UKUCHASISWA KWAMAVESI ASEBHAYIBHILINI
AmaNani 6:24-26—“INkosi Ilibusise, Ililondoloze”
“Kwangathi uJehova angalibusisa njalo alivikele. Kwangathi uJehova angenza ubuso bakhe bukhazimule kini, sengathi angaba lomusa kini. Kwangathi uJehova angakhangelisa ubuso bakhe kini, alinike ukuthula.”—AmaNani 6:24-26, INguqulo Yomhlaba Omutsha.
“INkosi ilibusise, ililondoloze. INkosi ikhanyise ubuso bayo phezu kwenu, ibe lomusa kini. INkosi iphakamise amehlo ayo ilikhangele, ilehlisele ukuthula.”—AmaNani 6:24-26, The Holy Bible in Ndebele.
Okutshiwo ngamaNani 6:24-26
Amazwi asemavesini la ayejayele ukubizwa ngokuthi yisibusiso sabaphristi kumbe isibusiso sika-Aroni ngoba u-Aroni nguye owaba ngowokuqala ukuba ngumphristi omkhulu ko-Israyeli. (U-Eksodusi 28:1) Isibusiso lesi sasivela kuNkulunkulu ngokwakhe. (AmaNani 6:22, 23) Wathi kuMosi: “Tshela u-Aroni lamadodana akhe uthi, ‘Nansi indlela okumele libusise ngayo abantu bako-Israyeli,’” ngemva kwalokho wasesitsho amazwi akumaNani 6:24-26. Abaphristi ababethembekile babewulalela umthetho lo futhi ngokutsho isibusiso leso babetshengisa ukuthi bayalihlonipha ibizo likaNkulunkulu elithi Jehova.a Uvesi 27 uthi: “Kumele [abaphristi] babeke ibizo lami phezu kwabantu bako-Israyeli ukuze ngibabusise.”
“Kwangathi uJehova angalibusisa njalo alivikele.” UJehova ubusisa labo abamkhonzayo ngokubavikela, ngokubakhokhela langokubenza baphumelele. (IZaga 10:22) NgesiHebheru amazwi akumaNani 6:24-26 atshengisa ukuthi uJehova wayebusisa umuntu ngamunye ko-Israyeli hatshi beyisizwe sonke.
“Kwangathi uJehova angenza ubuso bakhe bukhazimule kini, sengathi angaba lomusa kini.” Nxa umuntu wayecela ukuthi uNkulunkulu ‘akhazimulise ubuso bakhe’ wayeyabe ecela ukuthi uNkulunkulu amtshengise umusa lowomuntu.b Umutsho lo ungahunyutshwa langokuthi: “Kwangathi INKOSI ingabobotheka nxa ikukhangele.” (AmaNani 6:25, New International Reader’s Version) UJehova uba lomusa ebantwini bakhe ngokubatshengisa uzwelo lesihawu.—U-Isaya 30:18.
“Kwangathi uJehovac angakhangelisa ubuso bakhe kini, alinike ukuthula.” UJehova ‘ukhangelisa ubuso bakhe’ ebantwini bakhe ngokutshengisa ukuthi uyabathanda langokubanika ukuthula. Elinye ibhuku elichasisa amabala aseBhayibhilini lithi “ibala lesiHebheru (elithi shalom) elihunyutshwe ngokuthi ukuthula kalitsho umuntu obalekela izingxabano labanye abantu kodwa litsho lomuntu ohlalisekileyo futhi olokuthula loNkulunkulu.”
Ama-Israyeli kwakumele alalele uJehova nxa efuna ukuthola izibusiso eziqanjwe emavesini la. (ULevi 26:3-6, 9) UJehova wayewabusisa kuphela nxa ayemlalela. Lokhu kwakhanya ngesikhathi kubusa uSolomoni loHezekhiya.—1 AmaKhosi 4:20, 25; 2 ImiLando 31:9, 10.
Lanxa kungasadingakali ukuthi amaKhristu aphindaphinde isibusiso lesi, akhululekile ukusebenzisa amazwi ahambelana lalawa nxa ethandazela abanye kumbe ekhuthaza amanye amaKhristu. (1 KwabaseThesalonika 5:11, 25) UJehova katshintshi, uhlala efuna ukubusisa lokuvikela abantu abamkhonza bethembekile. Ukukhumbula lokhu kuyawanceda amaKhristu ukuthi ahlale elokuthula ngoba ayakwazi ukuthi uJehova uyawamukela lokuthi “ubuso” bakhe buyakhazimula phezu kwawo.
Amanye amavesi asinceda sizwisise amaNani 6:24-26
Izahluko ezingu-10 zokuqala zebhuku lamaNani yiziqondiso ezaphiwa abako-Israyeli ngesikhathi beseduze kwentaba iSinayi belungiselela ukuyangena eLizweni Lesithembiso. Bahlala khonapho okwesikhathi esingafika umnyaka futhi kulapho uJehova abahlela khona wabanika lemithetho etshiyeneyo eyacina ibumba isivumelwano soMthetho.
UJehova waphinda watshela uMosi ukuthi u-Aroni lamadodana akhe okuyibo ababekhethwe ukuthi babe ngabaphristi kwakumele bababusise njani abako-Israyeli. (AmaNani 6:22, 23) Kusukela lapho u-Aroni lezizukulwane zakhe babekhuluma amazwi akumaNani 6:24-26 ukuze babusise abako-Israyeli. Ngokuhamba kwesikhathi kwasengumkhuba ukuthi umphristi abusise abantu ngamazwi la ngemva komhlatshelo wokucina wangalelolanga owawusenziwa ethempelini.
Bukela ividiyo le emfitshane ukuze ubone okumunyethwe libhuku lamaNani.
a Bala isihloko esithi “Ngubani UJehova?” ukuze uthole ukuthi kungani amaBhayibhili amanengi esebenzisa ibizo lokuhlonipha elithi Nkosi kulokusebenzisa ibizo likaNkulunkulu elithi Jehova.
b IBhayibhili lisitshela ukuthi ngezinye izikhathi uJehova wayefihlela abako-Israyeli ubuso bakhe nxa babesenza izinto angazithandiyo.—U-Isaya 59:2; UMikha 3:4.
c I-New International Version Study Bible ithi ukuphindwa kwebizo likaNkulunkulu emavesini la “kwakusenzelwa ukugcizelela ukuze umutsho [okuvesi 27] ube lesisindo.” Kodwa abanye basuka bacabange ukuthi okwenza ibizo likaNkulunkulu liphindwe kathathu yikuthi uNkulunkulu umthathu emunye. Asoqiniso leli ngoba elinye ibhuku elisekela indaba yokuthi uNkulunkulu umthathu emunye lithi “umphristi kanye labantu ababesizwa isibusiso lesi sikhulunywa babengeke bacabange njalo. Kubo ukuphindwa kwebizo likaNkulunkulu kathathu kwakusenza isibusiso lesi sibe lesisindo njalo sibe mnandi.” (The Pulpit Commentary, Volume 2, ikhasi 52) Ukuze uthole okunengi ngendaba le, bala isihloko esithi “Ingabe UNkulunkulu UnguZiqu-zintathu?”