IMIBUZO YEBHAYIBHILI IYAPHENDULWA
Izinkolo zonke ziyamdumisa yini uNkulunkulu?
Nxa ulalela izindaba eziphathelane lokwenzakalayo emhlabeni wonke, kumele ukuthi uyakunanzelela ukuthi kwezinye izikhathi kusetshenziswa izinkolo ukuze kwenziwe izinto ezimbi. Yikho akusikho ukuthi zonke izinkolo ezikhona zivela kuNkulunkulu. (UMathewu 7:15) Lamuhla abantu abanengi bayakhohliswa sibili.—Bala u-1 Johane 5:19.
Kodwa uNkulunkulu uyababona abantu abalesifiso esiqotho sokumkhonza, abathanda iqiniso kanye lokwenza okulungileyo. (UJohane 4:23) Uyabanxusa ukuthi bafunde iqiniso eliseLizwini lakhe iBhayibhili.—Bala u-1 Thimothi 2:3-5.
Ungayibona njani inkolo yeqiniso?
UJehova uNkulunkulu wenza ukuthi abantu bamanyane ngokubafundisa iqiniso kanye lokuthi bathandane kungelani lokuthi babekholwa izinto ezitshiyeneyo. (UMikha 4:2, 3) Yikho-ke izikhonzi zeqiniso ungazibona ngokuthi ziyathandana sibili.—Bala uJohane 13:35.
UJehova uNkulunkulu umanyanisa bonke abantu ngokubafundisa iqiniso.—IHubo 133:1
Izikhonzi zeqiniso zisebenzisa iBhayibhili ekuphileni kwazo njalo ezikukholwayo kuvela kulo. (2 KuThimothi 3:16) Zidumisa ibizo likaNkulunkulu. (IHubo 83:18) Kanti njalo zimemezela ukuthi uMbuso kaNkulunkulu yiwo wodwa ozasusa izinhlupho zabantu. (UDanyeli 2:44) Balingisela uJesu ngokwenza ukuthi ‘ukukhanya kwabo kukhanye.’ Lokhu bakutshengisa ngokuphatha kuhle omakhelwana babo. (UMathewu 5:16) Yikho-ke amaKhristu eqiniso ungawabona ngokuthi avakatshela abantu emakhaya abo esiyabatshela izindaba ezinhle zoMbuso kaNkulunkulu.—Bala uMathewu 24:14; ImiSebenzi 5:42; 20:20.