UJakhobe Uya eHarani

UYAWAZI yini amadoda la akhuluma loJakhobe? UJakhobe wawabona emthonjeni ngemva kokuhamba okwamalanga amanengi. Ayeselusa izimvu zawo. UJakhobe wawabuza ukuthi: ‘Livela ngaphi?’

Athi: ‘Sivela eHarani.’

UJakhobe wasewabuza: ‘Liyamazi yini uLabani?’

Aphendula athi: ‘Ye siyamazi, nansi lendodakazi yakhe uRakheli iyeza lomhlambi wayo wezimvu.’ Uyambona yini uRakheli esiza?

Lapho uJakhobe ebona uRakheli elezimvu zikamalumakhe uLabani, wakhipha ilitshe emlonyeni womthombo wazinathisa. UJakhobe wasesanga uRakheli wamtshela ukuthi ungubani. URakheli wathaba kakhulu wasegijima wayatshela ubaba wakhe uLabani ngekhaya.

ULabani wajabula kakhulu ukuhlala loJakhobe. Wathaba njalo lapho uJakhobe ecela ukutshada loRakheli. Kodwa uLabani watshela uJakhobe ukuthi amsebenzele okweminyaka eyisikhombisa ukuze amnike uRakheli. UJakhobe wakwenza lokhu ngoba wayemthanda kakhulu uRakheli. Kodwa ubona angani kwenzakalani isikhathi somtshado sesifikile?

ULabani wanika uJakhobe indodakazi yakhe yakuqala uLeya kulokuthi amnike uRakheli. Lapho uJakhobe evuma ukusebenzela uLabani okweminye iminyaka eyisikhombisa, uLabani wamnika uRakheli ukuthi abe ngumkakhe. Ngaleso sikhathi uNkulunkulu wayevumela amadoda ukuthi abe labafazi abanengi. Kodwa khathesi iBhayibhili lisitshela ukuthi indoda kumele ibe lomfazi oyedwa.