Imihlangano Yokuya Ekutshumayeleni Esenza Silungele Inkonzo
1. Imihlangano yokuya ekutshumayeleni isinceda njani?
1 Ngelinye ilanga uJesu wenza umhlangano labafundi bakhe abangu-“70, NW” bengakayi ekutshumayeleni. (Luk. 10:1-11) Wabakhuthaza ngokubakhumbuza ukuthi babengabodwa kodwa babekhokhelwa nguJehova “iNkosi yesivuno.” Wabafundisa ukuthi babezawenza njani umsebenzi wokutshumayela, wasebagaba ngababili. Lamuhla imihlangano esiba layo singakayi ekutshumayeleni isinceda ngendlela efananayo. Iyasikhuthaza, isifundise futhi isenze sihleleke.
2. Kumele uthathe isikhathi esingakanani umhlangano wokuya ekutshumayeleni?
2 Okwakhathesi imihlangano yokuya ekutshumayeleni ithatha imizuzu engu-10 kusiya kwengu-15. Phakathi kwemizuzu le kugatshwa abamemezeli, banikwe insimu futhi kuthandazwe. Isikhathi lesi sesincitshisiwe. Kusukela ngo-April umhlangano wokuya ekutshumayeleni usuzathatha imizuzu engu-5 kusiya kwengu-7 kuphela. Kodwa umhlangano lo kumele ube mfitshane kakhulu nxa usenziwa ngemva kwemihlangano yebandla, njengoba abazalwane bayabe besanda kuzwa imicijo emihle evela eMibhalweni. Nxa imihlangano yokuya ekutshumayeleni imfitshane, abamemezeli bazakuba lesikhathi esinengi sokutshumayela. Kanti njalo lokhu kuzanceda ukuthi amaphayona loba abamemezeli abayabe sebeqalisile ukutshumayela bangami okwesikhathi eside.
3. Imihlangano yokuya ekutshumayeleni ingahlelwa njani ukuze ibe ngenceda abamemezeli?
3 Imihlangano yokuya ekutshumayeleni kumele ibe ngehlelwe kuhle ukuze incede abamemezeli. Kwamanye amabandla kuba ngcono kakhulu ukuthi abamemezeli bahlangane njengamaqembu kulokuthi bonke bahlangane endaweni eyodwa. Iqula labadala lingakhetha ukuthi kwenziweni kusiya ngezimo zebandla. Ukuhlangana njengamaqembu kwenza kube lula ukuthi abamemezeli baye lapho okuhlanganwa khona, lalapho abazatshumayela khona. Kuzakuba lula lokuthi abamemezeli bagatshwe masinyane, njalo ababonisi bamaqembu bazanakekela ngcono abaseqenjini labo. Wonke umuntu kumele abesekwazi ukuthi uyangaphi lokuthi uhamba lobani kungakaphethwa ngomthandazo.
4. Kungani kumele siwuqakathekise umhlangano wokuya ekutshumayeleni?
4 Umhlangano Lo Uqakathekile Njengeminye Imihlangano Yebandla: Imihlangano yokuya ekutshumayeleni kayingenwa libandla lonke kodwa ingenwa yilabo abaya ekutshumayeleni kuphela. Lanxa kunjalo kumele siwuqakathekise njengayo yonke imihlangano yebandla. Umhlangano wokuya ekutshumayeleni ufanana layo yonke eminye imihlangano yethu esiyilungiselelwa nguJehova ukuze sikhuthazane ethandweni lasezenzweni ezinhle. (Heb. 10:24, 25) Ngakho oqhuba umhlangano lo kumele alungiselele kuhle ukuze ingxoxo ezakwenziwa ibe ngedumisa uJehova futhi enceda abamemezeli. Labo abaya ekutshumayeleni kumele benze konke okusemandleni abo ukuze babekhona emhlanganweni lo.
Kumele siwuqakathise umhlangano wokuya ekutshumayeleni njengayo yonke imihlangano yebandla
5. (a) Kuyini okumele kwenziwe ngumbonisi wenkonzo nxa ehlela imihlangano yokuya ekutshumayeleni? (b) Udade kumele awuqhube njani umhlangano wokuya ekutshumayeleni?
5 Okumele Kulungiselelwe Ngoqhubayo: Ukuze umuntu enelise ukwenza kuhle isabelo emhlanganweni webandla kumele atshelwe kuseselesikhathi. Kumele kwenziwe okufananayo langesabelo sokuqhuba umhlangano wokuya ekutshumayeleni. Nxa abamemezeli behlangana njengamaqembu, kuqhuba umbonisi weqembu kumbe umsizi wakhe. Kodwa nxa abamemezeli bezahlangana belibandla kumele umbonisi wenkonzo akhethe omunye ukuthi aqhube umhlangano lo. Abanye ababonisi benkonzo balufaka ebhodini uhlelo olutshengisa ukuthi ngubani ozaqhuba umhlangano, baphinde balunike lalabo abazaqhuba. Umbonisi wenkonzo kumele akhethe kuhle labo abazaqhuba umhlangano, njalo akhumbule ukuthi ukuze umhlangano lo uqhutshwe kuhle kumele lowo ozaqhuba abe ngowenelisa ukufundisa lokuhlela kuhle. Nxa kuyikuthi kwamanye amalanga kuyabe kungelamdala, kumbe inceku ekhonzayo kumbe umzalwane obhaphathiziweyo njalo ofaneleyo, umbonisi wenkonzo kumele akhethe udade ofaneleyo ukuthi aqhube umhlangano lo.—Khangela isihloko esithi “Nxa Kumele Ukuthi Udade Aqhube.”
6. Kungani kuqakathekile ukuthi ozaqhuba alungiselele kuhle?
6 Sandise ukulungiselela okuzwayo nxa singatshelwa ukuthi silenkulumo emhlanganweni weSikolo Senkonzo SamaKhristu kumbe eMhlanganweni weNkonzo. Balutshwana kakhulu abangahamba emhlanganweni webandla bengalungiselelanga izinkulumo zabo. Isabelo sokuqhuba umhlangano wokuya ekutshumayeleni laso kumele sisilungiselele kuhle. Njengoba isikhathi somhlangano lo sesincitshisiwe, sekuqakatheke kakhulu ukuthi ulungiselelwe kuhle ukuze ube ngozanceda abamemezeli futhi uphele ngesikhathi. Ukulungiselela kuhle kugoqela lokuhlela kuseselesikhathi indawo lapho okuzatshunyayelwa khona.
7. Yikuphi okunye okungaxoxwa ngakho emhlanganweni wokuya ekutshumayeleni?
7 Okumele Kuxoxwe Ngakho: Inceku ethembekileyo kayilahlelo lokuthi kumele kuxoxwe ngani emhlanganweni wokuya ekutshumayeleni ngenxa yokuthi izimo ziyatshiyana kusiya ngendawo. Ibhokisi elithi “Elingaxoxa Ngakho Emhlanganweni Wokuya Ekutshumayeleni” litshengisa okunye elingaxoxa ngakho. Izikhathi ezinengi umhlangano lo kumele ube yingxoxo. Kodwa ngezinye izikhathi kungaba lesiboniso esilungiselelwe kuhle kumbe ividiyo eku-jw.org ehambelana leliyabe lixoxa ngakho. Nxa oqhubayo elungiselela umhlangano wokuya ekutshumayeleni, kumele acabange ngalokho okungakhuthaza abamemezeli ukuze bakulungele ukuya ekutshumayeleni.
Nxa oqhubayo elungiselela umhlangano wokuya ekutshumayeleni kumele acabange ngalokho okungakhuthaza abamemezeli ukuze bakulungele ukuya ekutshumayeleni
8. Kuyini okungaxoxwa ngakho emhlanganweni wokuya ekutshumayeleni ngeMigqibelo langeSonto okunganceda abamemezeli?
8 NgeMigqibelo sandise ukunika abantu INqabayokulinda le-Awake! Abamemezeli abanengi abayabe bengayanga ekutshumayeleni phakathi kweviki bangakhohlwa izintshumayelo abaziphurakithize ekuKhonzeni kweMuli. Yikho bengancedakala nxa oqhubayo engaxoxa ngezintshumayelo eziyisibonelo ezisekhasini elingemuva kwe-Nkonzo Yethu YoMbuso. Okunye okungenziwa ngoqhubayo yikuxoxa ngendlela yokungenisa indaba esegudwini loba ikhefu elithile nxa abamemezeli benika umuntu imagazini kumbe befaka isendlalelo sokuphindela nxa kuyikuthi umninimuzi uyamukele imagazini. Nxa kuyikuthi kulabanye asebeke bahambisa amamagazini la, oqhubayo angabacela ukuthi batsho ngamafitshane indlela abawahambise ngayo kumbe batsho okunye nje okukhuthazayo okwenzakale ngesikhathi bewahambisa. NgeSonto, oqhubayo angakhetha ukwenza okufananayo ngalokho okuyabe kuhanjiswa ngaleyo nyanga. Amabhukwana esiwasebenzisa ekufundeni labantu anjengelithi Izindaba Ezinhle lelithi Lalela uNkulunkulu lebhuku elithi Okufundiswa liBhayibhili angaphiwa abantu loba nini. Yikho oqhubayo angaxoxa kafitshane ngezindlela zokuhambisa amabhuku la.
9. Kungaxoxwa ngani emhlanganweni wokuya ekutshumayeleni nxa kulomkhankaso?
9 Nxa kulomkhankaso, oqhubayo angaxoxa ngokuthi isimemo singahanjiswa njani ndawonye lemagazini yaleyo nyanga kumbe nxa kuliphetshana atsho ukuthi lingahanjiswa njani ndawonye lemagazini yaleyo nyanga. Angaxoxa langokuthi kungenziwani nxa umuntu etshengise ukuthi uyafuna ukufunda. Okunye angakwenza yikukhuluma ngokuhle okuke kwenzakala okutshengisa ukuqakatheka kwemikhankaso enjalo.
10, 11. Kungani kuqakathekile ukuthi abamemezeli balungiselele ukuze umhlangano wokuya ekutshumayeleni uphumelele?
10 Okumele Kulungiselelwe Ngabamemezeli: Abamemezeli kumele benze okuthile ukuze umhlangano lo uphumelele. Nxa bengalungiselela kuseselesikhathi, mhlawumbe ngesikhathi sokukhonza kwemuli, bangaba lokunye okokutsho okuzanceda abanye abamemezeli. Ungakayi emhlanganweni wokuya ekutshumayeleni, thwala amamagazini lamabhuku ozawasebenzisa ukuze nxa umhlangano uphela uhle uye ensimini.
11 Kuqakathekile lokuthi siphangise ukufika emhlanganweni lo njengoba nje sizama ukuphangisa kuyo yonke imihlangano yebandla. Kodwa ukuphuza ukufika kungaphambanisa abanye. Njani? Kunengi okucatshangwa ngumfowethu oqhubayo engakagabi abantu. Nxa kulabamemezeli abalutshwana ababuyileyo, angakhetha ukuthi bonke bayetshumayela ensimini engaphelanga. Nxa kulabanye ababuye ngenyawo futhi insimu ezasetshenzwa ikhatshana, angagaba abalezimota ukuthi bahambe labangelazo. Nxa insimu ezasetshenzwa ilezigebenga, angagaba odade ukuthi bahambe labazalwane kumbe batshumayele ensimini efananayo. Abagulayo labagugileyo angabanika insimu engadingi ukuthi baqanse imiqanso loba insimu engelamafulethi. Abasanda kuba ngabamemezeli bangagatshwa lalabo asebelesikhathi bengabamemezeli. Kodwa nxa abamemezeli bangaphuza, oqhubayo kuyabe sekumele agabe kutsha. Kungenzakala ukuthi ngezinye izikhathi sibe lesizathu esizwakalayo sokuphuza. Kodwa nxa silomkhuba wokuphuza, kumele sizibuze ukuthi siphuziswa yikuthi kasiyiqakathekisi yini imihlangano yokuya ekutshumayeleni kumbe yikuthi kasenelisi ukuhlela izimo zethu kuseselesikhathi?
12. Kuyini ongacabanga ngakho nxa wandise ukuhlela ukuthi ufuna ukuhamba lobani?
12 Abamemezeli ababuya emhlanganweni wokuya ekutshumayeleni bangabe behlelile ukuthi bazahamba lobani, nxa bengahlelanga bangagatshwa lothile. Nxa kuyikuthi wandise ukuhlela, ‘ungayivula yini inhliziyo yakho’ ukuze usebenze labamemezeli abatshiyeneyo kulokuthi uhlale uhamba labangane bakho kuphela? (2 Khor. 6:11-13) Ungahlela yini ukuthi kwezinye izikhathi uhambe losanda kuba ngummemezeli ukuze umncede athuthuke ekufundiseni? (1 Khor. 10:24; 1 Tim. 4:13, 15) Lalelisisa imilayezo oyiphiwayo ehlanganisa lokuthi liqalisela ngaphi ukutshumayela. Nxa umhlangano usuphelile, ungantshintshi umuntu oyabe ugatshwe laye futhi kufanele lihle lihambe masinyane ensimini.
13. Imihlangano yokuya ekutshumayeleni izasinceda njani nxa sonke singalandela amacebo okukhulunywe ngawo?
13 Abafundi abangu-70 abathunywa nguJesu ukuthi bayetshumayela “babuya bethokoza.” (Luk. 10:17) Akuthandabuzwa ukuthi umhlangano ababa lawo loJesu wabanceda sibili. Lalamuhla imihlangano yokuya ekutshumayeleni ingasinceda kakhulu. Nxa sonke singalandela amacebo okukhulunywe ngawo, imihlangano yokuya ekutshumayeleni izasikhuthaza, isifundise futhi isenze sihleleke ukuze senelise ukufeza umlayo ‘wokufakaza kuzo zonke izizwe.’—Mat. 24:14.