UNkulunkulu Uqalisa Ukudala Izinto

ZONKE izinto ezinhle esilazo zivela kuNkulunkulu. Wenza ilanga ukuthi lisikhanyisele emini lokuthi inyanga lezinkanyezi kusikhanyisele ebusuku. UNkulunkulu wadala umhlaba ukuze sihlale kuwo.

Kodwa ilanga, inyanga, izinkanyezi lomhlaba kakusizo zinto zokuqala ezadalwa nguNkulunkulu. Uyakwazi yini ukuthi kuyini okwadalwa kuqala? UNkulunkulu waqala wadala izidalwa ezinjengaye. Ngeke sizibone, njengoba singeke simbone uNkulunkulu. EBhayibhilini izidalwa lezi kuthiwa yizingilosi. UNkulunkulu wadala izingilosi ukuthi zihlale laye ezulwini.

Ingilosi yokuqala eyadalwa nguNkulunkulu yayiqakatheke kakhulu. Ingilosi le kwakuyindodana kaNkulunkulu yokuqala njalo yasebenza loBaba wayo. Yancedisa uNkulunkulu ukudala zonke ezinye izinto. Yancedisa uNkulunkulu ukuthi adale ilanga, inyanga, izinkanyezi lomhlaba wethu.

Wawunjani umhlaba ngalesosikhathi? Ekuqaleni kwakungela muntu owayengahlala emhlabeni. Kwakungela lutho emhlabeni ngaphandle kwamanzi amanengi ayegcwele umhlaba wonke. Kodwa uNkulunkulu wayefuna abantu baphile emhlabeni. Yikho-ke waqalisa ukusilungisela wona. Wenzani?

Okokuqala, umhlaba wawudinga ukukhanya. Yikho-ke uNkulunkulu wenza ukuthi ilanga likhanyise emhlabeni. Lokhu wakwenzela ukuthi kube lemini lobusuku. Ngemva kwalokhu uNkulunkulu wenza kwavela umhlabathi owomileyo phezu kolwandle.

Ekuqaliseni kwakungela lutho emhlabeni. Wawunjengalokhu okubona emfanekisweni lapha. Kwakungela maluba, izihlahla loba izinyamazana. Kwakungela ngitsho inhlanzi olwandle. Kwakukunengi uNkulunkulu okwakumele akwenze ukuze umhlaba ube muhle ukuze kuhlale izinyamazana labantu.