Imuli Ithuthela eGibhithe

UJOSEFA akasenelisi ukuzibamba. Utshela izinceku zakhe zonke ukuthi ziphume endlini. Esesele labafowabo uqalisa ukukhala. Abafowabo bayamangala kakhulu ngoba kabakwazi ukuthi ukhalelani. Ekucineni uthi: ‘Mina nginguJosefa. Kambe ubaba usaphila na?’

Abafowabo bamangele kakhulu, abasenelisi lokukhuluma. Bayesaba. Kodwa uJosefa uthi: ‘Sondelani kimi.’ Sebesondele, uthi: ‘Ngingumfowenu uJosefa, yena lowo elamthengisela eGibhithe.’

UJosefa uqhubeka ekhuluma ngendlela elomusa, uthi: ‘Lingazisoli ngokuthi langithengisela lapha. KwakunguNkulunkulu owangithuma lapha eGibhithe ukuze ngincede abantu bangafi. UFaro ungenze ngaba ngumbusi welizwe lonke. Ngakho phangisani liye kubaba limtshele konke lokhu. Limtshele futhi ukuthi abuye azohlala ngapha.’

UJosefa ugona abafowabo njalo uyabanga bonke. Lapho uFaro esizwa ukuthi abafowabo bakaJosefa babuyile, uthi kuJosefa: ‘Kabathathe izinqola, bahambe bayethatha uyise lezimuli zabo beze ngapha. Ngizabapha umhlaba omuhle ukudlula yonke eGibhithe.’

Benza njalo. Uyambona yini uJosefa ehlangabeza uyise lapho ebuya eGibhithe lemuli yakhe yonke?

Imuli kaJakhobe yayisinkulu kakhulu. Ngesikhathi besiya eGibhithe babeyi-70, nxa kubalwa uJakhobe, abantwana bakhe labazukulu. Kodwa kwakulabafazi mhlawumbe lezinceku ezinengi futhi. Bonke bahlala eGibhithe. Kwakuthiwa ngama-Israyeli ngoba uNkulunkulu wayentshintshe ibizo likaJakhobe laba ngu-Israyeli. Ama-Israyeli aba ngabantu abaqakatheke kakhulu kuNkulunkulu njengoba sizabona phambili.