Imihlangano Esenza “Sivuselelane Ethandweni Lasemisebenzini Emihle”

KUSUKELA kudala abantu bakaJehova bebesiba lemihlangano ehlelekileyo. Ngokwesibonelo, wonke amadoda ako-Israyeli ayesiya eJerusalema kathathu ngomnyaka ukuze ayenanza imikhosi emithathu eyayiqakathekile. (Dute. 16:16) Langesikhathi sabaphostoli, amaKhristu ayejayele ukuhlangana ndawonye emizini yabazalwane. (Filim. 1, 2) Lathi lamuhla silayo imihlangano yebandla, eyeziqinti leyezabelo. Kodwa kungani izinceku zikaNkulunkulu zihlangana ndawonye? Kungenxa yokuthi ukwenza njalo kuyingxenye eqakathekileyo yokukhonza.—Hubo. 95:6; Kol. 3:16.

² Ukungena imihlangano kuyanceda kakhulu. Abako-Israyeli batshelwa ukuthi ekupheleni kweminyaka engu-7, ngesikhathi soMkhosi Wezihonqo kwakumele ‘babuthanise amadoda, abafazi labantwana, kanye labezizweni abahlala emadolobheni abo ukuze bazizwele bafunde ukwesaba uJehova uNkulunkulu wabo balandele ngonanzelelo wonke amazwi oMthetho.’ (Dute. 31:12) Kuyakhanya-ke ukuthi isizathu esikhulu esenza abantu bakaNkulunkulu bahlangane yikufuna ‘ukufundiswa nguJehova.’ (Isaya. 54:13) Imihlangano isipha lethuba lokuthi sazane, sikhuthazane njalo siqinisane.

IMIHLANGANO YEBANDLA

³ Ngemva kwePhentekhosti ka-33 C.E., abafundi babehlangana ndawonye ukuze balalele abaphostoli befundisa “njalo nsuku zonke babebuthana ethempelini belenhloso eyodwa.” (ImiSeb. 2:42, 46) Ngokuya kwesikhathi amaKhristu ayesithi angahlangana abale iMibhalo engcwele kanye lezincwadi ezazivela kubaphostoli labanye abafundi. (1 Khor. 1:1, 2; Kol. 4:16; 1 Thes. 1:1; Jak. 1:1) Okunye ayekwenza yikuthandaza elibandla. (ImiSeb. 4:24-29; 20:36) Kwezinye izikhathi abanye babelandisa lokho okwenzakale ngesikhathi betshumayela. (ImiSeb. 11:5-18; 14:27, 28) Kwakuxoxwa langemfundiso eziseBhayibhilini langokugcwaliseka kweziphrofetho. Babephinda bafundiswe indlela amaKhristu okumele aziphathe ngayo lokuthi angenzani ukuze ahlale ezinikele kuNkulunkulu. Bonke babekhuthazwa ukuthi bakhuthale ekutshumayeleni izindaba ezinhle.—Rom. 10:9, 10; 1 Khor. 11:23-26; 15:58; Efe. 5:1-33.

⁴ Emihlanganweni esiba layo lamuhla, silandela lokho okwakusenziwa ngesikhathi sabaphostoli. Silalela amazwi aphefumulelweyo akuHebheru 10:24, 25 athi: “Kasicabanganeni . . . , singayekeli ukuhlangana ndawonye njengoba abanye belomkhuba wokwenza njalo. Kodwa kasikhuthazaneni, ikakhulu njengoba libona usuku lusondela.” Kulezinsuku zokucina kuqakathekile ukuhlangana labanye ukuze sikhuthazane njalo sincedisane ukuthi sihlale siqinile ekukhonzeni futhi siqotho kuJehova. (Rom. 1:11, 12) Siphila labantu abonakeleyo labaxhwalileyo ngakho kumele sizimisele ukuhlala simesaba uNkulunkulu lokubalekela izifiso zomhlaba. (Flp. 2:15, 16; Tit. 2:12-14) Ayikho sibili indawo engcono ngaphandle kokuba phakathi kwabantu bakaNkulunkulu. (Hubo. 84:10) Phela kulapho esifundiswa khona iLizwi likaNkulunkulu elisincedayo ekuphileni kwethu. Okwakhathesi ake sixoxe ngemihlangano etshiyeneyo esilayo.

UMHLANGANO WANGEMPELAVIKI

⁵ Ingxenye yokuqala yomhlangano lo yinkulumo esekelwe eBhayibhilini eyenzelwe ukunceda ikakhulu labo abangayisibo oFakazi bakaJehova njalo abanye bakhona bayabe beqalisa ukungena imihlangano yethu. Inkulumo lezi ziphinda ziqinise ukholo lwabamemezeli ebandleni.—ImiSeb. 18:4; 19:9, 10.

⁶ UKhristu uJesu labaphostoli bakhe kanye labanye ababemlandela babesenza izinkulumo ezinjengalezo esiba lazo lamuhla. Akuthandabuzwa ukuthi uJesu wayeyingcitshi ekufundiseni ukwedlula loba ngubani. Abanye abake bamuzwa ekhuluma bababaza bathi: “Kakukaze kube lomuntu okhuluma kanje.” (Joh. 7:46) Indlela ayefundisa ngayo yayitshengisa ukuthi ulamandla avela kuNkulunkulu njalo ababemlalela babesala bebambe owangaphansi. (Mat. 7:28, 29) Bonke ababekusebenzisa lokho ayekutsho babesizakala kakhulu. (Mat. 13:16, 17) Abaphostoli labo babefundisa njengaye. Ngokwesibonelo, ImiSebenzi 2:14-36 isitshela ngenkulumo elamandla uPhetro ayikhuluma ngosuku lwePhentekhosti ka-33 C.E. Izinkulungwane zabantu zathinteka kakhulu zabhabhathizwa. Ngemva kwesikhathi, uPhawuli laye wakhuluma inkulumo e-Athene, abantu abanengi baba ngamakholwa.—ImiSeb. 17:22-34.

⁷ Lanamuhla, inkulumo ezitshiyeneyo ezenziwa emihlanganweni yebandla, eyeziqinti leyezabelo zinceda abantu abanengi. Ziyasinceda ukuthi sibambelele emfundisweni eliqiniso lokuthi sihlale sikhuthele emsebenzini wokutshumayela. Nxa singanxusa abantu ukuthi bazolalela inkulumo lezi bazasizakala kakhulu ukuthi balazi iqiniso eliseBhayibhilini.

⁸ Inkulumo lezi zilezihloko ezitshiyeneyo. Kulezinye ezikhuluma ngemfundiso langeziphrofetho ezitshiyeneyo eziseBhayibhilini, ezinye zikhuluma ngezimiso ezimayelana lezimuli, abasakhulayo kanye lendlela amaKhristu okumele aziphathe ngayo. Ezinye zikhuluma ngendalo kaJehova emangalisayo. Ezinye njalo zikhuluma ngezibonelo eziseBhayibhilini zabantu ababelokholo lesibindi futhi ababeqotho kuJehova. Inkulumo lezi ziyasinceda ukuthi silingisele izibonelo zabo.

⁹ Kuqakathekile ukuthi ulalelisise nxa kusenziwa inkulumo, uvule amavesi njalo uhambisane lesikhulumi ukuze uncedakale. (Luk. 8:18) Nxa ungenza njalo uzazwisisa okukhulunywayo njalo uzimisele lokukusebenzisa.—1 Thes. 5:21.

¹⁰ Inkulumo zenziwa maviki wonke nxa kulabadala kumbe izinceku ezikhonzayo ezeneleyo. Kodwa nxa kungelabazalwane abeneleyo kungenzakala zingabikhona kwamanye amaviki. Kanti njalo kungacelwa lezikhulumi kwamanye amabandla.

¹¹ Ingxenye yesibili yomhlangano wangempelaviki yisifundo se-Nqabayokulinda. Esifundweni lesi kuyabuzwa imibuzo abantu besebephendula. Le ngeyinye indlela uJehova asipha ngayo ukudla okusiqinisa ukholo.

¹² Izihloko eziphuma ku-Nqabayokulinda zisifundisa ukusebenzisa izimiso eziseBhayibhilini ekuphileni kwethu. Zisinceda lokuthi silwisane ‘lomoya womhlaba’ lokuziphatha okubi okugcwele yonke indawo. (1 Khor. 2:12) Ezinye zakhona zisichasisela imfundiso kanye leziphrofetho eziseBhayibhilini ukuze sihlale sibambelele eqinisweni njalo sihambe endleleni yabalungileyo. (Hubo. 97:11; Zaga. 4:18) Ukubakhona lokuphendula esifundweni se-Nqabayokulinda kuzasisiza ukuthi siqinise ithemba esilalo lokuphila emhlabeni omutsha. (Rom. 12:12; 2 Phet. 3:13) Ukuhlangana kwethu kusinceda lokuthi silwele ukuba lezithelo zomoya njalo sikhuthale ekukhonzeni uJehova. (Gal. 5:22, 23) Kwenza senelise ukubekezelela inhlupho esihlangana lazo futhi sizibekele ‘isisekelo esihle sekusasa ukuze sibambisise ukuphila koqobo.’—1 Tim. 6:19; 1 Phet. 1:6, 7.

¹³ Kuyini ongakwenza ukuze isifundo se-Nqabayokulinda sikuncede? Kumele ulungiselele isifundo ngasinye uwedwa kumbe liyimuli, ubale imibhalo efakiweyo njalo uphendule ngamazwi akho. Ungenza njalo iqiniso lizangena lijule enhliziyweni yakho njalo lempendulo zakho zizanceda abanye. Ukulalela nxa abanye bephendula lakho kuzakusiza kakhulu.

UMHLANGANO WAPHAKATHI KWEVIKI

¹⁴ Ibandla liyahlangana iviki ngayinye ukuze lingene uMhlangano Wempilo Lenkonzo YamaKhristu. Umhlangano lo ulengxenye ezintathu njalo usisiza ukuthi sibe “ngabafaneleyo” ukwenza umsebenzi wokutshumayela esiwuphathisiweyo. (2 Khor. 3:5, 6) Okwenziwa emhlanganweni lo kuphuma ku-Gwalo Lomhlangano lwenyanga ngayinye. Ugwalo lolu luphinda lube lentshumayelo eziyisibonelo esingazisebenzisa ekutshumayeleni.

¹⁵ Ingxenye yokuqala ethi, Amagugu AseLizwini LikaNkulunkulu isinceda sizwisise indaba ezitshiyeneyo eziseBhayibhilini lokuthi sibone indlela ezisisiza ngayo empilweni. Kulingxenye kulenkulumo, ukubalwa kanye lokuchwayisiswa kwezahluko zeBhayibhili ezifundwa ngaleyoviki. Ku-Gwalo Lomhlangano kuba lemifanekiso kanye lendawo yokubhalela imicijo ukuze sizwisise okutshiwo yiMibhalo. Ukuhlolisisa iBhayibhili ngalindlela kuyasinceda kakhulu njalo kwenza sithuthukise indlela esitshumayela ngayo ‘ukuze siyilungiselele ngokugcweleyo yonke imisebenzi emihle.’—2 Tim. 3:16, 17.

¹⁶ Ingxenye yesibili ethi, Zinikele Emsebenzini Wokutshumayela yona ngeyokusiqeqetsha ukuthi sibe zingcitshi ekutshumayeleni. Kuba lamavidiyo kanye leziboniso ezitshengisa indlela esingatshumayela ngayo. Ingxenye le yenza sibe ‘lolimi olufundisiweyo’ ukuze senelise ‘ukuqinisa abadiniweyo.’—Isaya. 50:4.

¹⁷ Ingxenye yesithathu ethi, Impilo YamaKhristu yona isifundisa indlela esingasebenzisa ngayo izimiso eziseBhayibhilini. (Hubo. 119:105) Kulingxenye kuleSifundo SeBhayibhili Sebandla esenziwa ngendlela i-Nqabayokulinda eyenziwa ngayo.

¹⁸ Nxa u-Gwalo Lomhlangano selukhona, umhleli wequla labadala kumbe umdala omncedisayo uyaluhlolisisa abesesenza uhlelo olutshengisa labo abazakwenza izinkulumo. Iviki ngayinye kuba lomdala oba ngumgcinisihlalo emhlanganweni lo waphakathi kweviki. Wonke umzalwane oba ngumgcinisihlalo ukhethwa liqula labadala futhi kumele abe ngumuntu owenelisa ukufundisa kuhle. Umsebenzi wakhe ugoqela ukuncoma lokunika abafundi iseluleko kanye lokukhangela ukuthi umhlangano uqalisa futhi uphele ngesikhathi.

¹⁹ Nxa singahlala silungiselela uMhlangano Wempilo Lenkonzo YamaKhristu sizazwisisa iMibhalo, sifunde lokusebenzisa izimiso ezikuyo, sibe lesibindi sokutshumayela njalo sibe zingcitshi ekwenzeni abafundi. Ukuba khona emhlanganweni lo kuzabanceda kakhulu labo abangakabhabhathizwa ngoba kuzabaqinisa ukholo. Okungakunceda ukuthi ulungiselele imihlangano esilayo yikusebenzisa i-Watchtower Library, i-JW Library^®, ISIPHALA SEZINGWALO ESIKU-INTHANETHI se-Watchtower^™ le-library eseWolu yoMbuso elamabhuku atshiyeneyo adindwa yinhlanganiso. Ngokwesibonelo kule-Watch Tower Publications Index, Ibhuku Lokuchwayisisa LaboFakazi BakaJehova lamanye amabhuku angakunceda. Loba ngubani angayisebenzisa i-library le imihlangano ingakaqalisi lalapho isiphelile.

UMHLANGANO WOKUYA EKUTSHUMAYELENI

²⁰ Abamemezeli bayahlangana phakathi kweviki langempelaviki njengamaqembu ukuze bangene umhlangano wokuya ekutshumayeleni. Umhlangano lo ujayele ukwenzelwa ezindlini zabazalwane, eWolu yoMbuso kumbe kwenye indawo eseduze. Ukuhlangana siliqembu kwenza kube lula ukuthi abafowethu labodadewethu batshumayele eduze lokuthi bagatshwe masinyane. Kwenza kube lula lokuthi umbonisi weqembu abanakekele ngcono abaseqenjini lakhe. Lanxa kungabe kukuhle ukuthi abantu baphume ngamaqembu, kwezinye izikhathi izimo zingabangela ukuthi amanye amaqembu aphume ndawonye. Ngokwesibonelo nxa kulabamemezeli abalutshwane abaphuma phakathi kweviki, kungaba ngcono ukuthi kuhlanganiswe amaqembu kumbe bahlangane eWolu. Kanti njalo ibandla lingahlangana eWolu yoMbuso ngamakhefu ukuze kutshunyayelwe njalo kungahlelwa ukuthi ibandla liphume ndawonye ngemva komhlangano wangempelaviki.

²¹ Nxa abamemezeli bephuma ngamaqembu, umbonisi weqembu nguye okumele aqhube umhlangano wokuya ekutshumayeleni. Ngezinye izikhathi angacela umzalwane omncedisayo kumbe omunye umzalwane ofaneleyo ukuthi aqhube lowomhlangano. Oqhubayo kumele alungiselele ukuxoxa ngemicijo ezanceda abamemezeli ekutshumayeleni. Ngemva kwalokho kumele atsho ukuthi kuzatshunyayelwa ngaphi lokuthi abantu bazahamba njani besekukhulekwa. Abamemezeli kumele bahle baphume masinyane. Umhlangano wokuya ekutshumayeleni kumele uthathe imizuzu engu-5 kusiya kwengu-7 kodwa nxa usenziwa ngemva komhlangano webandla kufanele ubemfitshane kulalapho. Labo abaqhuba umhlangano lo kumele bakhuthaze abamemezeli njalo babanike lamacebo angabanceda ukuthi benelise ukutshumayela kuhle. Abasanda kuba ngabamemezeli kumbe abafuna ukuncediswa bangaphuma lalabo asebelesikhathi eside betshumayela ukuze babasize.

INDLELA IMIHLANGANO EYENZIWA NGAYO EMABANDLENI AMANCANE

²² Inani lamabandla liqhubeka likhula ngoba banengi abantu abeza enhlanganisweni. Umbonisi wesiqinti nguye obhalela igatsha incwadi ecela imvumo yokuthi kuvulwe ibandla elitsha. Kodwa kwesinye isikhathi kungaba kuhle ukuthi nxa abamemezeli bebalutshwane kakhulu bangene lebandla eliseduze.

²³ Amanye amabandla amancane alabodade kuphela, yikho udade ozakhuleka kumbe ozaqhuba imihlangano kufanele agqoke ekhanda elandela lokho okutshiwo yiMibhalo. (1 Khor. 11:3-16) Kanti njalo odadewethu akumelanga bakhuleke kumbe benze izinkulumo bemile njengabazalwane. Nxa besenza izinkulumo kumele babale okubhaliweyo, baxoxisane ngakho kumbe benze isiboniso. Igatsha liyacela udade oyedwa ukuthi kube nguye ozakwamukela izincwadi njalo ahlele lemihlangano. Ngokuya kwesikhathi nxa sokulomzalwane ofaneleyo nguye ozakwenza leyomisebenzi.

IMIHLANGANO YESIQINTI

²⁴ Amabandla aba lomhlangano wesiqinti kabili ngomnyaka. Ukuhlangana ngalindlela kusinika ithuba ‘lokuzivula gengelezi izinhliziyo zethu’ ukuze sazane. (2 Khor. 6:11-13) Inhlanganiso iyakhangela izidingo zabantu bakaJehova ibisilungiselela izihloko zomhlangano ezisekelwe eBhayibhilini. Kuba lezinkulumo, iziboniso lezingxoxo ezikhuthazayo. Imfundo esiyitholayo ilungiselelwe ukuqinisa wonke umuntu oyingenayo imihlangano le. Emihlanganweni yeziqinti kuba lababhabhathizwayo abatshengisa ukuthi sebezinikele kuJehova.

IMIHLANGANO YESABELO

²⁵ Umhlangano wesabelo wenziwa kanye ngomnyaka njalo uthatha amalanga amathathu. Emhlanganweni lo kuyabe kuhlanganiswe amabandla avela eziqintini ezitshiyeneyo. Emazweni alamabandla amalutshwane kuba lomhlangano wesabelo owodwa. Kwezinye indawo inhlanganiso ihlela imihlangano le ngendlela ezitshiyeneyo kusiya ngezimo. Ngemva kweminyaka ethile kuba lemihlangano yezizwe loba eqakathekileyo lapho okubuthana khona izinkulungwane zabafowethu labodadewethu zivela emazweni atshiyeneyo. Imihlangano le emikhulu yenza abanengi bafune ukuzwa izindaba ezinhle zoMbuso ngenxa yendlela oFakazi bakaJehova abenza ngayo.

²⁶ Abantu bakaJehova bayayithanda imihlangano yezabelo ngoba ibanika ithuba lokukhonza uJehova bemanyene. Ibanceda lokuthi bazwisise iqiniso eliseBhayibhilini. Kweminye imihlangano kwethulwa amabhuku amatsha, amanye asetshenziswa esifundweni sebandla loba ekutshumayeleni. Kanti njalo kuba lababhabhathizwayo emihlanganweni yezabelo. Kuqakathekile ukuthi siyingene imihlangano le ngoba iyasiqinisa ukholo. Yenza kukhanye lokuthi abantu bakaJehova bayinhlanganiso emanyeneyo lokuthi balothando, oluyilo olutshengisa ukuthi bangabalandeli bakaJesu Khristu.—Joh. 13:35.

²⁷ Sizazimisela ukwenza intando kaJehova nxa singayingena yonke imihlangano yebandla, eyeziqinti leyezabelo. Kuzasinceda lokuthi sibalekele loba yini engaxegisa ukholo lwethu. Okuhle kakhulu yikuthi yonke imihlangano le idumisa uJehova. (Hubo. 35:18; Zaga. 14:28) Siyambonga kakhulu uJehova ngokusilungiselela imihlangano ekhuthazayo kulezinsuku zokucina.

ISIDLO SENKOSI SAKUSIHLWA

²⁸ Kanye ngomnyaka, oFakazi bakaJehova bayabuthana ukuze babe leSikhumbuzo sokufa kukaJesu esibizwa langokuthi yiSidlo seNkosi Sakusihlwa. (1 Khor. 11:20, 23, 24) Umhlangano lo uqakatheke kakhulu ebantwini bakaJehova ngoba uJesu wasilaya ukuthi sikhumbule ukufa kwakhe.—Luk. 22:19.

²⁹ ISikhumbuzo siba khona ngelanga eliqondana lePhasika okukhulunywa ngalo eMibhalweni. (Eks. 12:2, 6; Mat. 26:17, 20, 26) IPhasika kwakungumkhosi wokuthakazelela ukusuka kwama-Israyeli eGibhithe ngomnyaka ka-1513 B.C.E. UJehova wawatshela ukuthi ngelanga lesi-14, ngenyanga kaNisani kwakumele adle imvu yePhasika abesesuka eGibhithe. (Eks. 12:1-51) Ilanga leli litholakala ngokubala amalanga angu-13 kusukela ekuthwaseni kwenyanga eJerusalema.

³⁰ KuMathewu 26:26-28, uJesu watshengisa ukuthi iSikhumbuzo kumele senziwe njani. Akulamikhuba eminengi okumele yenziwe. Labo abadla isinkwa njalo banathe lewayini ngabazabusa loJesu Khristu eMbusweni kaNkulunkulu. (Luk. 22:28-30) Lanxa kungayisibo bonke abadlayo labanathayo eSikhumbuzweni, kuqakathekile ukuthi babekhona ngoba kutshengisa ukuthi bayambonga uJehova uNkulunkulu ngokuthumela iNdodana yakhe uJesu ukuthi izosifela. Kungakafiki ilanga leSikhumbuzo, kuba lenkulumo eqakathekileyo kazulu wonke elungiselelwe ukukhuthaza abantu ukuthi babekhona embuthanweni lo.

³¹ OFakazi bakaJehova bahlala bekulindele ukuhlangana ndawonye ukuze ‘bavuselelane ethandweni lasemisebenzini emihle.’ (Heb. 10:24) Inceku ethembekileyo lehlakaniphileyo ihlala ihlela imihlangano ngendlela esinceda kakhulu ekukhonzeni. Bonke abazinikele kuJehova lalabo abafunda iBhayibhili bakhuthazwa ukuthi bangayekeli ukungena imihlangano. Sizakuba ngabantu abamanyeneyo nxa singatshengisa ukuthi siyambonga uJehova ngokusilungiselela inhlelo zonke lezi esebenzisa inhlanganiso yakhe. Okuqakathekileyo yikuthi siyabe sidumisa uJehova.—Hubo. 111:1.