Ukuchapha Ulwandle Olubomvu

KHANGELA ukuthi kwenzakalani! UMosi welulele induku yakhe phezu koLwandle oLubomvu. Abanye abantu abalaye njalo abakhanya bejabula ngama-Israyeli. Kodwa uFaro lebutho lakhe lonke bayagalula olwandle. Ake sibone ukuthi lokhu kwenzakala njani.

Njengoba sesifundile, uFaro watshela ama-Israyeli ukuthi aphume eGibhithe ngemva kohlupho lwesi-10 olwalethwa nguNkulunkulu kumaGibhithe. Kwasuka ama-Israyeli angaba ngu-600 000 ayegoqela amadoda, abafazi abanengi labantwana. Kwakulabanye abantu abanengi abacina bekholwa kuJehova. Abantu laba basuka lama-Israyeli. Bahamba lezimvu zabo zonke kanye lembuzi zabo lenkomo zabo.

Bengakasuki, ama-Israyeli acela amaGibhithe izigqoko, lezinto ezenziwe ngegolide lesiliva. AmaGibhithe ayesesaba kakhulu ngenxa yohlupho lokucina olwalubehlele. Ngakho anika ama-Israyeli konke ayekucela.

Ngemva kwamalanga amalutshwana, ama-Israyeli afika oLwandle oLubomvu. Baphumula khonapho. UFaro lamadoda akhe basala bezisola ukuthi bavumelani ukuthi ama-Israyeli ahambe. Bathi: ‘Sesekele izigqila zethu zahamba!’

Ngakho uFaro wantshintsha ingqondo yakhe futhi. Walungisa inqola yakhe yempi lebutho lakhe ngokuphangisa. Waseqalisa ukuxotshanisa ama-Israyeli ngezinqola eziqinileyo ezingu-600 kanye lezinye izinqola zaseGibhithe.

Ama-Israyeli esaba kakhulu lapho ebona uFaro lebutho lakhe bebalandela. Kwakungela lapho abangabalekela khona. ULwandle oLubomvu lwaluphambi kwabo, amaGibhithe esemuva kwabo. Kodwa uJehova wehlukanisa abantu bakhe lamaGibhithe ngokuletha iyezi. Lokhu kwenza amaGibhithe ehluleka ukubona ama-Israyeli njengoba babefuna ukuwahlasela.

UJehova wasetshela uMosi ukuthi elulele induku yakhe phezu koLwandle oLubomvu. Wathi esenze njalo, uJehova wenza kwaba lomoya wempumalanga olamandla. Amanzi olwandle ehlukaniswa aba ngapha langapha kwabo.

Ama-Israyeli asedlula-ke olwandle ehamba emhlabathini owomileyo. Kwathatha amahora amanengi ukuthi izigidi zabantu kanye lezinyamazana zabo zonke kuchaphe kuhle olwandle kuye kwelinye icele. AmaGibhithe acina esewabona ama-Israyeli futhi. Izigqila zabo zasezibaleka! Lokhu kwenza amaGibhithe angena olwandle ebagijimisa.

Bathi sebengenile, uNkulunkulu wenza amavili ezinqola zabo aphuma. AmaGibhithe esaba kakhulu aqalisa ukukhala esithi: ‘UJehova uyawalwela ama-Israyeli. Kasiphumeni lapha!’ Kodwa basebephuzile.

Kwakuyisikhathi lapho uJehova atshela uMosi ukuthi elulele induku yakhe phezu koLwandle oLubomvu njengoba ubonile emfanekisweni. Lapho uMosi esenze njalo, amanzi agcwala futhi olwandle, amaGibhithe agalula lezinqola zawo zacwila emanzini. Ibutho lonke lalilandele ama-Israyeli olwandle. Akula ngitsho loyedwa umGibhithe owasilayo!

Bonke abantu bakaNkulunkulu bajabula kakhulu ngokusinda kwabo! Amadoda ahlabela ingoma yokubonga uJehova esithi: ‘UJehova unqobile wathola udumo. Uphosele olwandle amabhiza labagadi bawo.’ Udadewabo kaMosi, uMiriyamu, wathatha isigubhu sakhe, bamlandela bonke abesifazana lezigubhu zabo. Babegida bethabile, behlabela ingoma eyayihlatshelwa ngamadoda besithi: ‘UJehova unqobile wathola udumo. Uphosele amabhiza labagadi bawo olwandle.’