UMHLABA OGCWELE INHLUPHO

1 | Vikela Impilakahle Yakho

KUNGANI KUQAKATHEKILE?

Ukwehlelwa zinhlupho kungaphambanisa impilakahle yethu ngendlela ezitshiyeneyo.

Inhlupho zenza abantu bakhathazeke futhi ukukhathazeka okwesikhathi eside kungenza umuntu acine egula.
Eminye imonakalo ingenza izibhedlela zicine zisandelwa futhi lemithi ingaseneli.
Ezinye inhlupho zingenza ukuthi abantu bacine bengaselamali eyeneleyo futhi sebesehluleka ukuthenga ukudla okwakha umzimba kanye lemithi yokwelapha.

Okumele Ukwazi

Ukugula kakhulu lokukhathazeka kungenza ucine usenza izinqumo ezingenza ungasayinaki impilakahle yakho. Lokhu kungenza ucine usugula kakhulu.
Nxa ungekela ukudinga usizo kwabezempilakahle isimo singacina sisiba sibi kakhulu, kwezinye izikhathi ungacina usulahlekelwa yimpilo yakho.
Ukuba lempilakahle kuzakunceda ukuthi wazi okumele ukwenze nxa usuphakathi kohlupho.
Kungelani lokuthi ulemali loba hatshi ungenelisa ukuvikela impilakahle yakho.

Ongakwenza

Umuntu ohlakaniphileyo uyayibona ingozi isesekhatshana futhi abesedinga amaqhinga okuyibalekela nxa kuvuma. Lokhu kuyasebenza lasendabeni yempilakahle. Inhlanzeko ingakunceda ukuthi ungabanjwa yimikhuhlane kumbe ukuthi umkhuhlane ungakuqineli. Zama ngazo zonke izindlela ukuthi uzivikele.

“Mina lomkami sibaleqiniso lokuthi sihlala sihlanzekile futhi lekhaya lethu lihlala lihlanzekile ukuze singachithi imali enengi sisiya kubodokotela futhi sithenga lemithi.”—U-Andreas.a

a Amanye amabizo atshintshiwe.

KUYINI OKUNGAKUNCEDA? Amacebo Angakunceda

WOBA NGUMUNTU OHLANZEKILEYO

IBhayibhili lithi: “Umuntu olengqondo uthi ebona ingozi acatshe.” (IZaga 22:3) Zama ukudinga ukuthi kuyini okungaphambanisa impilakahle yakho ube usukubalekela.

hlanzeka

• Geza izandla zakho kanengi ngamanzi alesepa ikakhulu nxa ungakabambi ukudla kumbe nxa uphuma esambuzini.

Woba leqiniso lokuthi indawo ohlala kuyo ihlanzekile futhi uhlikihle ngomuthi wokubulala amagcikwane lapho abantu abanengi abajayele ukubamba khona.
Hlalela khatshana labantu abagulayo.
DLANA UKUDLA OKWAKHA UMZIMBA

IBhayibhili lithi: “Kakho owake wazonda umzimba wakhe, kodwa uyawunika ukudla futhi awuphathe kuhle.” (Kwabase-Efesu 5:29) Sitshengisa ukuthi siyayithanda imizimba yethu ngokunanzelela lokhu esikudlayo lesikunathayo.

Dlana ukudla okwakha umzimba

• Natha amanzi amanengi.

Dlana imibhida etshiyeneyo kanye lezithelo.
Ungadli kakhulu izinto ezilamafutha amanengi, isawudo elinengi loba itshukela enengi.
Ungabhemi, ungasebenzisi izidakamizwa futhi unganathi kakhulu.
“Siyazama ukudla ukudla okwakha umzimba ukuze singagulaguli ngoba lokhu bekungenza ukuthi sisebenzise okuyimadlana esikutholayo ukuthi sibhadale odokotela futhi sithenge lemithi. Sibona kungcono ukuthi imali yethu siyisebenzise ukuthenga ukudla okwakha umzimba.”—UCarlos.

QEQETSHA UMZIMBA FUTHI UZINIKE ISIKHATHI ESENELEYO SOKUPHUMULA

IBhayibhili lithi: “Kungcono ukuphumula kancane kulokusebenza nzima lokuxotshana lomoya.” (UmTshumayeli 4:6, NWT) Lanxa ukusebenza kuqakathekile kumele sithole isikhathi sokuphumula.

Qeqetsha umzimba

• Hlala uqeqetsha umzimba. Ungaqalisa ngokuhlala uzihambahambela nje. Ukuqeqetsha umzimba kungayithuthukisa impilakahle yakho lanxa usumdala, ukhubazekile kumbe ulomkhuhlane ophila lawo.

Woba lesikhathi eseneleyo sokuphumula. Nxa ungekela ukuthola ukuphumula okwaneleyo ungacina usukhathazeka kakhulu futhi ungasenelisi lokugxilisa ingqondo kulokho okwenzayo. Ngokuya kwesikhathi lokhu kungabangela ukuthi uhlale ungogulayo.
Phumula

Faka isikhathi sokulala futhi ulale ngalesosikhathi. Zama ukuthi ulale ngesikhathi esifananayo futhi uvuke ngesikhathi esifananayo nsuku zonke.
Zama ukuthi nxa usuzalala ungabukeli i-TV kumbe usebenzise ifoni lokunye okunjalo.
Nxa isikhathi sokulala sesiseduze zama ukuthi ungadli kakhulu, unganathi utshwala futhi ungadli kumbe unathe izinto ezizakuxotshela ubuthongo.
“Ngijayele ukunanzelela ukuthi kuqakatheke kakhulu ukuthi ngithole isikhathi sokuphumula. Nxa ngingekela ukuthola isikhathi eseneleyo sokulala ngijayele ukutshaywa likhanda futhi ngizwe lomzimba wami ubuhlungu kodwa nxa ngingathola isikhathi eseneleyo sokulala ngiyezwa ngisenelisa ukwenza loba yini, ngiyabe ngilamandla futhi angigulaguli.”—UJustin.

[Ibhokisi elisekhasini 6]