Okungakunceda Uhlaliseke Nxa Kulempi Loba Udlakela
UGary owake waba lisotsha uthi: “Ngingakafundi iBhayibhili ngangingakwazi ukuthi yindaba emhlabeni kugcwele ukuhlupheka, abantu abalolunya kanye labaphatha abanye kubi. Kodwa khathesi sengihlalisekile ngoba sengikwazi ukuthi uJehova uNkulunkulu uzakwenza ukuthi kube lokuthula emhlabeni.”
UGary kayisuye yedwa oncedwe liBhayibhili. Ake sixoxe ngabanye.
IBHAYIBHILI LITHI: “Wena Jehova umuhle futhi uzimisele ukuthethelela.”—IHubo 86:5.
UKWAZI LOKHU KUNCEDA NJANI? “Ivesi le yenza ngingathandabuzi ukuthi uJehova ulesihawu. Ngiyakwazi ukuthi uzimisele ukungithethelela kukho konke engakwenza kudala ngesikhathi ngisempini.”—UWilmar ohlala eColombia.
IBHAYIBHILI LITHI: “Sengidala amazulu amatsha lomhlaba omutsha, izinto zakuqala kazisoze ziphinde zikhunjulwe, njalo kazisoze zifike enhliziyweni.”—U-Isaya 65:17.
UKWAZI LOKHU KUNCEDA NJANI? “Izinto ezenzakala ngesikhathi ngisempini zilokhu ziwuhlukuluza umphefumulo wami futhi zingenza ngikhathazeke. Kodwa umbhalo lo ungikhumbuza ukuthi sekuseduze ukuthi uJehova ayicitshe yonke imicabango le engikhathazayo kanye lamaphupho amabi engiyake ngibe lawo. Ayisoze iphinde ifike engqondweni lasenhliziyweni yami. Kuyisibusiso sibili lokhu.”—UZafirah ohlala e-United States.
IBHAYIBHILI LITHI: “Ngensuku zayo olungileyo uzaphumelela. Kuzakuba lokuthula kuyo yonke indawo kuze kube phakade.”—IHubo 72:7.
UKWAZI LOKHU KUNCEDA NJANI? “Ngihlala ngicabanga ngamazwi la. Sekuseduze ukuthi izimpi lezinto ezimbi ezibangelwa yiyo ziphele. Siyabe singasakhathazeki ngokuvikeleka kwezihlobo labangane.”—U-Oleksandra ohlala e-Ukraine.
IBHAYIBHILI LITHI: ‘Abafileyo bakho bazaphila. Vukani limemeze ngentokozo lina abahlala ethulini!’—U-Isaya 26:19.
UKWAZI LOKHU KUNCEDA NJANI? “Phose zonke izihlobo zami zabulawa ngesikhathi abantu bomunye umhlobo bebulala amaTutsi. Kodwa ivesi le iyangiqinisekisa ukuthi ngizaphinda ngibabone. Ngikulindele ngabomvu ukuzwa amazwi abo amnandi ngesikhathi sebevusiwe.”—UMarie ohlala eRwanda.
IBHAYIBHILI LITHI: “Sekusele isikhathi esincane nje ukuthi ababi babe bengasekho . . . Kodwa abathobekileyo bazakudla ilifa lomhlaba. Bazathokoza kakhulu ngoba kuyabe sekulokuthula okukhulu.”—IHubo 37:10, 11.
UKWAZI LOKHU KUNCEDA NJANI? “Lanxa kungaselampi, basesekhona abantu abalolunya labaphatha abanye kubi. Amavesi la abenginceda kakhulu. UJehova ubona konke njalo uyasizwisisa isimo engikuso. Usithembisa ukuthi sekuseduze ukuthi konke ukuhlupheka kuphele futhi sikhohlwe ngakho.”—UDaler ohlala eTajikistan.
Abantu esikhulume ngabo kumagazini le ngoFakazi bakaJehova asebencedwe liBhayibhili ukuthi bathole ukuthula. Bakunqobile ukuzondana kwabantu ngemihlobo, ngombala, ngesizwe langezinye nje izizatho. (Kwabase-Efesu 4:31, 32) OFakazi bakaJehova kabangeni kwezombusazwe futhi bayaluzonda udlakela.—UJohane 18:36.
Kanti njalo oFakazi bakaJehova bayancedisana ngezikhathi ezinzima. (UJohane 13:35) Ngokwesibonelo u-Oleksandra esike sakhuluma ngaye kanye lodadewabo kwakumele babalekele kwelinye ilizwe ngenxa yempi. Uthi: “Sathi sichapha ibhoda sahle sabona oFakazi besilindele. Indlela abasinceda ngayo yenza kwaba lula ukuthi sijayele ukuphila elizweni labo siyiziphepheli.”
Siyakunxusa ukuthi uze emihlanganweni yaboFakazi bakaJehova ukuze uzofunda ngesithembiso sokuthi esikhathini esizayo kuzakuba lokuthula emhlabeni lokuthi ungenzani khathesi ukuze uhlalisane labanye ngokuthula. Hamba ku-jw.org ukuze uthole lapho abangenela khona imihlangano yabo kumbe ucele ukufunda labo iBhayibhili mahala usebenzisa ibhuku elithi Ungathokoza Kuze Kube Nini Lanini!