Ukufunda Labantu IBhayibhili Ngendlela Ephumelelayo
1. Yiwuphi umsebenzi oyisibusiso abamemezeli abaqhuba izifundo zeBhayibhili abalawo?
1 Kakho ongakhonza uNkulunkulu ngaphandle kokuthi uJehova amdonse. (Joh. 6:44) Lanxa kunjalo, ingqobe isalela kubamemezeli ukuthi bancede abafunda labo iBhayibhili basondele kuYise osezulwini. (Jak. 4:8) Lokhu kudinga ukuthi abamemezeli balungiselele. Ukuphongubala indima kanye lokubuza umbuzo kakumncedi ofundayo ukuthi azwisise iBhayibhili futhi athuthuke.
2. Ukufundisa ngendlela ephumelelayo kungabanceda njani esifunda labo?
2 Ukuze sifundise ngendlela ephumelelayo, kumele sincede esifunda labo ukuthi (1) bazwisise lokho okufundiswa liBhayibhili, (2) bakwamukele lokho okufundiswa liBhayibhili njalo (3) benze lokho okufundiswa liBhayibhili. (Joh. 3:16; 17:3; Jak. 2:26) Amanyathelo la ayamnceda umfundi ukuthi athuthukise ubuhlobo bakhe loJehova futhi azinikele kuye. Kodwa kuthatha isikhathi ukubancedisa esifunda labo ukuthi balandele amanyathelo la.
3. Kungani abamemezeli abaphumelelayo ekufundiseni bebuza imibuzo ebangela ukuthi umfundi aveze umbono wakhe?
3 Zama Ukuthola Lokho Umfundi Akucabangayo: Ukuze uthole ukuthi umfundi ucabangani lokuthi uyakwamukela yini akufundayo, kakumelanga wandise emlonyeni kodwa kumele umenze aveze indlela azizwa ngayo. (Jak. 1:19) Uyakuzwisisa yini ukuthi iBhayibhili lifundisani ngendaba elixoxa ngayo? Angayibeka yini indaba leyo ngamazwi akhe? Uzizwa njani ngalokho asekufundile? Ukubona kulengqondo yini lokho okufundiswa liBhayibhili? (1 Thes. 2:13) Kuyamcacela yini ukuthi akufundayo kumele kumenze antshintshe indlela aphila ngayo? (Kol. 3:10) Ukuze sithole izimpendulo zemibuzo le, kumele sibuze imibuzo ezakwenza umfundi aveze umbono wakhe besesimlalela.—Mat. 16:13-16.
4. Kuyini okumele sikwenze nxa umfundi engazwisisi udaba oluthile kumbe ekubona kunzima ukusebenzisa lokho akufunda eBhayibhilini?
4 Kunzima njalo kungathatha isikhathi eside ukuthi umuntu antshintshe indlela enza ngayo lacabanga ngayo. (2 Khor. 10:5) Kumele senzeni nxa esifunda laye engakwamukeli futhi engakusebenzisi lokho akufunda eBhayibhilini? Kumele sibekezele njalo silindele ukuthi iLizwi likaNkulunkulu lomoya ongcwele kuntshintshe inhliziyo yomfundi. (1 Khor. 3:6, 7; Heb. 4:12) Kulokuthi umbambe ngamandla umfundi, kungcono ukuthi lidlulele kolunye udaba nxa engazwisisi lokho elikufunda ngaleso sikhathi kumbe ekubona kunzima ukukusebenzisa ekuphileni kwakhe. Umfundi angathinteka kwamancane acine esentshintsha ukuphila kwakhe nxa singaba lesineke ngesikhathi simfundisa futhi simtshengise ukuthi siyamthanda.