INDABA 56
USawuli—iNkosi yama-Israyeli Yakuqala
UYAMBONA yini uSamuyeli ethela amafutha ekhanda lendoda le? Yikho ababejayele ukukwenza kudala ukuze batshengise ukuthi umuntu usekhethwe ukuba yinkosi. UJehova utshela uSamuyeli ukuthi athele amafutha ekhanda likaSawuli. Ngamafutha anuka kamnandi.
USawuli wayengacabangeli ukuthi angaba yinkosi enhle. Utshela uSamuyeli ukuthi: ‘Mina ngingowesizwana sakoBenjamini, esiyiso esincane kulazo zonke ko-Israyeli. Kungani usithi ngizakuba yinkosi?’ UJehova uyamthanda uSawuli ngoba kazenzi muntu oqakatheke kakhulu kumbe omkhulu. Yikho uJehova emkhetha ukuthi abe yinkosi.
Kodwa uSawuli kayisuye myanga kumbe umuntu ongatsho lutho. Ngakibo banothile njalo uyindoda ebukeka kuhle, ende. Mude ukudlula wonke umuntu ko-Israyeli! USawuli ngumuntu okwazi ukugijima ngesiqubu, njalo uyindoda elamandla amakhulu. Abantu bathabile ngoba uJehova ukhethe uSawuli ukuthi abe yinkosi. Basuka bamemeze besithi: ‘Impilo ende enkosini!’
Izitha zama-Israyeli ziqhubeka zisiba lamandla amakhulu. Ziyawahlupha ama-Israyeli. Ama-Amoni abuya ukuzokulwa lawo ngemva nje kokuba uSawuli esenziwe inkosi. Kodwa uSawuli ubuthanisa ibutho elikhulu abesewanqoba ama-Amoni. Lokhu kwenza abantu bathabe ukuthi uSawuli useyinkosi.
Kudlula iminyaka eminengi uSawuli ekhokhela ama-Israyeli njalo enqoba izitha zawo. USawuli ulendodana elesibindi ethiwa nguJonathani. UJonathani uncedisa ama-Israyeli ukuthi anqobe izimpi ezinengi. AmaFilisti alokhe eyizitha zama-Israyeli ezinkulu. Ngelinye ilanga kubuya amaFilisti amanengi kakhulu ezokulwa lama-Israyeli.
USamuyeli utshela uSawuli ukuthi ammelele aze abuye azonikela umhlatshelo kumbe isipho kuJehova. Kodwa uSamuyeli uyaphuza ukubuya. USawuli uyesaba ukuthi amaFilisti azaqalisa impi, ngakho usuka anikele umhlatshelo yena ngokwakhe. USamuyeli uyafika abesetshela uSawuli ukuthi kalalelanga. Umtshela ukuthi: ‘UJehova uzakhetha omunye umuntu ukuthi abe yinkosi yama-Israyeli.’
Ngemva kwesikhathi, uSawuli uyaphinda ukungalaleli. Ngakho uSamuyeli umtshela ukuthi: ‘Ukulalela kungcono kulokunikela ngesipho semvu enhle kulazo zonke kuJehova. UJehova kasoze akuvumele ukuthi uqhubeke uyinkosi yama-Israyeli ngoba awumlalelanga.’
Singafunda isifundo esiqakathekileyo kulokhu. Sifunda ukuthi kuqakathekile ukulalela uJehova zikhathi zonke. Sifunda lokuthi umuntu olungileyo angantshintsha abe ngumuntu omubi njengoba kwenza uSawuli. Thina kasifuni ukuba ngabantu ababi.