Okwenza uMosi Wabaleka

KHANGELA uMosi ebaleka eGibhithe. Uyababona yini abantu abamgijimisayo? Uyakwazi ukuthi kungani befuna ukumbulala? Ake sibone ukuthi kungani.

UMosi wakhulela endlini kaFaro, umbusi waseGibhithe. Waba yindoda ehlakaniphileyo njalo elamandla. UMosi wayekwazi ukuthi kaveli eGibhithe wayekwazi lokuthi abazali bakhe beqiniso babengama-Israyeli ayizigqili.

Ngelinye ilanga uMosi eseleminyaka engu-40, wakhetha ukuyabona ukuthi abantu bakibo babephila njani. Babethwele nzima. Wabona umGibhithe etshaya isigqili esingumIsrayeli. UMosi wathalaza ndawo zonke, wathi ebona kungela muntu, watshaya umGibhithe, umGibhithe wafa. UMosi wasefihla isidumbu sakhe etshebetshebeni.

Ngelanga elilandelayo uMosi waphuma esiya bona abantu bakibo. Wayecabanga ukuthi angabanceda ukuze bangabi yizigqili futhi. Kodwa wabona amadoda amabili angama-Israyeli esilwa, yikho-ke uMosi wasesithi kulowo owayephambanisile: ‘Kungani utshaya umfowenu?’

Indoda le yathi: ‘Ngubani osewakwenza waba ngumbusi lomahluleli wethu? Usucabanga ukungibulala na njengoba ubulele umGibhithe?’

UMosi waqalisa ukwesaba. Wayesekwazi ukuthi abantu basebezwile ukuthi wayemenzeni umGibhithe. UFaro laye wezwa ngakho wasethumela abantu ukuthi babulale uMosi. Yikho uMosi wabaleka eGibhithe.

Ekusukeni kwakhe eGibhithe, uMosi waya khatshana endaweni okuthiwa yiMidiyani. Elapho, wahlangana lemuli kaJethro wasethatha omunye wamadodakazi akhe okuthiwa nguZiphora. UMosi waba ngumalusi wasenakekela izimvu zikaJethro. Wahlala eMidiyani okweminyaka engu-40 waze waba leminyaka engu-80. Kwathi ngelinye ilanga uMosi eselusa izimvu zikaJethro kwenzakala into emangalisayo eyantshintsha ukuphila kukaMosi konke. Vula ikhasi elilandelayo, sibone ukuthi kuyini okumangalisayo okwenzakalayo.