Ithole Legolide

BAKITHI! Kanti abantu sebesenzani khathesi? Bakhulekela ithole! Kungani besenza njalo?

UMosi uhlala entabeni okwesikhathi eside. Abantu bacina besithi: ‘Asikwazi osekwenzakale kuMosi. Kasizenzeleni unkulunkulu ozasikhokhela siphume elizweni leli.’

Umnewabo kaMosi u-Aroni uthi: ‘Kulungile. Khiphani amacici enu awegolide liwabise kimi.’ Abantu bayawaletha, u-Aroni abesewancibilikisa enze ithole legolide. Abantu besebesithi: ‘Lo nguNkulunkulu wethu owasikhipha eGibhithe!’ Ama-Israyeli enza idili elikhulu abesekhonza ithole legolide.

UJehova uyakubona lokhu, abesezonda kakhulu. Uthi kuMosi: ‘Phangisa wehle entabeni. Abantu benza into embi kakhulu. Sebeyikhohliwe imithetho yami njalo bakhonza ithole legolide.’

UMosi uyehla entabeni ngokuphangisa. Esefikile phansi, ubona abantu behlabela njalo begidela ithole legolide! UMosi uzonda kakhulu abesejikela phansi amatshe amabili alemithetho. Amatshe la ayaqamuka abe yizicucu. Uthatha ithole legolide alincibilikise, abeselichola libe njengempuphu.

Abantu benze into embi kakhulu. Ngakho uMosi utshela amanye amadoda ukuthi athathe ingqamu zawo ezinkulu. UMosi uthi: ‘Abantu ababi abakhonze ithole legolide kumele bafe.’ Amadoda la abulala abantu abangu-3 000! Lokhu kutshengisa ukuthi kumele sikhonze uJehova kuphela hatshi onkulunkulu bamanga.