Kuyini IPhasika?

Impendulo YeBhayibhili?

AmaJuda ayenanza umkhosi lo ukuze atshengise ukuthi ayambonga uJehova ngokuthi wawakhulula ebugqilini eGibhithe ngo-1513 B.C.E. UJehova walaya ama-Israyeli ukuthi enze umkhosi lo ngelanga lesi-14 lenyanga eyayithiwa ngu-Abhibhi loba uNisani.​—Eksodusi 12:42; ULevi 23:5.

Kungani kuthiwa yiPhasika?

Ibala lesiHebheru elithi “Phasika” litsho ukudlula. Yikho ngesikhathi uNkulunkulu ebhubhisa amazibulo amaGibhithe wayezadlula izindlu zama-Israyeli angabhubhisi amazibulo awo. (Eksodusi 12:27; 13:15) UNkulunkulu engakalethi uhlupho lolu oluhlasimulisa umzimba watshela ama-Israyeli ukuthi agcobe imigubazi ngegazi lemvana loba elembuzi. (U-Eksodusi 12:21, 22) UNkulunkulu ‘wayezadlula’ izindlu zama-Israyeli nxa ebona uphawu lolo.​—Eksodusi 12:7, 13.

IPhasika lalinanzwa njani endulo?

UNkulunkulu watshela ama-Israyeli indlela okwakumele ananze ngayo iPhasika lokuqala.a Nanku okunye abatshela ukuthi bakwenze:

• Umhlatshelo: Ngelanga letshumi ngenyanga ka-Abhibhi (Nisani) imuli ngayinye kwakumele ikhethe imvu loba imbuzi elomnyaka owodwa ukuze ihlatshwe ngelanga lesi-14 ngenyanga leyo. NgePhasika lokuqala amaJuda agcoba imigubazi yezindlu zawo ngegazi lemvu loba elembuzi. Imvu loba imbuzi leyo kwakumele ayose njalo ayidle yonke.​—Eksodusi 12:3-9.

• Okwakudliwa ngelanga lelo: Okunye ama-Israyeli ayelaywe ukuthi akudle ngelanga lelo yisinkwa esingelamvubelo kanye lemibhida ebabayo.​—Eksodusi 12:8.

• Umkhosi: Ama-Israyeli ayenanza uMkhosi weSinkwa esingelamvubelo ngemva kwamalanga ayisikhombisa iPhasika lidlulile. Ngesikhathi leso babengadli isinkwa esilemvubelo.​—Eksodusi 12:17-20; 2 ImiLando 30:21.

• Ukufundisa: Abazali abangama-Israyeli babesebenzisa isikhathi sePhasika ukuthi bafundise abantwababo ngoJehova uNkulunkulu.​—Eksodusi 12:25-27.

• Uhambo: Ngokuhamba kwesikhathi ama-Israyeli ayesesiya eJerusalema ukuze ayenanza iPhasika.​—UDutheronomi 16:5-7; ULukha 2:41.

• Eminye imikhuba: Ngesikhathi uJesu esemhlabeni kwasokunathwa iwayini njalo kuhlatshelwe ngePhasika.​—UMathewu 26:19, 30; ULukha 22:15-18.

Imibono engaqondanga ngePhasika

Umbono Ongaqondanga: AmaKhristu kumele ananze iPhasika.

Okuqondileyo: Ngemva kokunanza iPhasika ngoNisani 14 ngomnyaka ka-33 C.E., uJesu wasungula umkhosi omutsha obizwa kuthiwa yiSidlo seNkosi Sakusihlwa. (ULukha 22:19, 20; 1 KwabaseKhorinte 11:20) Isidlo lesi sathatha indawo yePhasika njengoba kuyabe kukhunjulwa umhlatshelo ‘kaKhristu iwundlu lePhasika.’ (1 KwabaseKhorinte 5:7) Umhlatshelo kaJesu ungcono kakhulu kulePhasika ngoba wona ukhulula bonke abantu ebugqilini besono lokufa.​—UMathewu 20:28; uHebheru 9:15.