UJakhobe Uba Lemuli Enkulu

KHANGELA imuli le enkulu. La ngamadodana kaJakhobe angu-12. UJakhobe wayelamadodakazi futhi. Uyawazi yini amanye amabizo abantwana bakhe. Ake sifunde ngamanye awo.

ULeya wazala uRubheni, uSimeyoni, uLevi loJuda. Lapho uRakheli ebona ukuthi wayengazali, wadana kakhulu. Ngakho wanika uJakhobe incekukazi yakhe uBhiliha. UBhiliha wasesiba lamadodana amabili, uDani loNafithali. ULeya laye wanika uJakhobe incekukazi yakhe uZilipha. UZilipha wasezala uGadi lo-Asheri. ULeya waba lamanye amadodana, u-Isakhari loZebhuluni.

URakheli wacina esesenelisa ukuba lomntwana. Wamnika ibizo elithi Josefa. Emakhasini alandelayo sizafunda okunengi ngoJosefa ngoba waba ngumuntu oqakathekileyo kakhulu. Amadodana la angu-11 yiwo azalelwa uJakhobe esahlala lobaba kaRakheli uLabani.

UJakhobe wayelamadodakazi amanengi kodwa iBhayibhili lisitshela ngendodakazi yakhe eyodwa. Ibizo layo kwakunguDina.

Safika isikhathi lapho uJakhobe ayesefuna ukutshiya uLabani ukuze abuyele eKhenani. Ngakho wabuthanisa imuli yakhe enkulu lemihlambi yakhe eminengi eyezimvu lenkomo waseqalisa uhambo olude.

UJakhobe lemuli yakhe bengakabi lesikhathi eside bephendukile eKhenani, uRakheli wazala enye indodana. Wayizala bephakathi kohambo. URakheli wathwala nzima ekubeletheni, wacina esifa. Kodwa umntanakhe ongumfana wayephilile. UJakhobe wamnika ibizo elithi Bhenjamini.

Kumele siwakhumbule amabizo amadodana angu-12 kaJakhobe ngoba isizwe sonke sako-Israyeli savela kiwo. Izizwana zako-Israyeli ezingu-12 zilamabizo amadodana kaJakhobe angu-10 kanye lamadodana kaJosefa amabili. U-Isaka waphila okweminyaka eminengi ngemva kokuba abafana laba bonke sebezelwe. Kufanele ukuthi wayejabula kakhulu ukuba labazukulu abanengi kangaka. Kodwa ake sibone ukuthi kuyini okwenzakala kumzukulu wakhe uDina.