U-Abhrahama—Umngane kaNkulunkulu

ENYE indawo abantu abahamba bayahlala kuyo uZamcolo esedlulile yi-Uri. Yaba lidolobho eliqakathekileyo elalilezindlu ezinhle. Kodwa abantu bakhona babekhonza onkulunkulu bamanga. Yikho ababekwenza eBhabheli futhi. Abantu be-Uri labeBhabheli babengafanani loNowa owaqhubeka ekhonza uJehova elendodana yakhe uShemu.

UNowa othembekileyo wafa sekudlule iminyaka engu-350 kulokhe kwaba lozamcolo. Indoda le oyibona emfanekisweni yazalwa uNowa eseleminyaka emibili efile. Yayiyindoda eqakathekileyo kuNkulunkulu. Ibizo layo kwakungu-Abhrahama. Wayehlala lemuli yakhe edolobheni lase-Uri.

Ngelinye ilanga uJehova wathi ku-Abhrahama: ‘Suka e-Uri utshiye izihlobo zakho uye elizweni engizakutshengisa lona.’ U-Abhrahama walalela yini, watshiya bonke ubuhle base-Uri? Ye, walalela. U-Abhrahama wacina esengumngane kaNkulunkulu ngenxa yokuthi wayehlala elalela uNkulunkulu.

Abanye abasemulini ka-Abhrahama bahamba laye ngesikhathi esuka e-Uri. Ubaba wakhe uThera wahamba laye. Lomzukulu wakhe uLothi laye wahamba laye. Lomfazi ka-Abhrahama uSara laye wahamba. Ngokuhamba kwesikhathi bonke bafika endaweni okuthiwa yiHarani lapho okwafela khona uThera. Basebekhatshana le-Uri.

Sekudlule isikhathi, u-Abhrahama lemuli yakhe basuka eHarani baya eKhenani. Sebekhonale, uJehova wathi: ‘Leli lilizwe engizalinika abantwana bakho.’ EKhenani, u-Abhrahama wahlala emathenteni.

UNkulunkulu waqalisa ukuncedisa u-Abhrahama, u-Abhrahama waba lemihlambi emikhulu yezimvu lezinye izinyamazana njalo waba lezisebenzi ezingamakhulu. Kodwa yena loSara babengela bantwana.

U-Abhrahama eseleminyaka engu-99, uJehova wathi kuye: ‘Ngiyakuthembisa ukuthi uzakuba nguyise wezizwe ezinengi.’ Kodwa lokhu kwakuzakwenzakala njani njengoba u-Abhrahama loSara basebeguge kakhulu ukuthi babe labantwana?