OFakazi BakaJehova Baqeqetshwa Njani Ukuthi Benze Imisebenzi Yabo?
OFakazi bakaJehova baqhubeka befundiswa izinto ezitshiyeneyo ezibancedayo empilweni futhi bafundiswa lendlela okumele batshumayele ngayo. UJesu watshiya etshele abalandeli bakhe ukuthi benze umsebenzi lo wokutshumayela izindaba ezinhle lokufundisa ngoMbuso kaNkulunkulu. (UMathewu 24:14; 28:19, 20) OFakazi bakaJehova bayaqeqetshwa emihlanganweni ababa layo maviki wonke lasemihlanganweni emikhulu. Kanti njalo kulezikolo zabo ezitshiyeneyo ezenzelwe ukubafundisa ukwenza imisebenzi etshiyeneyo ebandleni kumbe enhlanganisweni.
Okusesihlokweni lesi
OFakazi bakaJehova baqeqetshwa njani?
Imihlangano yebandla. Maviki wonke baba lemihlangano emibili ezindaweni zabo zokukhonzela okuthiwa ngamaWolu oMbuso. Omunye wenziwa phakathi kweviki omunye wenziwa ngempelaviki. Loba ngubani ukhululekile ukungena imihlangano le futhi kungenwa mahala.
Umhlangano owenziwa phakathi kweviki. Emhlanganweni lo bayafundiswa ukuthi bangathuthukisa njani indlela ababala ngayo lendlela abaxoxa ngayo labantu nxa besekutshumayeleni kanye lendlela abafundisa ngayo. Kuba lezinkulumo, izingxoxo, iziboniso lamavidiyo. Umhlangano lo uyabanceda ukuthi bawenze kuhle umsebenzi wokutshumayela lowokufundisa abantu iBhayibhili. Bonke ababakhona baphuma befunde okuthile emhlanganweni lo. Uyabanceda lokuthi babe lokholo oluqinileyo, bathande uNkulunkulu futhi bathande lalabo abakhonza labo.
Umhlangano abawenza ngempelaviki. Umhlangano lo ulengxenye ezimbili. Eyokuqala yinkulumo kazulu wonke eyenzelwe ukunceda wonke umuntu ikakhulu labo abasivakatsheleyo. Eyesibili yingxoxo yemibuzo lezimpendulo eyenziwa kusetshenziswa imagazini okuthiwa yi-Nqabayokulinda.a Izihloko okuxoxwa ngazo zisekelwe eBhayibhilini futhi ziyabanceda ezimpilweni zabo lasemsebenzini wokutshumayela.
Imihlangano yezabelo leyesiqinti. Minyaka yonke oFakazi bakaJehova abavela emabandleni atshiyeneyo baba lemihlangano emithathu emikhulu lapho abafundiswa khona bendawonye. Umhlangano ngamunye uba lesihloko esisekelwe eBhayibhilini. Kanti njalo uhlelo lomhlangano ngamunye luba lezinkulumo, iziboniso, izingxoxo lamavidiyo. Njengasemihlanganweni esiba layo maviki wonke, imihlangano yezabelo leyesiqinti iyasinceda ukuthi sifunde okunengi ngeBhayibhili futhi sibe zingcitshi zokutshumayela lokufundisa. Loba ngubani ukhululekile ukungena imihlangano le emikhulu futhi kungenwa mahala.
Yiziphi izikolo oFakazi bakaJehova abalazo?
Abanye oFakazi bakaJehova bathola ithuba lokungena izikolo ezitshiyeneyo. Asixoxeni ngokuthi yiziphi izikolo lezi? Iyini inhloso yazo? Zithatha isikhathi esinganani? Ngobani abangazingena?
ISikolo Senkonzo Samaphayona
Sinceda ngani? Ngesokuqeqetsha labo ababizwa ngokuthi ngamaphayonab ukuthi bathuthukise indlela abatshumayela ngayo labafundisa ngayo. Esikolo lesi kuba lezingxoxo, lezinkulumo leziboniso ezenziwa ngabafundi.
Sithatha isikhathi esinganani? Amalanga ayisithupha.
Ngobani abangasingena? Labo asebeqede umnyaka wonke bengamaphayona bengacelwa ukuthi basingene. Lalabo asebelesikhathi eside bephayona futhi beleminyaka emihlanu bengasingenanga labo bengacelwa ukuthi basingene.
ISikolo Sabavangeli BoMbuso
Sinceda ngani? Ngesokuqeqetsha amaphayona afuna ukwenza okunengi. Isikolo lesi siyabanceda ukuthi babe zingcitshi zokutshumayela lokufundisa. Kanti njalo siyawanceda ukuthi agebhe ajule eBhayibhilini ukuze alizwisise ngcono. Nxa sebeqeqetshiwe esikolo lesi, abanengi bajayele ukucelwa ukuthi bayencedisa lapho okulaboFakazi abalutshwane khona.
Sithatha isikhathi esinganani? Inyanga ezimbili.
Ngobani abangasingena? Amaphayona alesifiso sokuyancedisa lapho okulabamemezeli abalutshwana khona ayahlolwa kukhangelwe ukuthi ayafanela yini ukungena isikolo lesi. Kuyabe kumele afile ifomu lokusingena.
ISikolo Sabadala Bebandla
Sinceda ngani? Sinceda abadalac bebandla ukuthi bayenze kuhle imisebenzi abayiphiweyo ebandleni, enjengokufundisa lokwelusa. Siphinda sibancede lokuthi bamthande kakhulu uNkulunkulu labazalwane ebandleni.—1 UPhetro 5:2, 3.
Sithatha isikhathi esinganani? Amalanga amahlanu.
Ngobani abangasingena? Yilabo abasanda kuba ngabadala kanye labadala asebeleminyaka emihlanu bengasingenanga labo bengacelwa ukuthi basingene.
ISikolo Sababonisi Beziqinti Labomkabo
Sinceda ngani? Ngesokuqeqetsha abadala ababizwa ngokuthi ngababonisi beziqinti,d ukuthi bawenze kuhle umsebenzi wabo. (1 KuThimothi 5:17) Sinceda abadala laba labomkabo ukuthi balazi kuhle iBhayibhili.
Sithatha isikhathi esinganani? Inyanga eyodwa.
Ngobani abangasingena? Labo asebelomnyaka bengababonisi beziqinti bengacelwa ukuthi basingene labomkabo. Ngemva kweminyaka engaba mihlanu bangaphinda bacelwe ukuthi basingene.
ISikolo Senkonzo SoMbuso
Sinceda ngani? Sinceda abadala lenceku ezikhonzayoe ukuthi bathuthukise indlela abanakekela ngayo abamemezeli ebandleni bebancedisa kuloba yikuphi okungabe kubakhathaza. (2 KuThimothi 3:1) Isikolo lesi senziwa ngemva kweminyaka engaba mibili kumbe emithathu.
Sithatha isikhathi esinganani? Kuyatshiyana kodwa sijayele ukuba ngeselanga elilodwa.
Ngobani abangasingena? Ababonisi beziqinti, abadala lenceku ezikhonzayo.
ISikolo Salabo Abasebenza EBhetheli
Sinceda ngani? Sinceda labo abasebenza eBhethelif ukuthi bawenze kuhle umsebenzi wabo, bamthande kakhulu uNkulunkulu futhi bathande labanye.
Sithatha isikhathi esinganani? Amalanga amahlanu lengxenye.
Ngobani abangasingena? Singangenwa yilabo abasanda kuqalisa ukusebenza eBhetheli lalabo asebelesikhathi eside besebenza eBhetheli njalo beleminyaka emihlanu bengasingenanga.
ISikolo seGiliyadi
Sinceda ngani? Sinceda abafundi ukuthi balithande kakhulu njalo balizwisise ngcono iBhayibhili. Sibanceda lokuthi bakusebenzise ezimpilweni zabo lokho abayabe bekufunda. (1 KwabaseThesalonika 2:13) Labo abangena isikolo lesi ngamaKhristu aqinileyo ekukhonzeni. Ngemva kokuqeqetshwa baba luncedo kakhulu emisebenzini etshiyeneyo eyenziwayo enhlanganisweni yaboFakazi bakaJehova. Abanye babo bangacelwa ukuthi babe ngamamishinari kumbe bayencedisa ewofisini yegatsha yelizwe abavela kulo kumbe kwelinye.
Sithatha isikhathi esinganani? Inyanga ezinhlanu.
Ngobani abangasingena? Iwofisi yegatsha ingacela labo asebelesikhathi eside besenza imisebenzi enhlanganisweni ukuthi bafile amafomu okungena isikolo lesi esiseNew York, e-United States.
ISikolo Samalunga EKhomithi Yegatsha Labomkabo
Sinceda ngani? Ngesokuqeqetsha amalunga ekhomithi egatshag ukuthi ayenze kuhle imisebenzi etshiyeneyo eyenziwa emawofisini egatsha abakuwo kumbe emazweni angaphansi kwegatsha lawo.
Sithatha isikhathi esinganani? Inyanga ezimbili.
Ngobani abangasingena? Labo abakhangela umsebenzi waboFakazi bakaJehova emawofisini amakhulu bayacela amalunga amakhomithi egatsha atshiyeneyo kanye labomkabo ukuthi bazongena isikolo lesi esenzelwa eNewYork.
Okufundiswa ngoFakazi bakaJehova kusekelwe ngaphi?
Ibhuku oFakazi bakaJehova abalisebenzisa kakhulu nxa befundiswa liBhayibhili. Bakholwa ukuthi iBhayibhili liphefumulelwe nguNkulunkulu lokuthi yilo elingabanceda kukho konke abakwenzayo.—2 KuThimothi 3:16, 17.
OFakazi bakaJehova bayayibhadalela yini imfundo abayitholayo?
Hatshi, baqeqetshwa mahala. Yonke imisebenzi eyenziwa ngoFakazi bakaJehova yenziwa kusetshenziswa iminikelo yokuzithandela.—2 KwabaseKhorinte 9:7.
a IBhayibhili lamabhuku atshiyeneyo kanye lamavidiyo kuyatholakala kuwebhusayithi yaboFakazi bakaJehova okuthiwa yi-jw.org.
b Iphayona nguFakazi obhabhathiziweyo njalo oziphethe kuhle. Uyabe ezinikele ukutshumayela amahora athile inyanga ngayinye efundisa abanye nguNkulunkulu.
c Abadala ngamadoda alingisela uKhristu alomsebenzi wokufundisa iMibhalo lokwelusa abantu bakaJehova. Babelusa ngokubancedisa ezintweni ezitshiyeneyo langokubakhuthaza. Abawuholeli umsebenzi lo.
d Umbonisi wesiqinti ngumdala webandla okhethwa ukuthi avakatshele amabandla atshiyeneyo esiqintini sakhe iviki ngayinye. Uphinda akhuthaze abazalwane ebandleni ngentshumayelo ezisekelwe eBhayibhilini langokuhamba labo nxa besiyatshumayeza abantu.
e Inceku ezikhonzayo zenza imisebenzi etshiyeneyo ukuze zincedise abazalwane ebandleni, futhi lokhu kunceda abadala ukuthi babe lesikhathi esinengi sokufundisa lokwelusa.
f Amawofisi egatsha aboFakazi bakaJehova abizwa ngokuthi ngamaBhetheli. Labo abasebenza eBhetheli benza imisebenzi etshiyeneyo enceda oFakazi abasendaweni abakuyo.
g Ikhomithi yegatsha ibunjwa ngabazalwane abathathu kumbe abadlula lapho abaqinileyo ekukhonzeni.