Sebenzisa i-jw.org Nxa Utshumayela

IWebhusayithi yethu iyasinceda kakhulu ukuthi senelise ukusakaza izindaba ezinhle ‘emikhawulweni yomhlaba.’ (ImiSeb. 1:8) Abaninimuzi abanengi kabayazi i-jw.org kodwa bandise ukwazi ngayo nxa ummemezeli othile engabatshengisa yona.

Omunye umhambeli wadawuniloda ividiyo ethi Kungani Kumele Ulifunde iBhayibhili? kumakhalekhukhwini wakhe njalo uyayisebenzisa ngaso sonke isikhathi ithuba lingavela. Nxa esendlini ngendlu ujayele ukuthi: “Ngivakatshela abantu okwesikhatshana ukuze ngibancedise bathole izimpendulo zemibuzo emithathu eqakathekileyo: Kungani kulezinhlupho ezinengi kangaka? UNkulunkulu uzazilungisa njani? Njalo singenelisa njani ukulwisana lazo okwakhathesi? Ividiyo le emfitshane iyayiphendula imibuzo le.” Uhle ayidlale abesekhangela ukuthi umninimuzi uyayikholisa yini. Ividiyo le iyakhanga kakhulu okokuthi abantu bathi nhlo kuyo ize iphele. Ngemva kwalokho umhambeli lo utshela umninimuzi ukuthi: “Uzwile ukuthi ungafaka isicelo ku-jw.org sokuthi othile azofunda lawe iBhayibhili. Kodwa akulasidingo sokuthi wenze njalo ngoba ngingakutshengisa ukuthi sandise ukufunda njani labantu.” Nxa umninimuzi angavuma, umhambeli lo uyamtshengisa esebenzisa ibhukwana elithi Izindaba Ezinhle. Nxa umninimuzi engelasikhathi, umhambeli lo uhlela ukuzombona ngesinye isikhathi. Nxa angangena ekhefa ukuze aphumule okwesikhatshana, uyaxoxa lothile oyabe ehlezi eduze kwakhe abesemtshengisa ividiyo le. Wena uyayisebenzisa yini i-jw.org nxa utshumayela?