Izinto Ezibuhlungu Ezenzakala Nxa Kulempi
Nxa kungaba lempi kumbe udlakela kwenzakala izinto ezinengi ezibuhlungu ebantwini. Amasotsha labantu abake bahlaselwa yimpi bawazi kuhle umonakalo odalwa yimpi.
AMASOTSHA
“Ukuhlala ubona abantu belimala kabuhlungu kumbe besifa kwenza ungahlaliseki ngitsho.”—UGary ohlala eBritain.
“Ngadutshulwa eqolo lasebusweni njalo ngangibona abantu abanengi bebulawa, kuze kubulawe labantwana lasebegugile. Impi iyakwenza ungabi lozwelo futhi ube lenhliziyo elukhuni.”—UWilmar ohlala eColombia.
“Nxa umuntu angadutshulwa phambi kwakho, uyabe ulokhu ucabanga ngakho. Kuyabe kungani ulokhu umuzwa ehlaba umkhosi. Awumkhohlwa loba sekutheni.”—UZafirah ohlala e-United States.
ABANTU ABAHLASELWA YIMPI
“Ngangihlalele evalweni ngicabanga ukuthi ngingafa loba nini, kodwa engangikwesaba kakhulu yikufelwa ngabemuli kumbe ngabangane bami. Ngasengibona angathi ngizahlala ngihlulukelwe sibili.”—U-Oleksandra ohlala e-Ukraine.
“Kwakusesabisa ukulayinela ukudla kusukela ngo-2 ekuseni kuze kuyetshaya u-11 ntambama njalo wawuyabe usesaba ukuthi uzaqabuka usudutshuliwe.”—UDaler ohlala eTajikistan.
“Impi yangithathela abazali bami ngasala ngiyintandane. Ngangingasela muntu ongangiduduza kumbe onganginakekela.”—UMarie ohlala eRwanda.
Lanxa izinto ezenzakala ngesikhathi sempi zabazwisa ubuhlungu abantu laba, sebathola induduzo. Okuhle yikuthi khathesi sebeqiniseka ukuthi sekuseduze ukuthi impi lodlakela kuphele. INqabayokulinda le izasichasisela ukuthi kuzakwenzakala njani lokhu.