Impi Ese-Ukraine Isisiyabamba Iminyaka Emibili—IBhayibhili Lithembisani?

NgoLwesihlanu mhlaka 24 February 2023, impi ye-Ukraine iyabe isilomnyaka ogcweleyo selokhu yaqalisayo. Eminye imibiko itshengisa ukuthi amasotsha e-Ukraine laweRussia alimeleyo kumbe afileyo empini le angafika 300 000. Kanti njalo sekufe labanye abantu nje abangaba ngu-30 000. Kodwa kungenzakala ukuthi amanani la ayedlula lawa aqanjwe lapha.

Okudanisayo yikuthi akuthembisi ukuthi impi le izaphela masinyane.

• “Sekuphose kube ngumnyaka amasotsha eRussia ehlasele i-Ukraine futhi kukhanya kungathembisi ukuthi impi le ingaphela masinya. Kukhanya alikho ilizwe elizanqoba phakathi kwamazwe la futhi kunzima lokuthi kwenziwe isivumelwano esizaqeda impi le.”—NPR (National Public Radio), February 19, 2023.

Banengi kakhulu abantu abakhathazekileyo ngempi le langezinye ezikhona kwezinye indawo ngoba zithwalise nzima abantu abangelacala. Kodwa iBhayibhili lithini ngezimpi? Zizake ziphele yini?

Impi ezaqeda zonke izimpi

IBhayibhili lisitshela ngempi engasoze itshabalalise wonke umuntu. Liyibiza ngokuthi yi-Amagedoni, ‘impi yosuku olukhulu lukaNkulunkulu uSomandla.’ (ISambulo 16:14, 16) UNkulunkulu uzasebenzisa impi le ukuze asuse ohulumende ababangela izimpi esezihlukuluze abantu. Bala izihloko ezilandelayo ukuze ubone ukuthi impi ye-Amagedoni izanceda njani ukuthi kube lokuthula okungapheliyo emhlabeni:

• “Kuyini I-Amagedoni?”

• “Siyilindele Ngabomvu I-Amagedoni!”