Isihlahla Esivutha Umlilo

UMOSI wayehambe waze wayafika entabeni yaseHorebhi ukuze adingele izimvu zakhe utshani. Elapho, wabona isihlahla esasivutha umlilo kodwa sona singatshi!

Ecabanga, uMosi wathi, ‘Yisimanga lesi, ngizasondela ngibone kuhle.’ Wathi esesondele kwavela ilizwi esihlahleni, lathi: ‘Ungasondeli. Khupha amanyathela akho, ngoba indawo omi kuyo ingumhlabathi ongcwele.’ KwakunguNkulunkulu owayekhuluma esebenzisa ingilosi, yikho uMosi wavala ubuso bakhe.

UNkulunkulu wasesithi: ‘Ngikubonile ukuhlupheka kwabantu bami eGibhithe. Yikho ngizabakhulula njalo nguwe engikuthuma ukuthi ukhokhele abantu bami ubakhuphe eGibhithe.’ UJehova wayezaletha abantu bakhe elizweni elihle elaseKhenani.

Kodwa uMosi wathi: ‘Kambe ngingubani. Ngingakwenza njani lokhu? Ake sithi ngihambe. Ama-Israyeli angathi kimi, “Ngubani okuthumileyo?” Ngizakuthini kubo?’

UNkulunkulu wamphendula wathi, ‘Nanku ozakutsho, “UJEHOVA uNkulunkulu ka-Abhrahama, uNkulunkulu ka-Isaka loNkulunkulu kaJakhobe ungithumile kini.”’ UJehova wasesithi: ‘Leli libizo lami laphakade.’

UMosi waphendula wathi: ‘Pho bangayekela ukungikholwa nxa ngisithi ngithunywe nguwe.’

UNkulunkulu wasembuza: ‘Kuyini lokho okusesandleni sakho?’

UMosi waphendula wathi: ‘Yinduku.’

UNkulunkulu wasesithi: ‘Iphosele phansi.’ UMosi esekwenzile lokho, induku yantshintsha yaba yinyoka. UJehova wasetshengisa uMosi esinye isimanga. Wathi: ‘Faka isandla sakho phakathi kwesigqoko sakho.’ UMosi wenza njalo, wathi esekhupha isandla sakhe sasesimhlophe njengongqwaqwane! Isandla sakhe sasingani silomkhuhlane omubi okuthiwa yibulephero. UJehova wasenika uMosi amandla okwenza isimanga sesithathu. Wasesithi: ‘Ungenza izimangaliso lezi, ama-Israyeli azakholwa ukuthi ngikuthumile.’

Sekwenzakele lokhu, uMosi wabuyela endlini wathi kuJethro: ‘Bengicela ukubuyela ebantwini bakithi eGibhithe ukuthi ngiyebona kumbe balokhu besaphilile.’ Yikho-ke, uJethro wamvalelisa uMosi, uMosi wangena indlela wabuyela eGibhithe.