UPhethro Uvakatshela uKhoneliya

OME laphayana ngumphostoli uPhethro njalo abame ngemuva kwakhe ngabangane bakhe. Kodwa kungani indoda leyana ikhothamela uPhethro? Kumele yini ikwenze lokho? Uyakwazi ukuthi ngubani?

NguKhoneliya. UKhoneliya ungumlawuli webutho laseRoma. UKhoneliya kamazi uPhethro kodwa wayetshelwe ukuthi ammeme endlini yakhe. Ake sibone ukuthi lokhu kwenzakala njani.

Abalandeli bakaJesu bakuqala babengamaJuda. UKhoneliya yena akasuye umJuda, kodwa uyamthanda uNkulunkulu, ukhuleka kuye njalo wenzela abantu izinto ezinengi ezinhle. Ngelinye ilanga ingilosi ibonakala kuye ibisisithi: ‘UNkulunkulu uyathokoza ngawe, uzaphendula imithandazo yakho. Thuma amadoda ukuthi ayebiza indoda ethile okuthiwa nguPhethro. Uhlala eJopha endlini kaSimoni ohlala eduze lolwandle.’

UKhoneliya uhle athume amadoda athile ukuthi ayebiza uPhethro. Lapho amadoda la efika eduze kweJopha ngelanga elilandelayo, uPhethro usephahleni lwendlu kaSimoni. UPhethro elapho, uNkulunkulu umenza acabange ukuthi ubona ilembu elikhulu lisehla livela ezulwini. Elenjini lelo kulemihlobo yonke yezinyamazana. Ngokomthetho kaNkulunkulu, izinyamazana lezi zazingahlanzekanga kodwa kulelizwi elithi: ‘Sukuma Phethro, bulala udle.’

UPhethro uphendula esithi: ‘Hatshi! Kangikaze ngidle into engcolileyo.’ Kodwa ilizwi lithi kuPhethro: ‘Yekela ukubiza lokho uNkulunkulu athi kuhlanzekile ngokuthi kungcolile.’ Lokhu kwenzeka kathathu. UPhethro esamangele ukuthi konke lokhu kutshoni, amadoda athunywe nguKhoneliya afika endlini kaSimoni abesecela ukubona uPhethro.

UPhethro wehla aye phansi athi: ‘Yimi elimdingayo. Lilandeni?’ Lapho amadoda la echasisa ukuthi ingilosi itshele uKhoneliya ukuthi ameme uPhethro endlini yakhe, uPhethro uyavuma ukuhamba lawo. Ngelanga elilandelayo uPhethro labangane bakhe basuka besiyavakatshela uKhoneliya eKhesariya.

UKhoneliya ubize izihlobo zakhe labangane bakhe. UPhethro esefikile, uKhoneliya uyamhlangabeza. Uguqa enyaweni zikaPhethro njengoba ubona lapha. Kodwa uPhethro uthi: ‘Sukuma ngoba lami ngingumuntu nje.’ Yebo, iBhayibhili litshengisa ukuthi akulunganga ukukhothamela umuntu kumbe ukumkhonza. Kumele sikhonze uJehova kuphela.

UPhethro khathesi utshumayeza labo ababutheneyo. UPhethro uthi: ‘Ngiyabona ukuthi uNkulunkulu wamukela wonke umuntu ofuna ukumkhonza.’ Esakhuluma, uNkulunkulu uthuma umoya wakhe ongcwele. Bonke abantu abasendlini baqalisa ukukhuluma ngezindimi ezitshiyeneyo. Lokhu kumangalisa abafundi abangamaJuda ababuye loPhethro ngoba bebecabanga ukuthi uNkulunkulu uthanda amaJuda kuphela. Kubafundisa ukuthi kuNkulunkulu kakula mhlobo ongcono kumbe oqakatheke ukudlula omunye. Lokhu yinto enhle okumele sonke siyikhumbule.