Inyoka Yethusi

UBONA angani inyoka ezigoqele esigodweni ngeyeqiniso yini? Kayisiyo yeqiniso. Inyoka le yenziwe ngethusi. UJehova watshela uMosi ukuthi ayifake esigodweni ukuze abantu bayikhangele baqhubeke bephila. Kodwa ezinye inyoka eziphansi ngezeqiniso. Sezilume abantu zabenza bagula. Uyakwazi yini ukuthi kungani zibalumile?

Kungenxa yokuthi abako-Israyeli bakhulume kubi besola uNkulunkulu loMosi. Bakhonona besithi: ‘Lasikhuphelani eGibhithe ukuze sizofela egangeni leli? Lapha akulakudla njalo akulamanzi. Sesidiniwe ngemana le.’

Kodwa imana yikudla okuhle. UJehova ubanike yona ngesimangaliso. Njalo ubanike lamanzi ngesimangaliso. Kodwa abantu kababongi ukuthi uJehova ubagcinile ngalindlela. Yikho uJehova uthuma inyoka lezi ezilephoyizeni ukuze ajezise ama-Israyeli. Inyoka lezi ziyabaluma njalo abanengi babo bayafa.

Abantu bacina sebebuya kuMosi besithi: ‘Sonile ngokukhuluma kubi ngawe langoJehova. Akukhuleke kuJehova ukuthi asuse izinyoka lezi.’

Ngakho uMosi uyabathandazela abantu. UJehova abesetshela uMosi ukuthi enze inyoka le eyethusi. Uthi kayifake esigodweni besekusithi loba ngubani olunyiweyo ayikhangele. UMosi wenza khona lokhu okutshiwo nguNkulunkulu. Abantu ababelunyiwe bayayikhangela inyoka yethusi basile.

Kulesifundo esingasifunda lapha. Ngenye indlela sonke sinjengama-Israyeli alunywa zinyoka leziyana. Sonke siyafa. Khangela yonke indawo, uzabona ukuthi abantu bayaguga, bagule njalo bayafa. Lokhu kungenxa yokuthi indoda lomfazi wokuqala, u-Adamu lo-Eva, bayekela ukulalela uJehova, njalo thina sonke singabantwana babo. Kodwa uJehova wenze indlela yokuthi siphile kuze kube phakade.

UJehova wathuma indodana yakhe, uJesu Khristu emhlabeni. UJesu walengiswa esigodweni ngenxa yokuthi abantu abanengi babecabanga ukuthi ungumuntu omubi. Kodwa uJehova wathuma uJesu ukuze asisindise. Sizathola ukuphila okungapheliyo nxa singakhangela kuye njalo simlandele. Kodwa sizafunda okunengi ngalokhu.