IBhayibhili Lithini Ngohlupho Lokuswelakala Kwamanzi Olusemhlabeni Wonke?
Sonke siyawadinga amanzi ahlanzekileyo ukuze siphile. Unobhala jikelele we-United Nations u-António Guterres wathi: “Izinto ezinengi esizisebenzisa khathesi zifuna amanzi futhi lokhu sokubangela ukuthi sibe lohlupho olukhulu lwamanzi.” Amabhiliyoni abantu emhlabeni wonke athwala nzima ukuthola amanzi ahlanzekileyo.
Strdel/AFP via Getty Images
Kambe ukuthi uhlupho lwamanzi luzake luphele? Abantu bazake bawathole yini amanzi eneleyo? IBhayibhili lona lithini ngendaba le?
Esikuthenjiswa liBhayibhili
IBhayibhili lisitshela ukuthi udubo lwamanzi luzaphela du. Ayabe esemanengi amanzi ahlanzekileyo emhlabeni wonke.
“Amanzi azampompoza enkangala, lezifula zigeleze endaweni elugwadule. Umhlabathi otshisa bhe uzakuba lichibi lamanzi elilemihlanga, lomhlabathi owomileyo ube lemithombo empompoza amanzi.”—U-Isaya 35:6, 7.
Kuyini okungenza sisithembe isithembiso lesi? Ake sixoxe ngobunye ubufakazi obuseBhayibhilini obumayelana lendlela umhlaba odalwe ngayo.
Okutshiwo liBhayibhili ngomhlaba langomjikelezo wamanzi
‘UNkulunkulu kawudalanga umhlaba ukuthi ungabi lalutho kodwa wawubumba ukuze kuhlalwe kuwo.’—U-Isaya 45:18.
UNkulunkulu wadala umhlaba ngendlela yokuthi uyenelisa ukuhlala ulamanzi ahlanzekileyo ukuze izinto ezitshiyeneyo azidalileyo ziqhubeke ziphila.
“[UNkulunkulu] uqoqa amathonsi amanzi, inkungu ihlangane ibe lizulu, amayezi alithululele phansi, line emhlabeni abantu bathole amanzi.”—UJobe 36:27, 28.
Ngamazwi alula nje ivesi le isitshela ukuthi uNkulunkulu wenza kwaba lomjikelezo wamanzi (water cycle) kanye lezinye indlela ezenza ukuthi kuhlale kulamanzi emhlabeni. Nxa ilanga lingatshisa lenza ukuthi amanzi asemhlabathini kumbe elwandle aphakame abesebumba amayezi ngemva kwalokho besekusina izulu. Umjikelezo lo wenza ukuthi kuhlale kulamanzi ahlanzekileyo angasetshenziswa ngabantu lezinyamazana.—UmTshumayeli 1:7; U-Amosi 5:8.
“Ngizalinisela izulu ngesikhathi salo njalo lomhlabathi uzathela izithelo zawo kuthi lezihlahla zeganga zilinike izithelo zazo.”—ULevi 26:4.
Abako-Israyeli babephila ngokulima yikho uNkulunkulu wabathembisa ukuthi izulu lizahlala lisina ngesikhathi esifaneleyo ukuze batshaye inala. UNkulunkulu uyakwazi ukuthi izulu kumele line ngesikhathi esifaneleyo ukuze abantu bathole ukudla.
Sekuseduze ukuthi uNkulunkulu akwenze emhlabeni wonke lokho ayekwenzela abako-Israyeli. (U-Isaya 30:23) Okwakhathesi uhlupho lwamanzi lubathwalise nzima abantu ezindaweni ezinengi futhi ukuswelakala kwezulu ngokunye okubangela uhlupho lolu. Kuyini okunye esikuthenjiswa liBhayibhili mayelana lokuqedwa kohlupho lwamanzi?
Uhlupho lwamanzi luzaphela
IBhayibhili litshengisa ukuthi uNkulunkulu uzasebenzisa uMbuso wakhe ukuze aqede zonke inhlupho ezisemhlabeni okuhlanganisa lodubo lwamanzi. (UMathewu 6:9, 10) UMbuso kaNkulunkulu nguhulumende osezulwini ozabusa umhlaba wonke. (UDanyeli 2:44; ISambulo 11:15) UMbuso lo uzakwenza into esiyehlule ohulumende abakhona ngokuqeda konke nje okubangela uhlupho lwamanzi.
Uhlupho: Ukuphanjaniswa komkhathi sekubangele ukuthi umjikelezo wamanzi ungasebenzi kuhle. Ukuphambaniseka lokhu kucina kubangela isomiso kumbe izikhukhula.
Ukuqedwa kwalo: UMbuso kaNkulunkulu uzakwenza ukuthi imvelo isebenze kuhle ukuze umhlaba uzivuselele. Nanku esikuthenjiswa nguNkulunkulu: “Khangela! Ngenza izinto zonke zibe zintsha.” (ISambulo 21:5) Izindawo ezomileyo zizakuba lamanzi amanengi ahlanzekileyo ukuze kuphileke endaweni lezo. (U-Isaya 41:17-20) UJesu Khristu oyiNkosi yoMbuso kaNkulunkulu uzaqeda wonke umonakalo obangela uhlupho lwamanzi.
Ngesikhathi uJesu esemhlabeni wathulisa isiphepho futhi lokhu kutshengisa ukuthi uNkulunkulu umnike amandla amakhulu. (UMakho 4:39, 41) Ngesikhathi esebusa umhlaba, uJesu uzaqeda zonke ingozi zemvelo. Abantu bazahlala ngokuthula bengesabi ukuthi bangehlelwa yingozi.
Uhlupho: Okunye okwenziwa ngabantu abangelandaba lemvelo kanye labosomabhizimusi abayizihwaba kungcolisa imifula kanye lolwandle futhi lokhu kubangela ukuswelakala kwamanzi ahlanzekileyo.
Ukuqedwa kwalo: UNkulunkulu uzawuklina umhlaba abesesenza lokuthi amanzi atholakala emhlabeni ahlanzeke. Umhlaba wonke uzakuba lipharadayisi. IBhayibhili lithi: “Ilizwe elomileyo kanye lenkangala kuzathokoza, lendawo elugwadule izathaba njalo iqhakaze njengesafroni.”—U-Isaya 35:1.
Kuyini okuzakwenzakala kulabo abangelandaba labanye abantu kanye lemvelo? UNkulunkulu uthi ‘uzababhubhisa abawonakalisa umhlaba.’—ISambulo 11:18; IZaga 2:21, 22.
Uhlupho: Abantu abawasebenzisi kuhle amanzi ahlanzekileyo asemhlabeni okubangela ukuthi aphele masinyane.
Ukuqedwa kwalo: UMbuso kaNkulunkulu uzakwenza ukuthi intando yakhe ‘yenziwe emhlabeni.’ (UMathewu 6:9, 10) Akulamuntu oyisihwaba ozabe ekhona emhlabeni omutsha. UMbuso kaNkulunkulu uzafundisa abantu ukuthi bawuphathe kuhle umhlaba. U-Isaya 11:9 uthi: “Emhlabeni kuzagcwala ulwazi olumayelana loJehova.”a Ulwazi lolo kanye lendlela abathanda ngayo uNkulunkulu lazo zonke izinto azidalileyo kuzakwenza ukuthi abantu bawunakekela kuhle umhlaba lo.
Bala isihloko esithi “UMbuso KaNkulunkulu Uzabenzelani Abantu?” ukuze ufunde okunengi ngalokho ozakwenza.
Bala u-Isaya isahluko 35 ukuze ubone ukuthi umhlaba uzatshintsha njani usiba lipharadayisi.
Bukela ividiyo ethi Kungani UNkulunkulu Wadala Umhlaba? ukuze uzizwele okunengi ngenhloso kaNkulunkulu ngomhlaba langabantu.
a UJehova libizo likaNkulunkulu. (IHubo 83:18) Khangela isihloko esithi “Ngubani UJehova?”