo).

Abadala kufanele babe leqiniso lokuthi lowo ofuna ukubhabhathizwa uselolwazi olweneleyo ngemfundiso eziyisisekelo eziseBhayibhilini. Kufanele babone ukuthi uyaliqakathekisa yini iqiniso aselifundile kanye lokuthi usezimisele yini ukulandela indlela uJehova ahlele ngayo inhlanganiso yakhe. Nxa abadala bangananzelela ukuthi kakabi lolwazi olweneleyo ngemfundiso eziyisisekelo eziseBhayibhilini, bazahlela ukuthi aqhubeke efunda ukuze afanele ukubhabhathizwa ngesinye isikhathi. Abanye kubathatha isikhathi sibili ukuze batshengise ukuthi bayazwisisa ukuqakatheka kokutshumayela lokulandela okutshiwo yinhlanganiso. Ngesikhathi bexoxa lalowo ofuna ukubhabhathizwa, abadala kumele benelise ukubona ukuthi uyafanela yini ukubhabhathizwa loba hatshi. Yonke imibuzo kumele ibuzwe lanxa eminye yakhona kuzaxoxwa ngayo okwesikhathi eside.

Ngemva kwalokho abadala ababuze imibuzo bayahlangana ukuze baxoxisane ngokuthi lowomuntu usefanele yini ukubhabhathizwa loba hatshi. Kodwa ekuxoxeni kwabo kumele bakhumbule ukuthi abantu bayatshiyana. Okuqakathekileyo yikuthi lowomuntu uyamthanda yini uJehova lokuthi uyalizwisisa yini iqiniso eliyisisekelo eliseBhayibhilini. Nxa bangenza njalo, bazanceda labo abafuna ukubhabhathizwa ukuthi bakulungele ukuba ngabatshumayeli bezindaba ezinhle.

Bobabili abadala ababuze imibuzo yokubhabhathizwa kumbe oyedwa wabo kufanele bahlangane lalowo ofuna ukubhabhathizwa ukuze bamtshele ukuthi uyafanela yini. Nxa efanele, abadala kumele baxoxe laye ngemicijo esesihlokweni esithi, “Ingxoxo Yokuphetha Lalabo Abafuna Ukubhabhathizwa” esitholakala ekhasini 206-207. Nxa ofuna ukubhabhathizwa engakaqedi ukufunda ibhuku elithi Ungathokoza Kuze Kube Nini Lanini! abadala kumele bamkhuthaze ukuthi aqhubeke efunda lanxa esebhabhathiziwe. Kumele bamtshele ukuthi ilanga azabhabhathizwa ngalo lizabhalwa ekhadini lakhe eligcinwa ebandleni (S-21). Kufanele bamkhumbuze ukuthi okwenza abadala babhale phansi okumayelana lommemezeli ngamunye yikuthi ukwenza njalo kunceda inhlanganiso ibone intuthuko eyenziwa ngoFakazi bakaJehova emhlabeni wonke lokuthi ingancedisa njani ngamunye wethu ekukhonzeni. Kanti njalo kumele bamkhumbuze lokuthi ulwazi abalalo ngaye luzasetshenziswa ngendlela evumelana le-Global Data Protection Policy of Jehovah’s Witnesses etholakala ku-jw.org. Ingxoxo le ingathatha imizuzu elitshumi kumbe engaphansi.

Ngemva komnyaka ummemezeli ebhabhathiziwe abadala kumele bamvakatshele ukuze bamkhuthaze njalo bamnike amacebo azamnceda ukuthi athuthuke ekukhonzeni. Omunye wabadala laba kufanele abe ngumbonisi weqembu ummemezeli akulo. Nxa ummemezeli engumntwana omncane, kumele abazali bakhe abangoFakazi (kumbe oyedwa wabo) babekhona. Ingxoxo le kumele ibe ngekhuthazayo futhi evuselelayo. Abadala kufanele bamncome ngokuthuthuka kwakhe ekukhonzeni njalo bamnike lamacebo angamnceda ukuthi aqhubeke etshumayela maviki wonke, etaditsha eyedwa, ebala iBhayibhili nsuku zonke, esiba lokukhonza kwemuli maviki wonke, engena imihlangano yebandla futhi ehlanganyela kuyo. (Efe. 5:15, 16) Nxa elokhu engakaqedi ukufunda ibhuku elithi Ungathokoza Kuze Kube Nini Lanini! abadala kumele bahlele ukuthi aqedise. Kumele bamncome ngokuhle akwenzayo besebemncedisa kokulutshwana okumele athuthuke kukho.