UKhoneliya Wamukela Umoya Ongcwele

EKhesariya kwakulendoda eyayingumkhokheli wamasotsha okwakuthiwa nguKhoneliya. AmaJuda ayemhlonipha lanxa yena wayengayisuye umJuda. Wayenceda abaswelayo labahluphekayo. UKhoneliya wayekholwa kuJehova futhi ehlala ekhuleka kuye. Ngelinye ilanga uKhoneliya wabona ingilosi yasisithi kuye: ‘UNkulunkulu useyizwile imithandazo yakho. Ngakho thuma amadoda ayebiza uPhetro edolobheni leJopha.’ UKhoneliya wahle wathuma amadoda amathathu. Umango wakhona wawungamakhilomitha angaba ngu-50.

Kusenzakala konke lokhu, uPhetro waba lombono. Wabona izinyamazana okwakungamelanga zidliwe ngamaJuda futhi wezwa ilizwi lisithi azidle. UPhetro wayala esithi: ‘Kangikaze ngidle lutho olungahlanzekanga.’ Ilizwi laselimtshela lathi: ‘Akumelanga uthi izinyamazana lezi zingcolile. UNkulunkulu usezihlambulule.’ UPhetro watshelwa lokuthi: ‘Kulamadoda amathathu akudingayo. Ungesabi ukuhamba lawo.’ UPhetro waya emnyango wabuza amadoda lawo ukuthi alandeni. Aphendula athi: ‘Sithunywe nguKhoneliya, umkhokheli wamasotsha ongumRoma. Uthe ubuye emzini wakhe eKhesariya.’ UPhetro wathi amadoda lawo alale endlini yakhe. Ngelanga elilandelayo wahamba lawo eKhesariya futhi abanye abazalwane beJopha bahamba laye.

UKhoneliya wathi ebona uPhetro wahle waguqa. Kodwa uPhetro wathi: ‘Sukuma. Ngingumuntu njengawe. UNkulunkulu uthe ngize emzini wakho lanxa amaJuda engangeni emizini yabezizwe. Ngicela ungitshele ukuthi ungibizeleni.’

UKhoneliya watshela uPhetro wathi: ‘Ngithe ngikhuleka ezinsukwini ezine ezidlulileyo, ingilosi yathi ngithume abantu bazokubiza. Sicela usitshele amazwi avela kuJehova.’ UPhetro wathi: ‘Sengikwazi ukuthi uNkulunkulu kakhethi. Wamukela loba ngubani ofuna ukumkhonza.’ UPhetro wasebafundisa izinto ezinengi ngoJesu. Umoya ongcwele wehlela kuKhoneliya lakulabo ababelaye futhi bonke babhabhathizwa.