Isengezo

Umlayezo Oya Kubazali:

Akuthandabuzwa ukuthi ulesifiso sokuncedisa abantwabakho ukuthi bathande uJehova futhi bazinikele kuye. Kuyini ongakwenza ukuze ubancedise ukuthi babhabhathizwe? Kuyini okungatshengisa ukuthi sebekulungele ukubhabhathizwa?

UJesu watshela abalandeli bakhe wathi: “Hambani liyekwenza abantu bezizwe zonke babe ngabafundi, libabhabhathize.” (Mat. 28:19) Amazwi la atshengisa ukuthi umuntu ofuna ukubhabhathizwa kumele abe ngumfundi, okutsho ukuthi kufanele azwisise imfundiso zikaKhristu, azikholwe njalo aphile ngazo. Abasesebancane labo bangenelisa ukukwenza lokhu.

Kumele ube yisibonelo esihle kubantwabakho futhi ubafundise ngoJehova. (Dute. 6:6-9) Sebenzisa ibhuku elithi Ungathokoza Kuze Kube Nini Lanini! ukuze ubafundise iqiniso eliseBhayibhilini kanye lokuthi bangazisebenzisa njani izimiso ezikulo. Bancedise ukuthi benelise ukuchasisa abakukholwayo ngamazwi abo. (1 Phet. 3:15) Ukubakhuthaza kwakho kanye lemfundo abayithola ekukhonzeni kwemuli, emihlanganweni yebandla, kubangane abahle langesikhathi bezibalela amabhuku adindwe yinhlanganiso kuzabasiza ukuthi babhabhathizwe lokuthi baqhubeke bethuthuka ekukhonzeni. Hlala ubancedisa ukuthi bahlele abafuna ukukwenza ekukhonzeni.

UZaga 20:11 uthi: ‘Lomntwana waziwa ngezenzo zakhe, ukuthi isimilo sakhe sihle, siqotho.’ Kuyini okungenziwa ngumntwana okutshengisa ukuthi usengumfundi kaJesu Khristu lokuthi usekulungele ukubhabhathizwa?

Umntwana oselungele ukubhabhathizwa ukhanya ngokulalela abazali bakhe. (ImiSeb. 5:29; Kol. 3:20) IBhayibhili lithi ngesikhathi uJesu eleminyaka engu-12, “waqhubeka ezehlisa” kubazali bakhe. (Luk. 2:51) Lanxa umntanakho ezaphambanisa ngezinye izikhathi ngenxa yesono, kumele azame ukulingisela isibonelo sikaJesu futhi aziwe njengomuntu ozehlisayo ebazalini bakhe.

Kufanele atshengise lokuthi ulesifiso sokufunda iqiniso eliseBhayibhilini. (Luk. 2:46) Uyakukholisa yini ukungena imihlangano yebandla lokuphendula kuleyomihlangano? (Hubo. 122:1) Uyakuthanda yini ukubala lokutaditsha iBhayibhili eyedwa?—Mat. 4:4.

Umntwana oselungele ukubhabhathizwa ukhanya ngokuqakathekisa uMbuso ukwedlula ezinye izinto. (Mat. 6:33) Uyananzelela ukuthi ulomlandu wokutshela abanye lokho akukholwayo. Uzimisele ukutshumayela ngendlela ezitshiyeneyo njalo kalanhloni zokutshela ababalisi bakhe kanye lafunda labo ukuthi unguFakazi kaJehova. Kanti njalo uba leqiniso lokuthi uyalungiselela inkulumo azinikwa emhlanganweni Wempilo Lenkonzo YamaKhristu.

Uzimisele ukungazihlanganisi labangane abangalunganga ukuze bangamphambanisi ekuziphatheni. (Zaga. 13:20; 1 Khor. 15:33) Lokhu kuzakhanya ngendlela akhetha ngayo akubukelayo, izingoma azilalelayo, imidlalo yamavidiyo ayithandayo (video games) kanye lendlela asebenzisa ngayo i-inthanethi.

Banengi abantwana asebelamukele iqiniso bathuthuka baze babhabhathizwa besesebancane ngenxa yokukhuthazwa ngabazali babo. Kwangathi uJehova angakubusisa lawe njengoba uqhubeka uncedisa abantwabakho ukuthi babhabhathizwe ukuze baqinise ubungane babo laye.

Umlayezo Oya Kummemezeli Ongakabhabhathizwa:

Kuyisibusiso sibili ukuba ngummemezeli ebandleni, yikho siyakuncoma ngokuthuthuka kwakho ekukhonzeni. Ukufunda iBhayibhili sekukuncede ukuthi umazi ngcono uNkulunkulu lokuthi ukholwe izithembiso zakhe.—Joh. 17:3; Heb. 11:6.

Kungenzakala ukuthi ungakaqalisi ukufunda laboFakazi bakaJehova wawungena isonto ethile kumbe vele wawungayi esontweni. Mhlawumbe wawuphila ngendlela engavumelani lalokho okutshiwo liBhayibhili. Kodwa khathesi usutshengise ukuthi ulokholo ngokuphenduka, okutsho ukuzisola ngezinto ezimbi owawuzenza. Okunye okwenzileyo yikuguquka, okutsho ukutshiya izinto ezingafunwa nguNkulunkulu lokuzimisela ukwenza okuqondileyo phambi kwakhe.—ImiSeb. 3:19.

Kungenzakala lokuthi imibhalo engcwele wayazi “useselusane.” Lokhu kukuncede ukuthi ubalekele ukwenza izinto ezimbi lokuthi ungaweli esonweni. (2 Tim. 3:15) Usufunde ukungavumi ukuyengwa ngabanye ukuthi wenze izinto ezingafunwa nguJehova. Usutshengise ukuthi ulokholo ngokubambelela ekukhonzeni kweqiniso langokutshela abanye ngokholo lwakho. Usufunde lezindlela zokutshumayela ezitshiyeneyo njalo khathesi usukhethe ukuba ngummemezeli ongakabhabhathizwa.

Kungelani lokuthi wafunda ngoJehova usesemncane kumbe usukhulile, ungabe usucabanga ukuzinikela kuye lokubhabhathizwa. Ukuzinikela kuJehova kutsho ukukhuleka kuye umthembisa ukuthi usukhethe ukukhonza yena yedwa lokwenza intando yakhe kuze kube nini lanini. (Mat. 16:24) Ngemva kwalokho kumele ubhabhathizwe ukuze utshengise ukuthi usuzinikele kuNkulunkulu. (Mat. 28:19, 20) Ungenza njalo, uyabe usuyinceku kaJehova uNkulunkulu ayamukelayo. Lesi yisibusiso sibili.

Kodwa uzahlangana lobunzima njengoba iBhayibhili lisitsho. Khumbula ukuthi uJesu esanda kubhabhathizwa, ‘umoya wamkhokhela wamusa enkangala lapho afika khona walingwa nguDeveli.’ (Mat. 4:1) Yikho kulindele lawe ukuthi uzahlangana lobunzima ngemva kokubhabhathizwa kwakho. (Joh. 15:20) Ngokwesibonelo, ungaphikiswa yizihlobo. (Mat. 10:36) Ungahlekwa ngofunda labo, osebenza labo kumbe abangane owawulabo. Hlala ukhumbula amazwi kaJesu akuMakho 10:29, 30 athi: “Ngiqinisile ngithi kini, kakho otshiye indlu kumbe abafowabo kumbe odadewabo kumbe unina kumbe uyise kumbe abantwana kumbe amasimu ngenxa yami langenxa yezindaba ezinhle, ongasoze athole sekuphindwe ka-100 ngalesisikhathi—izindlu, abafowabo, odadewabo, onina, abantwana lamasimu kanye lokuhlukuluzwa, aphinde azuze lokuphila okungapheliyo kumumo wezinto ozayo.” Ngakho qhubeka usebenza nzima ukuze uhlale useduze loJehova njalo uphile ngezimiso zakhe.

Nxa usufuna ukubhabhathizwa, tshela umhleli wequla labadala ngesifiso sakho. Abadala bazaxoxa lawe besebenzisa imibuzo esesihlokweni esithi, “Imibuzo Yalabo Abafuna Ukubhabhathizwa” ukuze babone ukuthi usufanele yini ukubhabhathizwa. Kungaba kuhle ukuthi uyihlole imibuzo le ngesikhathi uzibalela wedwa.

Lapho ulungiselela imibuzo le, zinike isikhathi sokubala lokucabangisisa ngeMibhalo efakiweyo. Nxa kulemicijo oyithandileyo ungayibhala ebhukwini leli kumbe kweyinye indawo. Ngesikhathi usuxoxa labadala, uyavunyelwa ukulivula ibhuku lakho lokusebenzisa imicijo oyibhalileyo. Nxa kulemibuzo ongayizwisisiyo, ungacela umuntu okufundisa iBhayibhili kumbe abadala ukuthi bakuncedise.

Ngesikhathi uxoxa labadala ungacabangi ukuthi kumele unike izimpendulo ezinde kakhulu. Kungaba kuhle ukuthi uphendule ngamazwi akho lokuthi impendulo zakho zibe mfitshane. Kanti njalo kungaba kuhle ukuthi eminye imibuzo uyiphendule usebenzisa iMibhalo efakiweyo.

Abadala bangananzelela ukuthi awukabi lolwazi olweneleyo ngemfundiso eziyisisekelo eziseBhayibhilini, bazahlela ukuthi uqhubeke ufunda ukuze wenelise ukuchasisa kuhle lokho okutshiwo yiMibhalo ubusubhabhathizwa ngesinye isikhathi.

[Okumele kunanzelelwe ngabadala bebandla: Iziqondiso ezimayelana lengxoxo eyenziwa labafuna ukubhabhathizwa zitholakala ekhasini 208-212.]