IMIBUZO EBUZWA NGABASAKHULAYO
Ngingenzani Nxa Ngingakuthandi Ukuya Esikolo?
Ukuba ngumntwana wesikolo kunzima. Abanye ababalisi bayatshaya, abanye abantwana bathwalisa abanye nzima, kulemihloliso enzima lama-homework angapheliyo. Mhlawumbe konke lokhu yikho okwenza lawe ungakuthandi ukuya esikolo.a Omunye osakhulayo okuthiwa nguRachelb uthi:
“Mina ngingakhetha ukuyazikwejisela elwandle, ukutshona labangane bami kumbe ukuncedisa abazali bami ukupheka loba ukuklina kulokuthi ngiye esikolo!”
Engxenye lawe njengoRachel awukuthandi ukuya esikolo. Ubona angani ukuya esikolo kufanana lokupika ejele, kuyabe sokumele ubekezele uze uqede. Kodwa kuyini okungakunceda ukuthi ukukholise ukufunda?
Ubukwazi yini? Okuzakunceda ukuthi ukukholise ukuya esikolo yikucabanga ngokuthi ukufunda kuzakunceda njani. Ngokwesibonelo, uzafunda izinto ezizakunceda nxa usungumuntu omdala.
Nanku okunye okumele ucabange ngakho okuzakunceda ukuthi ukukholise ukuba sesikolo:
Imfundo ozayithola. Ezinye izinto ozifunda esikolo zizakunceda ukuthi wenelise ukulungisa inhlupho ozahlangana lazo emsebenzini kumbe empilweni nje kulokuthi uhlale ucela ukuncediswa ngabanye. Zibuze, ‘Ngiyakubona yini ukuthi ukufunda kuyanginceda lanxa kulezinye izinto engingazithandiyo ngesikolo?’
Isimiso esiseBhayibhilini: “Gcina ukuhlakanipha okuncedayo, uhlale usebenzisa kuhle ingqondo.”—IZaga 3:21.
Ukuze uthole okunengi, bala isihloko esithi “What if I’m Failing at School?”
Imikhuba emihle ozayifunda. Ukuya esikolo kuzakunceda ukuthi ufunde ukuzibamba, ukusebenzisa kuhle isikhathi sakho lokuba ngumuntu okhutheleyo futhi lokhu kuzanceda kakhulu nxa usungumuntu omdala. Zibuze: ‘Ukuya esikolo kungincedile yini ukuthi ngenze izinto ngingatshelwanga lokuthi ngibe ngumuntu okhutheleyo? Kungaphi lapho engingathuthukisa khona?’
Isimiso esiseBhayibhilini: “Ukusebenza gadalala kuloba yiwuphi umsebenzi kuyanceda.”—IZaga 14:23.
Ukuze uthole okunengi bala isihloko esithi “Kuyini Okungakunceda Ukuthi Usebenzise Kuhle Isikhathi Sakho?”
Ukuphilisana labanye. Ukufunda labanye abantwana esikolo kuzakunceda ukuthi ube lomusa kwabanye futhi ubahloniphe. Osakhulayo okuthiwa nguJoshua uthi: “Ukufunda ukukhulumisana kuhle labanye lakho kuqakathekile njengokufunda i-history kumbe i-science. Phela yinto ezakunceda okwempilo yakho yonke.” Zibuze, ‘Ukufunda labanye abantwana esikolo kungincedile yini ukuthi ngibaphathe kuhle kungelani lokuthi bakhuliswe njani kumbe ukuthi bakholwani?’
Isimiso esiseBhayibhilini: “Zamani ngamandla wonke ukuba lokuthula labantu bonke.”—KumaHebheru 12:14.
Ukuze uthole okunengi bala isihloko esithi “Ngingayithuthukisa Njani Indlela Engixoxa Ngayo Labanye?”
Ikusasa lakho. Ukuya esikolo kuzakunceda ubone izinto othanda ukuzenza futhi lokhu kuzakunceda uhlele ukuthi uzakwenzani nxa usukhulile. Intombazana okuthiwa nguBrooke ithi: “Esikolo engafunda kuso ngahle ngaqeqetshwa ukwenza umsebenzi othile. Yikho ngathi ngiqeda ngasengisenelisa ukuthola umsebenzi.” Zibuze: ‘Ngizakwenza msebenzi bani nxa sengiqedile isikolo? Yiziphi izifundo okumele ngizikhethe ukuze ngenelise ukwenza umsebenzi lo?’
Isimiso esiseBhayibhilini: ‘Lungisa indlela ukuze izinyawo zakho zinyathele kuhle.’—IZaga 4:26, Holy Bible in Ndebele.
a Amacebo amanengi okuxoxwe ngawo esihlokweni lesi ayasebenza lasebantwaneni abafunda bengekhaya.
b Amanye amabizo atshintshiwe.