2. Ukuhlupheka Kubangelwa Ngabantu Yini?
Kungani Kumele Udinge Impendulo Yombuzo Lo?
Nxa kungabantu ababangela ukuhlupheka, kutsho ukuthi kukhona abangakwenza ukuze ukuhlupheka kube nganeno.
Okumele Ucabange Ngakho
Yiziphi izinto ezenza abantu bahlupheke?
Ukuhlukuluzwa.
I-World Health Organization (WHO) ithi kucatshangelwa ukuthi umuntu oyedwa kwabane wake wahlukuluzwa. Besekusithi phakathi kwabesifazana abathathu, oyedwa wabo wake wahlukuluzwa ngokutshaywa kumbe wahlukuluzwa kwezemacansini kumbe wenziwa kokubili.
Ukubulawa kwabantu.
Umbiko okhitshwe yi-WHO ngo-2018, uthi: “Ngo-2016 kwabulawa abantu abangaba ngu-477 000 emhlabeni wonke.” Kubikwa lokuthi abantu abangafika 180 000 bafa ezimpini lasezingxabanweni ezabakhona ngalowomnyaka.
Ezempilakahle.
Kumagazini ye-National Geographic, umlobi okuthiwa nguFran Smith wathi: “Abantu abedlula 1 bhiliyoni bayabhema futhi igwayi libangela imikhuhlane ebulalayo: umkhuhlane wenhliziyo, i-stroke, ukuphefumula nzima, umkhuhlane wamaphaphu, lemvukuzane yamaphaphu.”
Ubandlululo.
UJay Watts ohlola ukusebenza kwengqondo yomuntu uthi: “Ngezinye izikhathi ukuhlulukelwa leminye imikhuhlane ehambelana lakho ibangelwa yibuyanga, ukubandlululwa ngenxa yokuthi ungumhlobo bani, ungowesifazana loba ungowesilisa, ukuxotshwa lapho obuhlala khona kanye lokutshiyana kwamasiko.”
FUNDA OKUNENGI
Bukela ividiyo ethi Kungani UNkulunkulu Wadala Umhlaba? etholakala ku-jw.org.
Okutshiwo LiBhayibhili
Inhlupho ezinengi zibangelwa ngabantu.
Ezinengi zakhona zibangelwe ngohulumende abacindezela abantu.
“Umuntu ubuse umuntu kwaba yikulimala kwakhe.”—UMTSHUMAYELI 8:9, NWT.
Kukhona esingakwenza ukuze singehlelwa ngezinye inhlupho.
IBhayibhili likhuthaza abantu ukuthi babe lempilakahle lokuthi bahlalisane kuhle labanye.
“Ingqondo elokuthula iletha ukuphila emzimbeni, kodwa umhawu ubolisa amathambo.”—IZAGA 14:30.
“Susani kini konke ukufukamela inzondo embi, lokuthukuthela, lolaka, lokuklabalala, lokuthethisa kanye lakho konke okulimazayo.”—KWABASE-EFESU 4:31.