Ungena Endlini Ekhiyiweyo

UPHETHRO loJohane bayasuka ethuneni ebelilesidumbu sikaJesu, kodwa uMariya usala yedwa khonapho. Uqalisa ukukhala, abeselunguza ethuneni njengoba sibonile emfanekisweni odlulileyo. Ubona izingilosi ezimbili! Ziyambuza: ‘Ukhalelani?’

UMariya uyaphendula: ‘Bathethe iNkosi yami. Angikwazi ukuthi bayibeke ngaphi.’ UMariya uyatshibilika abesebona indoda. Indoda le iyambuza: ‘Udinga bani?’

UMariya ucabanga ukuthi indoda le ingumphathi wensimu ongabe ethethe isidumbu sikaJesu. Ngakho uthi: ‘Nxa umthethe ngitshela ukuthi umbeke ngaphi.’ Kodwa indoda le yiyo kanye uJesu. Uselomzimba uMariya angawaziyo. Kodwa esembize ngebizo, uMariya uyananzelela ukuthi nguJesu. UMariya uyagijima abesetshela abafundi ukuthi: ‘Sengiyibonile iNkosi!’

Ngalelolanga, abafundi ababili baya emzini wase-Emawusi, besebezibona sebehamba lenye indoda. Abafundi laba badanile ngoba uJesu ubulewe. Kodwa njengoba behamba, indoda le ibachasisela izinto ezinengi eziseBhayibhilini baze bazwe ngcono. Ekucineni, abafundi bayaphumula ukuze badle, besebebona ukuthi indoda le nguJesu. UJesu uyanyamalala, abafundi laba babuyela eJerusalema ngokuphangisa. Bafika batshele abaphostoli ngaye.

Kusenzakala lokhu, uJesu ubonakala lakuPhethro. Abanye bayathaba nxa besizwa lokhu. Abafundi ababili bahamba eJerusalema babathole abaphostoli. Babatshela ukuthi uJesu ubonakale njani kubo besemgwaqweni. Besakhuluma ngakho, kwenzakala into emangalisa kakhulu. Uyayazi yini?

Khangela emfanekisweni. UJesu uyangena endlini abakiyo lanxa umnyango ukhiyiwe. Abafundi bayathaba kakhulu! Lilanga lokuthaba sibili. Uyakwazi yini ukuthi khathesi uJesu usebonakale kangaki kubalandeli bakhe? Ungabala uzathola ukuthi usebonakale izikhathi ezinhlanu.

UJesu ufika umphostoli uTomasi engekho. Ngakho abafundi bamtshela ukuthi: ‘Sibone iNkosi!’ Kodwa uTomasi uthi kumele aqale ambone uJesu, yikho ukuthi akholwe. Ngemva kwamalanga angu-8 abafundi bayahlangana futhi endlini ekhiyiweyo. Khathesi uTomasi laye ukhona. Besahlezi, uJesu uyafika endlini leyo. Lokhu kwenza uTomasi akholwe.