Imibuzo YeBhayibhili Iyaphendulwa
Ukufa kukaJesu kusinceda ngani?
Lapho uNkulunkulu edala abantu, wayefuna baphile kuze kube nini lanini bengahlupheki, bengaguli njalo bengafi. Kodwa indoda yokuqala, u-Adamu, kayimlalelanga uMdali yasilahlekelwa yikuphila okungapheliyo. Siyafa ngenxa yokuthi lathi siyinzalo ka-Adamu. (KwabaseRoma 5:8, 12; 6:23) UJehova uNkulunkulu weqiniso, wathuma iNdodana yakhe, uJesu, ukuthi ibuye emhlabeni izosifela njalo ibhadale lokho okwalahlwa ngu-Adamu.—Bala uJohane 3:16.
UJesu wafa ukuze abantu bathole ukuphila okungapheliyo. Ubona angani kuzabe kunjani emhlabeni nxa sesilempilo engapheliyo?
Sithethelelwa izono njalo sizathola ukuphila okungapheliyo ngenxa yokuthi uJesu wasifela. IBhayibhili lenza sikubone ngelihlo lengqondo ukuthi impilo izabe injani emhlabeni kungaselamikhuhlane, ukuguga kanye lokufa.—Bala u-Isaya 25:8; 33:24 loSambulo 21:4, 5.
Kumele sikukhumbule njani ukufa kukaJesu?
Ngobusuku bokucina esezakufa, uJesu watshela abalandeli bakhe ukuthi bakhumbule ukufa kwakhe ngombuthano olula nje. Ukunanza ukufa kukaJesu ngendlela le umnyaka ngamunye kwenza sicabangisise ngokuthi uJesu loJehova babathanda kangakanani abantu.—Bala uLukha 22:19, 20 lo-1 Johane 4:9, 10.
Lonyaka, iSikhumbuzo sokufa kukaJesu sizabe simhlaka-14 April ngoMvulo ilanga selitshonile. Uyanxuswa ukuthi unanze ilanga leli ndawonye laboFakazi bakaJehova duze lalapho ohlala khona.—Bala uRoma 1:11, 12.