Ungenzani Ukuze Uzwisise IBhayibhili?

Impendulo yeBhayibhili

IBhayibhili lilamacebo azakuncedisa ukuthi ulizwisise. Kungelani lokuthi ungubani, ungawazwisisa amazwi aseBhayibhilini ngoba ‘awanzima kakhulu njalo awakhatshana lawe.’—UDutheronomi 30:11.

Okungakunceda uzwisise iBhayibhili

1. Woba ngumuntu othobekileyo. Kwamukele ukuthi iBhayibhili liLizwi likaNkulunkulu futhi ube ngumuntu othobekileyo ngoba uNkulunkulu umelana labaziphakamisayo. (1 KwabaseThesalonika 2:13; UJakhobe 4:6) Kodwa akumelanga uphongukholwa loba yini oyizwayo ungelabufakazi. Phela uNkulunkulu ufuna usebenzise ‘amandla akho okucabanga.’—KwabaseRoma 12:1, 2.

2. Thandaza ucela ukuhlakanipha. IBhayibhili lithi “ungathembi okwakho ukuzwisisa.” (IZaga 3:5) Kodwa ‘qhubeka ucela ukuhlakanipha kuNkulunkulu’ ukuze uzwisise iBhayibhili.—UJakhobe 1:5.

3. Kwenze zikhathi zonke. Zama ukubala iBhayibhili nsuku zonke kulokuthi ulibale lapha lalaphayana.—UJoshuwa 1:8.

4. Khetha indaba ofuna ukuyibala. Khetha indaba eyodwa ngasikhathi sinye ukuze uzwisise ukuthi iBhayibhili lithini ngayo. Ungaqalisa ngokulula besekusithi ngokuya kwesikhathi ubusufunda ‘okwabavuthiweyo’ loba okwabalokholo oluqinileyo. (KumaHebheru 6:1, 2) Ukukhetha izihloko kuzakunika ithuba lokuthi uqathanise amavesi atshiyeneyo futhi kuzakunceda lokuthi uyizwisise ngcono iMibhalo, ikakhulu leyo ekhanya ‘inzima ukuzwisisa.’—2 UPhetro 3:16.

5. Ncediswa ngabanye. IBhayibhili lisikhuthaza ukuthi samukele ukuncediswa ngabanye abantu abangabe belizwisisa ngcono kulathi. (ImiSebenzi 8:30, 31) OFakazi BakaJehova balohlelo lokufunda labantu iBhayibhili mahala. Benza lokho okwakusenziwa ngamaKhristu akuqala ngoba labo bachasisela abantu iMibhalo njalo babonisane labo ukuze bayizwisise.—ImiSebenzi 17:2, 3.

Ongakudingiyo ukuze uzwisise iBhayibhili

1. Ukuba ngumuntu ofunde kakhulu. Abaphostoli bakaJesu abangu-12 babeyizwisisa iMibhalo njalo beyifundisa abanye lanxa abantu babesithi ‘abafundanga futhi bangabantu makhaza.”—ImiSebenzi 4:13.

2. Akudingi ukuthi ube lemali. Ungazifundela iBhayibhili mahala. UJesu watshela abafundi bakhe wathi: “Lamukele mahala, phanini mahala.”—UMathewu 10:8.