Iminyaka Engu-100 Yokubusa koMbuso Ikuthinta Njani?

1, 2. UMbuso kaNkulunkulu uzakwenzani, kanti njalo kungani sileqiniso lokuthi uzabuya?

ENTABENI eseduze leKhaphenawume ngentwasa ka-31 C.E., uJesu Khristu wafundisa abalandeli bakhe ukuthi bathandaze kanje: “Umbuso wakho kawuze.” (Mat. 6:10) Kulezinsuku abanengi abaselathemba lokuthi uMbuso uzafa wabuya. Kodwa sileqiniso lokuthi sizaphendulwa nxa sithandaza ngenhliziyo yonke ukuthi uMbuso kaNkulunkulu uze.

² UJehova uzasebenzisa uMbuso lo ukuze enze ukuthi imuli yakhe yasemhlabeni leyasezulwini imanyane. UNkulunkulu uzayifeza inhloso yakhe sibili. (Isaya. 55:10, 11) Izehlakalo ezimangalisayo ezenzakale eminyakeni engu-100 edlulileyo ziyakufakazela ukuthi uJehova vele useqalisile ukubusa. UNkulunkulu wenzela izigidi zezinceku zakhe ezithembekileyo imisebenzi emangalisayo lemikhulu okwamagama. (Zek. 14:9; Isam. 15:3) Kodwa ukuthi uJehova seyiNkosi kutshiyene lokuza koMbuso kaNkulunkulu uJesu asifundisa ukuthi sikuthandazele. Zitshiyene ngani izehlakalo lezi, njalo zitshoni kithi?

INKOSI EBEKWE NGUJEHOVA IQALISA UKUSEBENZA

3. (a) UJesu wabekwa nini ukuthi abe yiNkosi njalo wabekwa ngaphi? (b) Kuyini okutshengisa ukuthi uMbuso waqalisa ukubusa ngo-1914? (Khangela amabala angaphansi.)

³ Sekusiyaphela ikhulu leminyaka lesi-​19, saqalisa ukuzwisiseka isiphrofetho esabhalwa nguDanyeli eminyakeni engu-2 500 eyadlulayo esithi: “Ngalesosikhathi samakhosi lawo uNkulunkulu wasezulwini uzabeka umbuso ongasoze wabhidlizwa lanini.” (Dan. 2:44) Kwasekulamatshumi eminyaka aBafundi beBhayibhili bechaza ukuthi u-1914 uzakuba ngumnyaka oqakathekileyo. Abantu abanengi ngesikhathi leso babecabanga ukuthi izinto zizakubangcono. Omunye umlobi waze wabhala ukuthi: “Ngomnyaka ka-1914 izinto zazikhanya zithembisa kakhulu emhlabeni.” Kodwa umnyaka ususiyaphela, isiphrofetho seBhayibhili sagcwaliseka lapho kuqalisa iMpi Yomhlaba Wonke Yokuqala. Izindlala, imikhuhlane lokuzamazama komhlaba kanye lokugcwaliseka kwezinye iziphrofetho eziseBhayibhilini kwatshengisa ukuthi uJesu Khristu wayeseqalisile ukubusa eMbusweni kaNkulunkulu ngo-1914.a Ngokubeka iNdodana yakhe ukuthi ibe yiNkosi enguMesiya, uJehova wayeseqalise ukuba yiNkosi ngenye indlela entsha.

4. INkosi entsha yaqalisa ngokwenzani, njalo iqeda lapho yasisenzani?

⁴ INkosi eyayisanda kubekwa nguNkulunkulu yaqalisa ngokulwa lesitha sikaYise esikhulu, uSathane. UJesu lezingilosi zakhe baxotsha uSathane lamadimoni akhe ezulwini. Kwaba lokuthokoza okukhulu ezulwini, kodwa umhlaba wehlelwa yibunzima obungakaze bubonakale. (Bala iSambulo 12:7-9, 12.) Isuka khonapho iNkosi yahle yaqalisa ukulungisisa, ukufundisa lokuhlela izinceku zayo emhlabeni ukuthi zenze intando kaNkulunkulu. Asihloleni ukuthi indlela ezakwamukela ngayo ukuqondiswa nguJesu kulezizinto ezintathu isifundisani lamuhla.

INKOSI ENGUMESIYA ILUNGISISA IZINCEKU ZAYO EZITHEMBEKILEYO

5. Yikuphi ukuhlanjululwa okwenzakala kusukela ngo-1914 kusiya ekuqaliseni kuka-1919?

⁵ INkosi ebekiweyo, uJesu, isanda kukhipha uSathane lamadimoni akhe ezulwini, yathunywa nguJehova ukuthi iyehlola njalo ilungisise indlela izinceku zayo ezazikhonza ngayo emhlabeni. Umphrofethi uMalaki wakuchaza ngokuthi yikuhlambulula. (Mal. 3:1-3) Umlando utshengisa ukuthi lokhu kwenzakala phakathi kuka-1914 kusiya ekuqaliseni kuka-1919.b Ukuze sibe yingxenye yemuli kaJehova yezidalwa zonke, kumele sihlanzeke okutsho ukuthi sibengcwele. (1 Phet. 1:15, 16) Kumele singavumi ukungcoliswa yikukhonza kwamanga kumbe ngezombusazwe zomhlaba lo.

6. Ulwazi ngoNkulunkulu siluthola njani, futhi kungani luqakathekile?

⁶ UJesu wasebenzisa amandla akhe obukhosi ukuthi abeke ‘inceku ethembekileyo lehlakaniphileyo.’ Inceku le yayizaqhubeka ibapha ulwazi oluqondileyo ngoNkulunkulu bonke ababumba ‘umhlambi owodwa’ onakekelwa nguJesu. (Mat. 24:45-47; Joh. 10:16) Kusukela ngo-1919 iqembu elincane labazalwane abagcotshiweyo belithembekile emsebenzini oqakathekileyo wokufundisa “izisebenzi zalapha ekhaya.” Ulwazi olunengi ngoNkulunkulu esiluthola ngalindlela luyasondla njalo luqinisa ukholo lwethu. Lusinika amandla okuthi siqhubeke sihlanzekile ekukhonzeni, ekuziphatheni, emicabangweni lasemzimbeni. Ulwazi lolu luyasifundisa njalo lusinika amacebo okuthi siwenze kuhle umsebenzi oqakatheke kulayo yonke emhlabeni lamuhla. Uyazibala yini izinto zonke lezi esiziphiwayo?

INKOSI IFUNDISA IZINCEKU ZAYO UKUTSHUMAYELA EMHLABENI WONKE

7. Yiwuphi umsebenzi oqakathekileyo owaqaliswa nguJesu emhlabeni, njalo wawuzaqhubeka kuze kube nini?

⁷ UJesu eqalisa inkonzo yakhe emhlabeni wamemezela ukuthi: “Ngimele ngitshumayele izindaba ezinhle lakwamanye amadolobho njalo ngokuba yikho engakuthunyelwayo.” (Luk. 4:43) Okweminyaka emithathu lengxenye, uJesu wayephilela umsebenzi lo. Walaya abafundi bakhe wathi: “Ekuhambeni kwenu tshumayelani leli ilizwi: ‘Umbuso wezulu ususondele.’” (Mat. 10:7) Esevusiwe, uJesu wathi abalandeli bakhe babezasakaza umbiko lo ‘emikhawulweni yomhlaba.’ (ImiSeb. 1:8) Wabathembisa ukuthi yena uqobo wayezabaphathisa emsebenzini lo oqakathekileyo kuze kufike esikhathini sethu.​—Mat. 28:19, 20.

8. INkosi yenza njani ukuthi izinceku zayo emhlabeni zibe ledlabuzane lokusebenza?

⁸ Ngo-1919 kwantshintshwa indlela okwakumenyezelwa ngayo ‘ivangeli lombuso.’ (Mat. 24:14) INkosi yayisibusa ezulwini njalo yayisiqoqe ihlekana lezinceku ezihlanjululiweyo emhlabeni. Zathi zisizwa umlayezo kaJesu wokuthi: Zitshumayele izindaba ezinhle zoMbuso obekiweyo emhlabeni wonke, zasukumela phezulu. (ImiSeb. 10:42) Ngokwesibonelo abasekeli boMbuso lo abaphose bafike i-20 000 babuthana emhlanganweni wezizwe e-Cedar Point, Ohio, e-U.S.A., ngo-September 1922. Akucabange ukuthi bathaba njani lapho uMfowethu Rutherford enika inkulumo elesihloko esithi, “uMbuso” wasesithi “Khangelani, iNkosi isibusa! Liyizisebenzi zayo eziyikhankaselayo. Ngakho-ke, memezelani, memezelani, memezelani, iNkosi lombuso wayo.” Izethekeli zomhlangano lo ezingu-2 000 zahamba emsebenzini wokutshumayela “Ngelanga leNkonzo” eliqakathekileyo, zaze zahamba kweminye imizi eyayikhatshana ngamakhilomitha angu-72 lalapho okwakungenelwa khona umhlangano. Esinye isethekeli sisizwa siledlabuzane lokutshumayela sathi: “Angisoze ngafa ngakukhohlwa ukutshiseka kwalabo ababesemhlanganweni kanye lesicelo sokuthi siyememezela uMbuso!” Babebanengi ababecabanga njalo.

9, 10. (a) Yiziphi izinhlelo ezikhona zokuqeqetsha abamemezeli boMbuso? (b) Wena uthole ncedo bani kulokhu kuqeqetshwa?

⁹ Ngo-1922 kwakulabamemezeli boMbuso abedlula-17 000 abakhutheleyo emazweni angu-58 emhlabeni wonke. Kodwa babedinga ukuqeqetshwa. Ngekhulu lokuqala, iNkosi eyayikhethiwe yanika abafundi bayo imilayezo ecacileyo yokuthi batshumayele ngani, ngaphi lokuthi batshumayele njani. (Mat. 10:5-7; Luk. 9:1-6; 10:1-11) Lalamuhla uJesu uyaqikelela ukuthi bonke abatshumayela ngoMbuso bathola iziqondiso lezinto zonke abazidingayo ukuze baphumelele emsebenzini lo. (2 Tim. 3:17) UJesu uqeqetsha izinceku zakhe esebenzisa ibandla lobuKhristu ukuze zenelise ukutshumayela. Enye indlela ayisebenzisayo yiSikolo seNkonzo samaKhristu esisemabandleni adlula-111 000 emhlabeni wonke. Isikolo lesi sesincede izigidi ezidlula eziyisikhombisa zabatshumayeli emhlabeni wonke ukuthi zenelise ukutshumayela lokufundisa ngendlela ekhwabithekayo “ebantwini bonke.”​—Bala u-1 Khorinte 9:20-23.

¹⁰ Kanti njalo kulezinye izikolo ezikhona zokuqeqetsha abadala bamabandla, amaphayona, abazalwane abangatshadanga, amaKhristu atshadileyo, amalunga eKhomithi yeGatsha labomkabo, ababonisi abahambelayo labomkabo kanye labanali.c Abanye abake bangena iSikolo seBhayibhili samaKhristu Atshadileyo babonga ngesikolo lesi bathi: “Ukuqeqetshwa okuhle esikuthole lapha kwenze samthanda kakhulu uJehova njalo sesingawenza ngcono umsebenzi wokunceda abanye.”

11. Abamemezeli boMbuso baphumelele njani lanxa bebephikiswa?

¹¹ Isitha, uSathane, siyayibona imizamo yokufundisa kanye lengqubelaphambili yomsebenzi wokutshumayela ngoMbuso emhlabeni wonke. Ngakho-ke sisebenzisa izindlela ezicatshileyo kanye lezinye ezisegcekeni ukuze sihlasele umlayezo woMbuso kanye labatshumayeli bawo. Kodwa imizamo yesitha lesi iphelela emoyeni. UJehova usebeke iNdodana yakhe “ngaphezu kokubusa konke lobukhosi, lamandla kanye lombuso.” (Efe. 1:20-22) INkosi uJesu isebenzisa amandla ayo ukuthi ivikele njalo iqondise abafundi bayo ukuze ibe leqiniso lokuthi intando kaYise iyenziwa.d Izindaba ezinhle ziyatshunyayelwa njalo izigidi zabantu abaqotho zifundiswa izindlela zikaJehova. Kuyisibusiso esikhulu kakhulu ukuthi lathi siyawenza umsebenzi omkhulu kangaka!

INKOSI IHLELA IZINCEKU ZAYO UKUTHI ZENZE UMSEBENZI OMKHULU

12. Chaza ezinye izinto ebezilungisiswa enhlanganisweni kusukela uMbuso uqalisa ukubusa.

¹² Kusukela ngo-1914 lapho uMbuso ubekwa, iNkosi ibilungisisa indlela izinceku zikaNkulunkulu ezihlelwe ngayo ekukhonzeni. (Bala u-Isaya 60:17.) Ngo-1919 kwabekwa umkhokheli wenkonzo ebandleni ngalinye ukuze aqondise umsebenzi wokutshumayela. Ngo-1927 kwahlelwa umsebenzi wokutshumayela endlini ngendlu ngelanga langeSonto. Ngo-1931 abasekeli boMbuso banikwa umdladla wokusebenza lapho beqalisa ukusebenzisa ibizo eliseBhayibhilini elithi, oFakazi BakaJehova. (Isaya. 43:​10-12) Ngo-1938 ukuvotela amadoda akhokhelayo ebandleni kwama, kwaqalisa uhlelo lokubekwa kusetshenziswa izimiso eziseMibhalweni. Ngo-1972 kwahlelwa ukuthi umsebenzi wokunakekela ibandla wenziwe liqula labadala kulokuthi wenziwe ngumbonisi webandla oyedwa. Wonke amadoda afaneleyo ayekhuthazwa ukuthi azimisele ukuncedisa emsebenzini wokuba ‘ngabelusi bomhlambi kaNkulunkulu abawugcinayo.’ (1 Phet. 5:2) Ngo-1976 iQula eLibusayo lahlelwa laba ngamakhomithi ayisithupha ukuze liqondise umsebenzi woMbuso emhlabeni wonke. Kuyakhanya sibili ukuthi iNkosi ebekwe nguJehova iqhubeka ihlela amalunga oMbuso ngendlela kaNkulunkulu.

13. Ingqubelaphambili eyenziwe nguMbuso lo eminyakeni engu-100 edlulileyo ikuthinte njani ukuphila kwakho?

¹³ Cabanga ngezinto ezinengi esezenziwe yiNkosi enguMesiya eminyakeni engu-100 ibusa! Isihlambulule abantu ngenxa yegama likaJehova. Iqondise umsebenzi wokutshumayela izindaba ezinhle zoMbuso emazweni angu-239 njalo yafundisa izigidi zabantu ngezindlela zikaJehova. Yenze kwaba lokumanyana phakathi kwezinceku ezithembekileyo ezedlula izigidi eziyisikhombisa, njalo zonke zizinikela ngokuzikhethela ukwenza intando kaYise. (Hubo. 110:3) UJehova wenze imisebenzi emikhulu lemangalisayo esebenzisa uMbuso kaMesiya. Kodwa kunengi kakhulu okuphambi kwethu!

IZIBUSISO EZIZALETHWA NGUMBUSO KAMESIYA

14. (a) Siyabe sicelani kuNkulunkulu nxa sithandaza sisithi: “umbuso wakho kawuze”? (b) Uthini umbhalo womnyaka ka-2014 njalo kungani ufanele?

¹⁴ Lanxa uJehova wabeka iNdodana yakhe uJesu Khristu ukuthi ibe yiNkosi enguMesiya ngo-1914, akuzange kuwuphendule ngokugcweleyo umthandazo wethu othi, “umbuso wakho kawuze.” (Mat. 6:10) Kwakuphrofethiwe eBhayibhilini ukuthi uJesu ‘uzabusa phakathi kwezitha zakhe.’ (Hubo. 110:2) Imibuso yabantu ekhokhelwa nguSathane ilokhu isaphikisana loMbuso kaNkulunkulu. Nxa sithandazela ukuthi uze, siyabe sicela kuNkulunkulu ukuthi iNkosi enguMesiya lalabo ababusa layo bazosusa imibuso yabantu njalo bakhiphe abaphikisi boMbuso abasemhlabeni. Lokhu kuzagcwalisa amazwi akuDanyeli 2:44 athi uMbuso kaNkulunkulu “uzayibhidliza yonke leyomibuso iphele,” ususe zonke izitha zawo. (Isam. 6:1, 2; 13:1-18; 19:11-21) Sesiseduze kakhulu isikhathi sokuthi lokhu kwenzakale. Yikho ungena kuhle umbhalo wethu womnyaka ka-2014 othi ‘uMbuso wakho kawuze’ othethwe kuMathewu 6:10 njengoba uMbuso kaNkulunkulu usuleminyaka engu-100 ubekiwe ezulwini.

15, 16. (a) Yizinto bani ezimangalisayo ezizakwenzakala phakathi kweminyaka eyinkulungwane yokubusa? (b) UJesu, iNkosi enguMesiya uzacina ngokwenzani, njalo lokhu kuzabe kusitshoni mayelana lenjongo kaJehova ngezidalwa zakhe?

¹⁵ INkosi enguMesiya isiqede ukutshabalalisa izitha zikaNkulunkulu, izajikijela uSathane lamadimoni akhe emgodini ongelamkhawulo ibavalele okweminyaka eyinkulungwane. (Isam. 20:1-3) USathane onguye obangela ububi engasekho, uMbuso uzaqhubekela phambili ulethe izibusiso ezitholakala ngenhlawulo yomhlatshelo kaJesu njalo uqede impumela yesono sika-Adamu. INkosi izavusa izigidi ezinengi kakhulu ezisemathuneni futhi ihlele ukuthi kube lomsebenzi omkhulu wokuzifundisa ngoJehova. (Isam. 20:12, 13) Umhlaba wonke uzabe usufanana lepharadayisi lase-Edeni. Ngalesosikhathi bonke abantu abathembekileyo bazakwenziwa baphelele.

¹⁶ Kusiyaphela iminyaka eyinkulungwane yokubusa kukaKhristu, uMbuso kaMesiya uzabe usuqedile umsebenzi wawo. Ngemva kwalokho uJesu uzabuyisela uMbuso kuYise. (Bala u-1 Khorinte 15:24-28.) Abantu emhlabeni bazabe bengasamdingi ummeli phakathi kwabo loJehova. Wonke amadodana kaNkulunkulu asezulwini labantwabakhe abasemhlabeni bazamanyana loYise osezulwini babeyimuli eyodwa yezidalwa zonke.

17. Uzimisele ukwenzani mayelana loMbuso?

¹⁷ Izehlakalo ezimangalisayo ezenzakale eminyakeni engu-100 yokubusa koMbuso, ziyasiqinisekisa ukuthi uJehova nguye oqondisayo lokuthi injongo yakhe ngomhlaba izagcwaliseka. Asiqhubekeni siyizinceku ezithembekileyo njalo simemezele iNkosi loMbuso wayo. Lokhu sikwenze silesibindi sokuthi ngesikhatshana nje uJehova uzawuphendula umthandazo wethu oqotho othi: “Umbuso wakho kawuze”!