INDABA 45
Ukuchapha Umfula UJodani
KHANGELA! ama-Israyeli achapha umfula uJodani! Kodwa angaphi amanzi? Ngenxa yokuthi izulu liyana kakhulu ngesikhathi leso somnyaka, umfula ubugcwele kakhulu imizuzu emilutshwana edlulileyo. Kodwa khathesi kakusela manzi! Ama-Israyeli achapha enhlabathini ewomileyo njengoba enza oLwandle Olubomvu! Ayengaphi wonke amanzi? Ake sibone.
Lapho sifika isikhathi sokuthi ama-Israyeli achaphe uMfula uJodani, uJehova utshela uJoshuwa ukuthi athi ebantwini: ‘Abaphristi kumele bathathe ibhokisi lesivumelwano bahambe phambi kwethu. Bengafaka inyawo zabo emanzini woMfula uJodani, amanzi azakuma ukugeleza.’
Ngakho abaphristi bathatha ibhokisi lesivumelwano, besebelithwala bekhokhela abantu. Lapho befika eJodani, abaphristi bangena emanzini. Amanzi ayatshona kakhulu njalo ageleza ngamandla amakhulu. Kodwa lapho nje inyawo zabo zithinta amanzi, amanzi aqalisa ukuma ukugeleza! Yisimangaliso! UJehova umise amanzi avelela ngaphezulu komfula. Masinyane akusela manzi emfuleni!
Abaphristi abathwele ibhokisi lesivumelwano bangena bayekuma phakathi laphakathi komfula owomileyo. Uyababona yini emfanekisweni? Wonke ama-Israyeli achapha uMfula uJodani enhlabathini ewomileyo, abaphristi belokhu bemile phakathi laphakathi komfula!
Lapho bonke abantu sebechaphile, uJehova utshela uJoshuwa ukuthi atshele amadoda angu-12 aqinileyo ukuthi: ‘Ngenani emfuleni liye lapho abaphristi abame khona lebhokisi lesivumelwano. Thathani amatshe angu-12, liwathwale liyewabeka endaweni elizalala kiyo lamuhla ebusuku. Esikhathini esizayo, nxa abantwana benu bangalibuza ukuthi amatshe la atshoni, kumele libatshele ukuthi amanzi ama ukugeleza lapho ibhokisi likaJehova lesivumelwano lichapha uJodani. Amatshe la azalikhumbuza ngesimangaliso lesi!’ UJoshuwa ubeka amanye amatshe angu-12 lapho okukade kumi khona abaphristi phakathi laphakathi komfula.
Ekucineni, uJoshuwa utshela abaphristi abathwele ibhokisi lesivumelwano: ‘Phumani phakathi kweJodani.’ Besanda nje kuphuma, amanzi ayaqalisa futhi ukugeleza.