UMHLABA OGCWELE INHLUPHO

2 | Vikela Imali Lempahla Yakho

KUNGANI KUQAKATHEKILE

Abantu abanengi bathwele nzima bezama ukudinga izinto ezifunekayo empilweni. Okudanisayo yikuthi inhlupho ezisemhlabeni sezisenza kubenzima kakhulu ukuthola okokuziphilisa. Kungani kunjalo?

Nxa ilizwe loba indawo ilenhlupho, izinto ezifanana lokudla lendawo yokuhlala zicina sezidula kakhulu.
Inhlupho zingabangela ukuthi abantu baphelelwe ngumsebenzi kumbe bacine besebenzela imali engakwani lutho.
Umonakalo lezingozi kungabhidliza amabhizimusi abantu, izindlu zabo lempahla yabo besekusenza ukuthi abanengi basale bengabayanga.

Okumele Ukwazi

Ukusebenzisa kuhle imali kuzakunceda ukuthi wenelise ukulwisana lenhlupho ezingabakhona.
Khumbula ukuthi imali oyiholayo loba oyigcinileyo ingavuka iwile kumbe impahla olayo ingavuka isiphelelwe ngumphako.
Kulezinye izinto ongeke uzithenge ngemali ezifanana lentokozo kanye lokumanyana emulini.

Ongakwenza

IBhayibhili lithi: “Nxa silokudla lokokugqoka sizasuthiseka ngezinto lezo.”—1 KuThimothi 6:8.

Nxa singabantu abasuthisekayo sizathokoza ngokuba lalokhu esikudingayo. Lokhu kuqakathekile ikakhulu nxa singela mali enengi.

Okunye okungakunceda ukuthi usuthiseke yikutshintsha indlela osebenzisa ngayo imali ngoba nxa ungasebenzisa edlula leyo olayo uyacina ungena ezikweledeni.

KUYINI OKUNGAKUNCEDA?—Amacebo Angakunceda

Nanka amanye amacebo angakunceda ukuthi uvikele lokhu oziphilisa ngakho nxa uphakathi kwenhlupho

UNGATHENGI IZINTO ONGAZIDINGIYO

Bhala phansi ukuthi uzayisebenzisa njani imali

Thenga ulutho nxa kuyikuthi usuludinga sibili. Zibuze ukuthi: ‘Ngiyayidinga yini sibili imota? Ngingalima yini ezinye izinto kulokuthi ngizithenge?’
Ungakathengi lutho, qala uzibuze ukuthi: ‘Ngiyaludinga yini? Imali yakhona ngilayo yini?’Umfanekiso
Bhalisa ukuze uthole uncedo kuhulumende loba kwezinye inhlanganiso ezinceda abantu.

“Sahlala phansi siyimuli, sakhangela indlela esasiphila ngayo. Sehlisa imali esasiyisebenzisa kwezokuzilibazisa lasekudleni.”—UGift.

BHALA PHANSI INDLELA OZASEBENZISA NGAYO IMALI

Ungathengi izinto ongazidingiyo

IBhayibhili lithi: “Amalungiselelo abakhutheleyo anika umvuzo njengoba nje amawala eletha ubuyanga.” (IZaga 21:5) Ukubhala phansi indlela ozasebenzisa ngayo imali kuzakunceda ukuthi ungasebenzisi imali edlula leyo olayo.

Okuqala, bhala phansi ukuthi ngenyanga uthola imali enganani.
Okwesibili, bhala phansi izinto okumele uzithenge kumbe uzibhadalele nyanga zonke, ubusuhlola indlela osebenzisa ngayo imali.
Okwesithathu, qathanisa imali oyitholayo lezindleko zakho, ubusubona ukuthi kukhona yini ongakukhipha ukuze ungacini usebenzisa imali eyedlula leyo oyitholayo.

Nyanga zonke siyabhala phansi imali esiyitholayo lezindleko esilazo. Siyazama ukugcina imali ukuze siyisebenzise nxa kungavela okunye kumbe nxa kulokunye esifuna ukukuthenga esikhathini esizayo. Lokhu kusincede ukuthi singakhathazeki kakhulu ngoba siyabe sivele sikwazi ukuthi imali yethu sizayisebenzisa njani.”—UCarlos.

GCINA IMALI UKUZE UBALEKELE IZIKWELEDE

Wonga imali / ubalekele izikwelede

Hlela kuhle ukuze ungahlali ukweleda. Nxa kusenza, zama ukuthi ungabi lesikwelede vele. Kulokuthi ukwelede, gcina imali ukuze uthenge lokho oyabe ukudinga.
Zama ukuthi nyanga zonke ubeke enye imali eceleni ukuze uyisebenzise nxa kulolutho okumele uluthenge loba ulubhadalele kumbe nxa kungavela esinye nje isimo.

SEBENZA NZIMA UKUZE UNGALAHLEKELWA NGUMSEBENZI

IBhayibhili lithi: “Ukusebenza nzima konke kuletha inzuzo.”—IZaga 14:23.

Sebenza nzima ukuze ungaphelelwa ngumsebenzi

Thanda umsebenzi wakho. Lanxa umsebenzi owenzayo kungayisiwo ongafisa ukuwenza, khumbula ukuthi wenza uthole imali.
Khuthala futhi uthembeke. Lokhu kuzakunceda ukuthi ungalahlekelwa ngumsebenzi, futhi lanxa ungaphelelwa ngumsebenzi kuzabalula ukuthi uthole omunye.

“Ngamukela loba yiwuphi umsebenzi, lanxa ngingawuthandi kumbe imali engizayithola incane kulaleyo ebengiyikhangelele. Ngiyazama ukuhlala ngithembekile lokuwenza kuhle umsebenzi engiwuphiweyo.”—UDmitriy.

Nxa udinga umsebenzi . . .

Yenza konke ongakwenza. Zama ukuthintana lamakhampani angaba lomsebenzi ongenelisa ukuwenza lanxa amakhampani lawo angazange athi ayaqhatsha. Tshela izihlobo labangane ukuthi udinga umsebenzi.
Vuma ukutshintsha ngoba kungenzeka ungatholi umsebenzi owufunayo.