INkosi Embi Ibusa iGibhithe

AMADODA alapha enza ukuthi abantu basebenze ngenkani. Khangela indoda etshaya omunye wezisebenzi ngomchilo! Izisebenzi ngabemuli kaJakhobe njalo kuthiwa ngama-Israyeli. Labo ababenza basebenze ngenkani ngabeGibhithe. Ama-Israyeli aseyizigqili zabantu beGibhithe. Lokhu kwenzakala njani?

Imuli kaJakhobe enkulu yahlala kuhle eGibhithe okweminyaka eminengi. UJosefa, owayeyindoda eqakatheke kakhulu eyayilesikhundla esilandela esenkosi uFaro, wayebanakekela. Kodwa uJosefa wafa. UFaro omutsha, owayengawathandi ama-Israyeli, waba yinkosi yaseGibhithe.

Ngakho uFaro lo omubi wenza ukuthi ama-Israyeli abe yizigqili. Wafaka amadoda athile ukuthi akhangele ama-Israyeli. Amadoda la ayelenhliziyo ezimbi njalo ayelesihluku. Benza ukuthi ama-Israyeli asebenze ngenkani njalo babasebenzisa nzima ukuze kwakhelwe uFaro imizi. Kodwa ama-Israyeli aqhubeka esiba manengi. Ngemva kwesikhathi, abaseGibhithe baqalisa ukwesaba ukuthi ama-Israyeli ayezaba manengi kakhulu, njalo abelamandla ukudlula bona.

Uyakwazi ukuthi uFaro wenzani? Wakhuluma labesifazana ababebelethisa omama abangama-Israyeli wathi: ‘Kumele libulale wonke umntwana ongumfana ozalwayo.’ Kodwa laba babengabesifazana abalungileyo ngakho kabazange bababulale abantwana laba.

Ngakho uFaro walaya bonke abantu bakhe wathi: ‘Thathani bonke abantwana bama-Israyeli abangabafana libabulale. Kodwa abangamankazana lingababulali.’ Kwakungasiwo mlayo omubi yini lowo? Ake sibone ukuthi omunye umntwana ongumfana wasila njani.