UMHLABA AWUSOZE UTSHABALALE
AMANZI AHLANZEKILEYO
BEKUNGEKE kuphileke emhlabeni aluba akulamanzi, ikakhulu amanzi ahlanzekileyo. Phela ezintweni ezinengi eziphilayo, amanzi yiwo amanengi kakhulu. Amanzi atholakala ezizibeni, emifuleni, emaxhaphozini lasemithonjeni. Amanzi anathwa ngabantu lezinyamazana futhi sithelela ngawo izilimo zethu.
Okwenza Amanzi Ahlanzekileyo Atholakale Nzima
Kulamanzi amanengi kakhulu emhlabeni. Kodwa umbiko owakhitshwa yi-World Meteorological Organization utshengisa ukuthi ‘malutshwane kakhulu asebenzisekayo futhi ahlanzekileyo.’ Lanxa kungakhanya angani amanzi ahlanzekileyo malutshwane, iqiniso yikuthi ayenela bonke abantu abasemhlabeni. Kodwa amanye akhona asuke angcoliswe njalo kuba nzima ukuthi abantu bawathole ngenxa yokuthi bayabe sebebanengi kakhulu endaweni eyodwa. Okunye okungezelela uhlupho lolu yikuphanjaniswa komkhathi. Ezinye ingcitshi zithi emnyakeni engu-30 elandelayo abantu abafika 5 bhiliyoni bazabe sebethwala nzima ukuthola amanzi ahlanzekileyo.
Umhlaba Awusoze Utshabalale
Umhlaba udalwe ngendlela yokuthi amanzi azahlala ekhona kuze kube nini lanini. Umhlabathi, izidalwa eziselwandle kanye lelanga kuyabambisana ukuze kuhlambulule amanzi. Ake sixoxe ngobunye ubufakazi obutshengisa ukuthi umhlaba awusoze utshabalale loba sekutheni.
Ubufakazi butshengisa ukuthi inhlabathi iyenelisa ukukhipha ingcekeza enengi engabe isemanzini. Ezindaweni ezingamaxhaphozi kujayele ukuba lezimila ezenelisa ukukhipha amagasi lamakhemikhali anjenge-nitrogen le-phosphorus engabe esemanzini. Izimila lezo ziyenelisa lokukhipha imithi yokubulala izibungwana ezisemanzini.
Abezesayensi sebenanzelele ukuthi kulendlela ezitshiyeneyo amanzi aklinwa ngazo ukuze ahlanzeke. Nxa amanzi elokhu egeleza, ingcekeza esemanzini iyabe ilokhu iphunguleka kancane kancane ibisincibilikiswa yi-bacteria.
Emanzini ahlanzekileyo kujayele ukuba lokuzinhlanzi okuncane okwenelisa ukubulala amanye amakhemikhali ayingozi. Okuzinhlanzi lokhu kuthatha insuku ezilutshwana kakhulu ukuthi kuhlambulule amanzi futhi indlela okuwahlambulula ngayo idlula khatshana amakhemikhali asetshenziswa ngabantu.
Okwenza amanzi angapheli emhlabeni yikuthi kulomjikelezo wamanzi kanye lokunye okwenziwa yimvelo ukuze amanzi ahlale ekhona emkhathini.
Okwenziwa Ngabantu Bezama Ukuqeda Uhlupho Lwamanzi
Ukulungisa imota nxa zivuza i-oyili lokungalahleli amakhemikhali emhlabathini kuyanceda ukuthi amanzi angangcoliswa
Ingcitshi zihlala zikhuthaza abantu ukuthi basebenzise kuhle amanzi. Ziphinda zisikhuthaze ukuthi silungise izimota zethu nxa zivuza i-oyili, singalahleli imithi loba amaphilisi ezambuzini lokuthi singachitheli phansi amakhemikhali ayingozi ukuze singangcolisi amanzi.
Abanye omanjinela sebethole izindlela zakulezinsuku zokukhipha isawudo elisemanzini aselwandle. Lokhu bathi bakwenzela ukuthi kutholakale amanzi amanengi anganathwa ngabantu.
Kodwa indlela lezi aziluqedi kangako uhlupho lwamanzi ngoba kufuneka imali enengi kakhulu ukuze lokhu kwenziwe. Umbiko owakhitshwa yi-United Nations ngo-2021 omayelana lokugcinwa kwamanzi ehlanzekile uthi: ‘Abantu kumele basebenze nzima ukwedlula lokho abakwenzayo khathesi ukuze kutholakale amanzi ahlanzekileyo eneleyo.’
Okutshiwo LiBhayibhili
‘UNkulunkulu uqoqa amathonsi amanzi, inkungu ihlangane ibe lizulu, amayezi alithululele phansi, line emhlabeni abantu bathole amanzi.’—UJobe 36:26-28.
Kulendlela ezitshiyeneyo ezadalwa nguNkulunkulu ezenza ukuthi umhlaba uhlale ulamanzi eneleyo.—UmTshumayeli 1:7.
Cabanga ngalokhu: Nxa uNkulunkulu wadala umhlaba usenelisa ukugcina amanzi ehlanzekile, kambe angehluleka yini ukulungisa wonke umonakalo obangelwe ngabantu? Bala isihloko esisekhasini 15 esithi “UNkulunkulu Uthi Umhlaba Awusoze Utshabalale.”