IMIBUZO YEBHAYIBHILI IYAPHENDULWA

IBhayibhili yiLizwi likaNkulunkulu yini?

IBhayibhili litshiyene kakhulu lamanye amabhuku ngoba yiLizwi likaNkulunkulu. Sekwadindwa amaBhayibhili angamabhiliyoni ngezindimi ezinengi kakhulu. Ukuhlakanipha okuseBhayibhilini kulamandla okuntshintsha impilo zabantu zibe ngcono.​—Bala u-1 Thesalonika 2:​13 lo-2 Thimothi 3:16.

Siyakwazi ukuthi iBhayibhili livela kuNkulunkulu ngenxa yokuthi likhuluma iqiniso ngekusasa. Akulamuntu ongakwenza lokhu. Ngokwesibonelo cabanga ngebhuku lika-Isaya. Ikhophi yalo eyabhalwa sekusele ikhulu leminyaka ukuthi uJesu azalwe yatholakala ebhalwini duze lolwandle olukhulu okuthiwa luLwandle Olufileyo. Ikhuluma ngokuthi idolobho laseBhabhiloni lalingasoze lihlalwe futhi. Lokhu kwagcwaliseka sekwedlule iminyaka eminengi uJesu eqede inkonzo yakhe emhlabeni.​—Bala u-Isaya 13:19, 20 lo-2 Phetro 1:20, 21.

IBhayibhili labhalwa njani?

IBhayibhili labhalwa eminyakeni engu-1 600. Kwakulabalobi beBhayibhili abangu-​40, njalo babebhala ngendaba eyodwa eyisiqokoqela kodwa babengaphikisani ekubhaleni kwabo. Lokhu kwenzakala njani? UNkulunkulu wayebakhokhela.​—Bala u-2 Samuyeli 23:2.

Kwezinye izikhathi uNkulunkulu wayekhuluma labalobi beBhayibhili esebenzisa izingilosi, imibono lamaphupho. Kanti njalo wayejayele ukufaka umcabango wakhe engqondweni yomlobi abesemvumela ukuthi akhethe amazwi ayezawasebenzisa ukuze abhale umlayezo kaNkulunkulu.​—Bala iSambulo 1:1 lo–21:3-5.