UJesu Uyaphila

UYAMAZI yini owesifazana lo lamadoda la amabili asemfanekisweni? Ibizo lowesifazana lo nguMariya Magadalena, umngane kaJesu. Amadoda agqoke ezimhlophe yizingilosi. Okuyindlu lokho okuncane lapho uMariya alunguze khona yikho lapho okwafakwa khona isidumbu sikaJesu esefile. Kubizwa kuthiwa lithuna. Kodwa khathesi isidumbu sikaJesu kasisekho! Ngubani osithetheyo? Ake sibone.

UJesu esefile abaphristi batshela uPhilathu ukuthi: ‘UJesu esaphila wathi yena uzavuswa ngemva kwamalanga amathathu. Ngakho yenza ukuthi ithuna lilindwe. Lingalindwa, abafundi bakhe kabasoze bantshontshe isidumbu sakhe besebesithi uvusiwe kwabafileyo!’ UPhilathu utshela abaphristi ukuthi bathume amasotsha ayelinda ithuna.

Kodwa ekuseni, ngosuku lwesithathu uJesu efile, ingilosi kaJehova iyabuya. Ikhipha ilitshe elivale ithuna. Amasotsha ayesaba kakhulu aze ehluleke lokuhamba. Ekucineni akhangela phakathi kwethuna abesebona ukuthi isidumbu kasisekho! Amanye amasotsha angena edolobheni abesetshela abaphristi. Uyakwazi yini ukuthi abaphristi laba ababi benzani? Babhadala amasotsha ukuthi aqambe amanga. Abaphristi batshela amasotsha ukuthi: ‘Lithi abafundi bakhe babuye ebusuku thina sisalele basebentshontsha isidumbu.’

Lokhu kusenzakala, abanye abangane bakaJesu abesifazana bahamba ethuneni. Bamangala kakhulu nxa bebona ithuna lingalalutho! Besamangele, kufika izingilosi ezimbili ezigqoke izigqoko ezicazimulayo. Ziyababuza: ‘Kungani lidinga uJesu lapha. Usevusiwe. Hambani masinyane liyetshela abafundi bakhe.’ Abesifazana bagijima ngesiqubu! Kodwa bamiswa ngenye indoda endleleni. Uyakwazi ukuthi ingubani? NguJesu! Uthi: ‘Hambani liyetshela abafundi bami.’

Abafundi bakuthola kunzima ukuthi bakholwe abakutshelwa ngabesifazana ukuthi uJesu uyaphila njalo bambonile. UPhethro loJohane bagijimela ethuneni ukuze bayebona kodwa bafika babone ithuna lingelalutho! UPhethro loJohane bayasuka kodwa uMariya uyasala. Usala elunguza ethuneni abesebona izingilosi ezimbili.

Uyakwazi yini ukuthi isidumbu sikaJesu siyengaphi? UNkulunkulu wenze sanyamalala. UNkulunkulu kazange avuse uJesu elomzimba wenyama ayelawo engakafi. Wanika uJesu umzimba womoya onjengowezingilosi ezisezulwini. Kodwa uJesu uba lomzimba abantu abangawubona ukuze atshengise abafundi bakhe ukuthi uyaphila. Sizafunda ngokuthi kwenzakala njani lokhu.