Izibusiso Ezizatholwa Ngabantu Abanceda Abanye

Abantu abanengi emhlabeni kabalandawo zokuhlala futhi bayaswela okokudla. Ikanti abanye abalathemba ngekusasa. Esikwenzayo ukuze sincede abantu laba kwenza samukelwe nguNkulunkulu futhi sithole izibusiso.

OKUTSHIWO YIMIBHALO ENGCWELE

“Olomusa kubayanga upha uJehova, uzakumvuza ngalokho akwenzayo.”—IZAGA 19:17.

KUTSHONI UKUNCEDA ABASWELAYO?

UJesu walandisa umzekeliso wendoda eyahlaselwa yizigebenga zayitshiya sokusele udokoza. (ULukha 10:29-37) Kwazokuthi enye indoda eyayizihambela yama ukuze incede umuntu lo owayelinyazwe yizigebenga. Indoda le kayizange ibe lendaba lokuthi umuntu lo wayengumhlobo bani.

Indoda le elomusa yaqala ngokumncedisa ngalokho eyayikwenelisa, njalo yaphinda yamduduza ebuhlungwini ayephakathi kwabo.

Sifundani endabeni le? UJesu watshengisa ukuthi kumele sincedise abanye ngaloba yini esiyenelisayo. (IZaga 14:31) IMibhalo Engcwele isitshela ukuthi sekuseduze ukuthi uNkulunkulu aqede ubuyanga lokuhlupheka. Singazibuza ukuthi, ‘UNkulunkulu uzakwenza njani lokhu futhi nini? Esihlokweni esilandelayo sizabona ukuthi yiziphi izibusiso uMdali wakho olothando azakunika zona.