Ziyini Izindaba Ezinhle Ezimayelana Lenkolo?

1. Amasonto onke alungile yini?

Kulabantu abathanda uNkulunkulu ngenhliziyo yonke kuzo zonke inkolo. Kuyizindaba ezinhle ukuthi uNkulunkulu uyababona abantu labo njalo ulendaba labo. Kodwa okuzwisa ubuhlungu yikuthi amasonto asetshenziswa ukwenza izinto ezimbi. (2 Khorinte 4:3, 4; 11:13-15) Izindaba zibika ukuthi amanye amasonto asekela udlakela, ukuqothulwa komhlobo othile wabantu, izimpi kanye lokuhlukuluzwa kwabantwana. Lokhu kuyabadanisa kakhulu abantu abakholwa kuNkulunkulu ngenhliziyo yonke.​—Bala uMathewu 24:3-5, 11, 12.

Inkolo yeqiniso idumisa uNkulunkulu kodwa inkolo yamanga ayimjabulisi. Ifundisa izinto ezingekho eBhayibhilini, ezigoqela izimfundiso zamanga ngoNkulunkulu langabantu abafileyo. Kodwa uJehova ufuna abantu babelazi iqiniso ngaye.​—Bala uHezekheli 18:4; u-1 Thimothi 2:3-5.

2. Ziyini izindaba ezinhle ezimayelana lenkolo?

Kuyathokozisa ukuthi uNkulunkulu kakhohliswa ngamasonto azithi ayamthanda kodwa wona ethanda umhlaba kaSathane. (Jakhobe 4:4) ILizwi likaNkulunkulu lichaza yonke inkolo yamanga ‘njengeBhabhiloni Enkulu.’ IBhabhiloni kwakulidolobho lasendulo lapho okwaqalisa khona inkolo yamanga ngemva kukaZamcolo wensuku zikaNowa. Sekuseduze ukuthi uNkulunkulu aqede loba yiphi inkolo ekhohlisayo njalo encindezela abantu.​—Bala iSambulo 17:1, 2, 5, 16, 17; 18:8.

Kulezinye izindaba ezinhle. UJehova kabakhohlwanga abantu abamthanda ngenhliziyo yonke abagcwele ezinkolweni zamanga emhlabeni wonke. Ubakhipha enkolweni yamanga ngokubafundisa iqiniso.​—Bala uMikha 4:2, 5.

3. Abantu abathanda uNkulunkulu ngenhliziyo yonke kumele benzeni?

UJehova ulendaba labantu abafuna ukwazi iqiniso labathanda ukwenza okulungileyo. Ubaxwayisa ngokuthi batshiye inkolo yamanga. Abantu abathanda uNkulunkulu bazimisele ukuntshintsha ukuze bamjabulise.​—Bala iSambulo 18:4.

Ngesikhathi sabaphostoli, abantu ababethanda uNkulunkulu ngenhliziyo yonke bathokoza lapho besizwa izindaba ezinhle kubaphostoli. Bafunda indlela entsha yokuphila eyamukelwa nguJehova, elentokozo njalo elenjongo lethemba. Bayisibonelo esihle kithi lamuhla ngoba balalela izindaba ezinhle ngokwenza uJehova abe ngoqakatheke kulaloba yini empilweni zabo.​—Bala u-1 Thesalonika 1:8, 9; 2:13.

UJehova uyabemukela labo abatshiya inkolo yamanga besiza emulini yabantu abamkhonzayo. Nxa ungavuma ukunxuswa nguJehova, uzaba ngumngane wakhe, uzathola imuli entsha elothando yezikhonzi zikaJehova kanye lokuphila okungapheliyo.​—Bala uMakho 10:29, 30; u-2 Khorinte 6:17, 18.

4. Kuyini uNkulunkulu azakwenza ukuze umhlaba wonke uthokoze?

Kuyizindaba ezinhle ukuthi inkolo yamanga izakwahlulelwa ngesikhathi esizayo. Lokhu kuzakwenza ukuthi abantu kuwo wonke umhlaba bakhululwe ekuncindezelweni. Inkolo yamanga ayisoze iphinde idukise abantu njalo ayisoze iphinde yenze abantu bengabambani. Bonke abantu bazabambana ekukhonzeni uNkulunkulu onguye yedwa oweqiniso.​—Bala iSambulo 18:20, 21; 21:3, 4.