Abanewabo bakaJosefa Bayamzonda

UYAMBONA yini umfana odanileyo emfanekisweni? Ibizo lakhe nguJosefa. Abanewabo basanda kumthengisela emadodeni la aya eGibhithe. Khonangale, uJosefa uzakuba yisigqili. Kungani abanewabo benze into embi kangaka? Kungenxa yokuthi balomhawu ngoJosefa.

Ubaba wabo uJakhobe wayethanda uJosefa kakhulu. Watshengisa ukuthi uyamthanda ukudlula bonke ngokumenzela ijazi elihle. Lapho abanewabo bakaJosefa abangu-10 bebona ukuthi uJakhobe wayemthanda kakhulu, baqalisa ukuba lomhawu njalo basebemzonda uJosefa. Kodwa babemzondela lokunye futhi.

UJosefa waba lamaphupho amabili. Kuwo wonke amaphupho kaJosefa, abanewabo babemkhothamela. UJosefa wathi esebatshelile ngamaphupho la, basuka bamzonda kakhulu.

Ngelinye ilanga uJakhobe uthuma uJosefa ukuthi ahambe ayekhangela abanewabo abelusa izimvu. Abanewabo bakaJosefa bayambona esiza njalo abanye besebesithi: ‘Kasimbulaleni!’ Kodwa uRubheni, umnewabo omkhulu, uthi: ‘Hatshi, lingakwenzi lokho!’ Basuka bathathe uJosefa besebemphosela egodini elingelamanzi. Ngemva kwalokho bahlala phansi besebecabanga ngokuthi bangamenzani.

Ngalesosikhathi babona amadoda angama-Ishmayeli esiza. UJuda uthi kubanewabo: ‘Kasimthengiseleni ama-Ishmayeli.’ Yikho kanye abakwenzayo. Bathengisa uJosefa ngamashekeli esiliva angu-20. Abakwenzayo kwakukubi kakhulu!

Abanewabo bakaJosefa bazamtshelani ubaba wabo? Babulala imbuzi besebegxamuza ijazi elihle likaJosefa egazini. Bahamba lalo ijazi lelo kubaba wabo besebesithi: ‘Silidobhile. Ake ulikhangele kuhle kumbe lijazi likaJosefa.’

UJakhobe uyabona ukuthi yilo. Uyakhala esithi: ‘Kufanele ukuthi udliwe yinyamazana yeganga esabekayo’. Abanewabo bakaJosefa bafuna ubaba wabo acabange ukuthi yikho kanye okwenzakeleyo. UJakhobe udane kakhulu. Uyakhala okwamalanga amanengi. Kodwa uJosefa kafanga. Ake sibone ukuthi kuyini okwenzakala kuye.