Imiduli yeJerikho

KUYINI okwenza imiduli le iwe? Kukhanya angani idutshukelwe libhomba elikhulu. Kodwa ngalezo zinsuku babengela mabhomba; babengela ngitsho yona imibhobho. Ngesinye isimangaliso sikaJehova esenze yawa! Ake sibone ukuthi kwenzakala njani lokhu.

Lalela ukuthi uJehova utshelani uJoshuwa: ‘Wena lamadoda ayakulwa kumele libhode idolobho. Lilibhode kanye ngosuku okwezinsuku eziyisithupha lithwele ibhokisi lesivumelwano. Abaphristi abayisikhombisa kumele bahambe phambi kwalo bevuthela impondo zabo.’

‘Ngosuku lwesikhombisa kumele libhode idolobho kasikhombisa. Beselivuthela impondo kakhulu, njalo wonke umuntu kumele amemeze kakhulu. Imiduli izakuwa di phansi!’

UJoshuwa labantu benza lokhu uJehova akutshoyo. Lapho bebhoda idolobho, wonke umuntu uthule uthe zwi. Akulamuntu okhulumayo. Okuzwakalayo ngumsindo wempondo lokunyathela kwabantu ababhodayo. Izitha zabantu bakaNkulunkulu eziseJerikho kumele ukuthi zesaba. Uyayibona yini intambo elenge ewindini? Liwindi likabani leli? Ye, uRahabi wenzile lokho ayekutshelwe ukuthi akwenze ngamadoda ayezohlola. Yena lezihlobo zakhe zonke baphakathi njalo babukele okwenzakalayo.

Ekucineni, ngosuku lwesikhombisa sebebhode idolobho kasikhombisa, impondo ziyakhala, amadoda wokulwa ayamemeza kakhulu, imiduli iwe. UJoshuwa abesesithi: ‘Bulalani wonke umuntu osedolobheni njalo lilitshise. Litshise konke. Lithathe isiliva, legolide, lethusi, lensimbi, likulethe esiphaleni sikaJehova senotho.’

UJoshuwa uthi ezinhlolini ezimbili: ‘Yanini endlini kaRahabi, liyemkhupha yena lezihlobo zakhe zonke.’ URahabi lezihlobo zakhe bayasindiswa, njengoba izinhloli zazimthembisile.