Singakuthola Njani Ukuphila Okungapheliyo

INKAZANA le encane labangane bayo babalani? Ye, babala lona kanye ibhuku olibalayo elithi IBhuku Lami Lezindaba zeBhayibhili. Babala indaba oyibalayo ethi, “Singakuthola Njani Ukuphila Okungapheliyo.”

Uyakwazi ukuthi bafundani? Okwakuqala, bafunda ukuthi kumele sazi uJehova leNdodana yakhe uJesu nxa sifuna ukuphila okungapheliyo. IBhayibhili lithi: ‘Le yindlela yokuphila okungapheliyo, ukufunda ngoNkulunkulu onguye yedwa oweqiniso leNdodana yakhe ayithuma emhlabeni uJesu Khristu.’

Singafunda njani ngoJehova uNkulunkulu leNdodana yakhe uJesu? Okunye esingakwenza yikubala ibhuku elithi IBhuku Lami Lezindaba zeBhayibhili kusukela ekuqaliseni kuze kufike ekucineni. Lisitshela okunengi ngoJehova loJesu. Lisitshela lokunengi abakwenzayo labazakwenza esikhathini esizayo. Kodwa kulokunye okumele sikwenze ngaphandle kokubala ibhuku leli.

Uyalibona yini elinye ibhuku eliphansi? LiBhayibhili. Cela omunye umuntu ukuthi akubalele amavesi eBhayibhili asekucineni kwezindaba ezisebhukwini lapho okuthethwe khona izindaba lezi. IBhayibhili lisinika ulwazi lonke esilufunayo ukuze sonke sikhonze uJehova ngendlela eqondileyo njalo sizuze ukuphila okungapheliyo. Ngakho kumele sijayele ukufunda iBhayibhili zikhathi zonke.

Kodwa ukufunda ngoJehova uNkulunkulu loJesu Khristu akusikho kodwa okumele sikwenze. Singenelisa ukwazi okunengi kakhulu ngabo labakufundisayo kodwa singatholi ukuphila okungapheliyo. Uyakwazi yini ukuthi kuyini okunye okufunekayo?

Kumele siphile ngendlela etshengisa ukuthi siyakulandela lokho esikufundayo. Usamkhumbula uJudasi Isikariyothi? Wayengomunye wabaphostoli bakaJesu abangu-12 ayebakhethile. UJudasi wayekwazi okunengi kakhulu ngoJehova loJesu. Kodwa kwenzakalani kuye? Ngemva kwesikhathi waba lobuhwaba wasethengisa uJesu ezitheni zakhe ngezinhlamvu zesiliva ezingu-30. Ngakho uJudasi kasoze athole ukuphila okungapheliyo.

Usamkhumbula yini uGehazi, indoda esafunda ngayo eNdabeni 69? Wayefuna izigqoko lemali okwakungasikho kwakhe. Ngakho waqamba amanga ukuze athole izinto lezi. Kodwa uJehova wamjezisa. Lathi singayekela ukulalela imithetho yakhe uJehova uzasijezisa.

Kodwa kulabantu abanengi abalungileyo ababekhonza uJehova ngokuthembeka zikhathi zonke. Lathi kumele sifise ukuba njengabo. Omunye wabo okumele simlingisele owayenza kuhle nguSamuyeli omncane. Khumbula ukuthi eNdabeni 55, waqalisa ukukhonza uJehova ethabanikeli lakhe eleminyaka engaba mine loba emihlanu. Ngakho ungakhonza uJehova lanxa umncane kakhulu.

Kodwa sonke sifuna ukulandela uJesu Khristu. ENdabeni 87, siyakubona ukuthi lanxa wayesesengumfana omncane, wahamba ethempelini ekhuluma labanye ngoBaba wakhe osezulwini. Kumele simlingisele. Kasitsheleni abantu bonke ngoNkulunkulu wethu omuhle uJehova kanye leNdodana yakhe uJesu Khristu. Singenza zonke lezi zinto, sizaphila kuze kube nini lanini epharadayisi likaNkulunkulu elitsha emhlabeni.