Kusukela Ekudalweni Kwezinto Kusiya kuZamcolo

Umhlaba lamazulu kwavela ngaphi? Ilanga, inyanga, izinkanyezi lezinye izinto ezinengi ezisemhlabeni kwavela ngaphi? IBhayibhili lisitshela impendulo eliqiniso nxa lisitshela ukuthi zadalwa nguNkulunkulu. Yikho-ke ibhuku lethu liqalisa ngezindaba zeBhayibhili ezimayelana lendalo.

Izidalwa zokuqala zikaNkulunkulu esifunda ngazo, yizidalwa zomoya eziphosa zifanane laye. Izingilosi. Kodwa umhlaba wadalelwa abantu abanjengathi. Yikho-ke uNkulunkulu wadala indoda lowesifazana okwakuthiwa ngu-Adamu lo-Eva wababeka esivandeni esihle. Kodwa behluleka ukulalela uNkulunkulu basebelahlekelwa lilungelo lokuqhubeka bephila.

Kusukela ekudalweni kuka-Adamu kuze kufike uZamcolo, kwaba leminyaka engu-1 656. Ngesikhathi lesi kwakulabantu ababi abanengi. Ezulwini kwakulezidalwa ezingabonakaliyo. Izidalwa lezi kwakunguSathane lezingilosi zakhe ezimbi. Emhlabeni kwakuloKhayini labanye abantu ababi abanengi, kugoqele lamadoda ayeqine okungajayelekanga. Kodwa babekhona abantu abalungileyo emhlabeni abanjengo-Abela, u-Enokhi loNowa. Kungxenye 1 sizabala ngabo bonke abantu laba lezenzakalo zakhona.