Ukusindiswa kukaMosi Esesengumntwana

UYAMBONA yini umntwana omncane okhalayo, obambe umunwe wowesifazana? NguMosi lo. Uyakwazi yini ukuthi owesifazana lo omuhle ngubani? Uyinkosazana yaseGibhithe, indodakazi kaFaro.

Umama kaMosi wamfihla waze waba lenyanga ezintathu ngenxa yokuthi wayengafuni ukuthi abulawe ngamaGibhithe. Kodwa wayekwazi ukuthi uMosi babengamthola, yikho-ke nanku akhetha ukukwenza ukuze amsindise.

Wathatha ibhasikiti wayilungisa ukuze ingangeni amanzi. Wasefaka uMosi phakathi, wafaka ibhasikiti phakathi kwemihlanga eMfuleni uNayili. Udadewabo kaMosi okuthiwa nguMiriyamu watshelwa ukuthi ame eduze ukuze abone ukuthi kuyini okwakuzakwenzakala.

Ngesikhatshana kwabuya indodakazi kaFaro izogeza eMfuleni uNayili, yasibona ibhasikiti phakathi kwemizi. Yasibiza omunye wezincekukazi zayo yathi: ‘Hamba uyengithathela ibhasikiti leyana.’ Indodakazi kaFaro yathi ivula ibhasikiti yabona umntwana omuhle kakhulu! UMosi wayekhala, indodakazi kaFaro yamzwela. Yayingafuni ukuthi abulawe.

Kwasekubuya uMiriyamu. Uyambona yini emfanekisweni? UMiriyamu wabuza indodakazi kaFaro wathi: ‘Ngingayakudingela omunye wabesifazana ongumIsrayeli ukuze akumunyisele umntwana na?’

Indodakazi kaFaro yathi, ‘Yebo, hamba.’

Yikho-ke uMiriyamu wagijima masinyane wayatshela umama wakhe. Lapho umama kaMosi efika endodakazini kaFaro, indodakazi kaFaro yathi kuye: ‘Thatha umntwana lo ungimunyisele yena, ngizakubhadala.’

Yikho-ke umama kaMosi wazondlela umntanakhe. UMosi wathi esekhulile, umama wakhe wamthatha wamhambisa endodakazini kaFaro, owamgcina njengowakhe umntwana. Yikho okwenza uMosi wakhulela endlini kaFaro.