UJehova Unika Imithetho Yakhe

AMA-ISRAYELI aya eNtabeni yeSinayi ebizwa langokuthi yiHorebhi ngemva kwezinyanga ezingaba mbili esuke eGibhithe. ENtabeni yeSinayi kulapho uJehova akhuluma loMosi esihlahleni esasibhebha. Abantu bahlala lapha okwesikhathi esifitshane.

UMosi ukhwela intaba, abantu basala bemlindile phansi. Entabeni leyo, uJehova utshela uMosi ukuthi ufuna ama-Israyeli amlalele ukuze babe ngabantu bakhe abaqakatheke kakhulu kuye. UMosi uyayehla abesetshela ama-Israyeli ukuthi uJehova utheni. Ama-Israyeli athi afuna ukulalela uJehova ngoba afuna ukuba ngabantu bakhe.

Khathesi uJehova wenza into emangalisayo. Wenza ukuthi kuphume intuthu entabeni njalo wenza kube lomsindo omkhulu. Utshela abantu ukuthi: ‘NginguJehova uNkulunkulu wenu owalikhupha eGibhithe. Akumelanga likhonze abanye onkulunkulu ngaphandle kwami.’

UNkulunkulu unika ama-Israyeli eminye imithetho engu-9. Abantu sebesesaba kakhulu. Batshela uMosi: ‘Wena khuluma lathi ngoba siyesaba ukuthi nxa uNkulunkulu engakhuluma lathi singafa.’

Ngemva kwalokho, uJehova utshela uMosi ukuthi: ‘Khwela ubuye kimi entabeni. Ngizakunika amatshe amabili engibhalele kuwo imithetho engifuna abantu bayilalele.’ UMosi uyabuyela entabeni. Uhlala khona okwamalanga angu-40 lobusuku obungu-⁠40.

UNkulunkulu ulemithetho eminengi yabantu bakhe. UMosi uyibhala phansi imithetho le. UNkulunkulu unika uMosi amatshe amabili. Ematsheni la, uNkulunkulu ubhale imithetho engu-10 ayeyitshele abantu bonke. Ibizwa ngokuthi Imilayo Elitshumi.

Imilayo Elitshumi iyimithetho eqakathekileyo. Eminye imithetho eminengi uNkulunkulu ayinika ama-Israyeli layo iqakathekile. Omunye wakhona uthi: ‘Kumele uthande uJehova uNkulunkulu wakho ngenhliziyo yakho yonke, ngengqondo yakho yonke, ngomphefumulo wakho wonke langamandla akho wonke.’ Omunye uthi: ‘Kumele uthande umakhelwana wakho njengalokhu uzithanda wena.’ INdodana kaNkulunkulu, uJesu Khristu, yathi imithetho le emibili mikhulu kulayo yonke uJehova ayinika abantu bakhe, ama-Israyeli. Sizafunda okunengi ngeNdodana kaNkulunkulu lezimfundiso zayo phambili.