Inyamazana Ziyahamba Yini Ezulwini Nxa Zingafa?

Impendulo yeBhayibhili

IBhayibhili lifundisa ukuthi kuzo zonke izinto ezadalwayo ezisemhlabeni, ngabantu abalutshwana kuphela abazakuya ezulwini. (ISambulo 14:1, 3) Balanda ukuyakuba ngamakhosi labaphristi loJesu. (ULukha 22:28-30; ISambulo 5:9, 10) Abantu abanengi bona bazaphila khonapha emhlabeni ozabe usulipharadayisi.—IHubo 37:11, 29.

Akulandawo eBhayibhilini lapho okukhulunywa khona ukuthi inyamazana ziya ezulwini nxa zingafa. Inyamazana azenelisi ukwenza lokho okukhangelelwe kulabo ‘abahlanganyela ekubizweni kwasezulwini.’ (Hebheru 3:1) Lokhu kugoqela ukungenisa ulwazi, ukuba lokholo lokulalela imithetho kaNkulunkulu. (UMathewu 19:17; UJohane 3:16; 17:3) Ngabantu kuphela abalethemba lokuthola ukuphila okungapheliyo.—UGenesisi 2:16, 17; 3:22, 23.

Labo abalethemba lokuya ezulwini kumele baqale bafe besebevuswa. (1 KwabaseKhorinte 15:42) IBhayibhili lisitshela ngabantu abathile abake bavuswa kodwa alisitsheli ngenyamazana eyake yavuswa.—1 AmaKhosi 17:17-24; 2 AmaKhosi 4:32-37; 13:20, 21; ULukha 7:11-15; 8:41, 42, 49-56; UJohane 11:38-44; ImiSebenzi 9:36-42; 20:7-12.

Kwenzakalani nxa inyamazana ingafa?

IBhayibhili litshengisa ukuthi abantu lezinyamazana bayafanana kuNkulunkulu ngoba konke kungumphefumulo. (AmaNani 31:28, TBS) Abantu lezinyamazana badalwe ngezinto ezifananayo: ‘uthuli lomhlabathi’ kanye ‘lomoya wokuphila.’—UGenesisi 2:7, The Holy Bible in Ndebele.

IBhayibhili lifundisa ukuthi kokubili abantu lezinyamazana kuyafa. (ULevi 21:11; UHezekheli 18:20) Nxa sokufile kuyabuyela othulini loba emhlabathini. (UmTshumayeli 3:19, 20) Ngamanye amazwi kuyabe kungasaphili.a

Inyamazana ziyawona yini?

Hatshi. Ukuwona yikucabanga kumbe ukwenza loba yini engahambelani lalokho uNkulunkulu akufunayo. Abantu yibo kuphela abangenza isono ngoba bayenelisa ukwehlukanisa phakathi kokuhle lokubi, ikanti izinyamazana zona azenelisi ukukwenza lokhu. Ziqondiswa yimizwa yemvelo kumbe indlela ezadalwa ngayo. (2 UPhetro 2:12) Inyamazana ziyafa ngoba kazidalelwanga ukuphila phakade.

Kuqondile yini ukuphatha kubi izinyamazana?

Hatshi. UNkulunkulu wanika abantu ilungelo lokubusa izinyamazana kodwa kafuni siziphathe kubi. (UGenesisi 1:28; AmaHubo 8:6-8) UNkulunkulu ulendaba lezinyamazana zonke okuhlanganisa lenyoni ezincane kakhulu. (UJona 4:11; UMathewu 10:29) Watshela izinceku zakhe endulo ukuthi zingaphathi kubi izifuyo.—U-Eksodusi 23:12; UDutheronomi 25:4; IZaga 12:10.

Amavesi akhuluma ngezinyamazana

UGenesisi 1:28: “UNkulunkulu wababusisa wathi kubo, ‘Zalani lande ngobunengi; wugcwaliseni umhlaba, liwubuse. Busani phezu kwezinhlanzi zolwandle lezinyoni zemoyeni laphezu kwezidalwa zonke ezihambayo emhlabathini.’”

Ingcazelo: UNkulunkulu wanika abantu ilungelo lokubusa izinyamazana.

AmaNani 31:28: “Njalo thelisela . . . umthelo emadodeni empi ayephumele impi, umphefumulo owodwa phakathi kwamakhulu amahlanu, owabantu, lowenkomo, lowabobabhemi, lowezimvu.”

Ingcazelo: Kokubili abantu lezinyamazana kungumphefumulo.

IZaga 12:10: “Umuntu olungileyo uyayinanzelela imfuyo yakhe.”

Ingcazelo: Abantu abalungileyo bazigcina kuhle izifuyo zabo.

UMathewu 10:29: “Intaka ezimbili zithengiswa ngohlamvu lwemali olungatsho lutho angithi? Lanxa kunjalo, kayikho leyodwa ewela phansi uYihlo engakwazi.”

Ingcazelo: UNkulunkulu ulendaba lezinyamazana zonke okuhlanganisa lenyoni ezincane kakhulu.

a Ukuze uthole okunengi ngendaba le khangela isahluko 6 sebhuku elithi, IBhayibhili Lisifundisani?