UMbuso KaNkulunkulu Kungani Uqakathekile kuJesu?

Njengoba ubonile esihlokweni esidlulileyo, okwakuqakatheke kakhulu empilweni kaJesu ‘kwakuyikumemezela izindaba ezinhle zoMbuso’ (ULukha 8:1) Wahamba imango emide kakhulu kulo lonke elako-Israyeli ukuze afundise abantu ngoMbuso kaNkulunkulu. Inkonzo kaJesu kukhulunywa ngayo emaVangelini amane. EmaVangelini la kukhulunywa ngoMbuso izikhathi ezedlula 100. Okunengi kulezi zikhathi ezingu-100 ngokwakukhulunywa nguye uJesu. Kodwa lokhu okubhalwe emaVangelini kulutshwana kakhulu nxa sikuqathanisa lakho konke okumele ukuthi wakutsho mayelana loMbuso kaNkulunkulu esasemhlabeni.—UJohane 21:25.

Kungani uJesu wayewuqakathekisa kangaka uMbuso esasemhlabeni? Wayekwazi ukuthi ukhethwe nguNkulunkulu ukuthi kube nguye ozabusa eMbusweni lo. (U-Isaya 9:6; ULukha 22:28-30) Lanxa wayekwazi ukuthi uNkulunkulu umkhethile, kazange afune ukuthola amandla kanye lodumo oluvela ebantwini. (UMathewu 11:29; UMakho 10:17, 18) Wayewuqakathekisa kakhulu uMbuso kaNkulunkulu futhi ulokhu ewuqakathekisa lakhathesia ngoba uyakwazi ukuthi uMbuso lo uzamenzelani uYise osezulwini, kanye labalandeli bakhe abathembekileyo.

UMBUSO UZAMENZELANI UNKULUNKULU?

UJesu uyamthanda kakhulu uYise osezulwini. (IZaga 8:30; UJohane 14:31) Uyakwazi ukuthi uYise ulothando lesihawu lokuthi zonke izindlela zakhe zilungile. (UDutheronomi 32:4; U-Isaya 49:15; 1 UJohane 4:8) Yikho-ke kumele ukuthi kumzwisa ubuhlungu ukuzwa abantu belokhu befafaza amanga ngoYise. Bathi uNkulunkulu kalandaba lokuhlupheka kwabantu njalo bathi nguye ofuna bahlupheke. Lokhu ngokunye okwabangela ukuthi uJesu azimisele ukutshumayela “izindaba ezinhle ezombuso.” Wayekwazi ukuthi ngokuya kwesikhathi uMbuso lo uzasusa wonke amanga akhulunywayo mayelana loYise. (UMathewu 4:23; 6:9, 10) Uzakwenza njani lokhu?

UJehova uzasebenzisa uMbuso ukuze alethe untshintsho oluzanceda abantu. “Uzazesula zonke izinyembezi” emehlweni abantu abathembekileyo. UJehova uzasusa konke okubangela ukuthi abantu bakhale ezimathonsi, njalo uzakuba leqiniso lokuthi “akusayikuba khona futhi ukufa loba ukulila loba ukukhala loba ubuhlungu.” (ISambulo 21:3, 4) UNkulunkulu uzasebenzisa uMbuso lo ukuze asuse konke ukuhlupheka kwabantu.b

Yikho asimangali ukuthi kungani uJesu wayezimisele kangaka ukutshela abantu mayelana loMbuso. Wayekwazi ukuthi uMbuso lo uzakuveza mgceke ukuthi uYise ulamandla amakhulu lokuthi ulesihawu esikhulu. (UJakhobe 5:11) Kanti njalo wayekwazi lokuthi uMbuso uzanceda abantu abenza intando kaNkulunkulu.

UMBUSO UZABENZELANI ABANTU ABENZA INTANDO KANKULUNKULU?

UJesu engakabuyi emhlabeni wayehlala loYise ezulwini. UYise wamsebenzisa lapho edala zonke izinto. Izinto lezi zigoqela amazulu amangalisayo agcwele izinkanyezi lemithala, lomhlaba wethu omuhle kanye lezinyamazana ezigcwele kuwo. (KwabaseKholose 1:15, 16) Kukho konke lokhu, uJesu ayekuthanda kakhulu lusapho lwabantu ngoba iBhayibhili lithi ‘okwakumjabulisa’ yibukhona babantu.—IZaga 8:31.

UJesu wayetshumayela ngenxa yokuthi wayebathanda kakhulu abantu. Eqalisa nje inkonzo yakhe wahle wakucacisa ukuthi ayekulande emhlabeni ‘yikuzotshumayela izindaba ezinhle’ kubayanga. (ULukha 4:18) Kodwa uJesu wayesithi esekhulume ngokunceda abantu aphinde enze okuthile okwakutshengisa ukuthi uyabathanda sibili. Ngokwesibonelo lapho abantu abalixuku bebuthene ukuze bamlalele efundisa, “wabazwela usizi ngakho wasesilisa abagulayo babo.” (UMathewu 14:14) UJesu waphinda welapha indoda eyayilomkhuhlane obuhlungu kakhulu eyayikholwa ukuthi wayezayisilisa nxa wayefuna. Lokhu wakwenza ngenxa yokuthi wayelothando, waze wakhuluma amazwi ayetshengisa ukuthi wayeyizwela sibili. Wathi: “Ngiyathanda. Hlambuluka!” (ULukha 5:12, 13) Lapho uJesu ebona umngane wakhe uMariya elilela umfowabo uLazaro owayefile, “wadabuka kakhulu emoyeni, wakhathazeka” njalo “wakhala.” (UJohane 11:32-36) ULazaro wayeselamalanga amane etshonile! Kodwa uJesu wenza isimangaliso, wamvusa kwabafileyo.—UJohane 11:38-44.

UJesu wayekwazi sibili ukuthi abantu ayebasilisa babezaphinda bagule lokuthi ayebavusa kwabafileyo babezaphinda bafe. Kodwa wayekwazi lokuthi uMbuso kaNkulunkulu uzazisusa zonke izinhlupho lezo zingasaphindi zibe khona futhi. Yikho lanxa wenza izimangaliso, waphinda wasebenza gadalala lasekutshumayeleni “izindaba ezinhle ezombuso.” (UMathewu 9:35) Masinyane nje uMbuso kaNkulunkulu uzakwenza okunengi kakhulu emhlabeni wonke ukwedlula izimangaliso ezenziwa nguJesu. Ake sikhangele okunye esikuthenjiswayo okuseBhayibhilini.

• 

  Akusoze kuphinde kube lokugula.

  “Lapho-ke amehlo eziphofu azavuleka, lezindlebe zezacuthe zivuleke. Lapho-ke abaqhulayo bazakweqa njengempala, izimungulu zihlabele ngokuthokoza.” Kanti njalo “akulamuntu . . . ozakuthi, ‘Mina ngiyagula.’ ”—U-Isaya 33:24; 35:5, 6.

• 

  Akusayikubakhona futhi ukufa.

  “Abalungileyo bazazuza ilifa lelizwe bahlale kulo lanini.”—IHubo 37:29.

  “Uzakuginya kokuphela ukufa. UJehova Wobukhosi uzakwesula izinyembezi ebusweni babantu bonke.”—U-Isaya 25:8.

• Abafileyo bazavuswa baphinde baphile.

  ‘Bonke abasemathuneni abo bazalizwa ilizwi layo baphume.’—UJohane 5:28, 29.

  “Kuzakuba lokuvuka kwabafileyo.”—ImiSebenzi 24:15.

• 

  Ngeke kube lokuswelakala kwemisebenzi kumbe indawo yokuhlala.

  “Bazakwakha izindlu bahlale kuzo; bazahlanyela izivini badle izithelo zazo. Kabasayikwakha izindlu zihlalwe ngabanye kumbe bahlanyele, kudle abanye. . .. Abakhethiweyo bami bazakholisa umsebenzi wezandla zabo okwesikhathi eside.”—U-Isaya 65:21, 22.

• 

  Ngeke kube lezimpi.

  “Uyathulisa izimpi kuze kube semikhawulweni yomhlaba.”—IHubo 46:9.

  “Isizwe asiyikuhlomela isizwe ngezinkemba loba sifundele ukulwa izimpi futhi.”—U-Isaya 2:4.

• 

  Ukudla kuzakuba yithaphutshiye.

  “Lapho-ke umhlaba uzathela isivuno, uNkulunkulu, uNkulunkulu wethu, uzasibusisa.”—IHubo 67:6.

  “Akuthi amabele ande elizweni lonke; azunguze eziqongweni zamaqaqa.”—IHubo 72:16.

• Ubuyanga buzaphela du!

  “Abaswelayo kabayikukhohlakala.”—IHubo 9:18.

  “Uzabakhulula abaswelayo abakhalayo kuye, abahluphekayo abangelamsizi. Uzabahawukela ababuthakathaka labaswelayo asindise abaswelayo.”—IHubo 72:12, 13.

Akuthandabuzwa ukuthi ukubala ngezinto lezi ezinhle esizazenzelwa nguMbuso kaNkulunkulu kukwenze wabona ukuthi kungani uJesu ewuqakathekisa kangaka uMbuso. Esasemhlabeni wayezimisele ukukhuluma ngoMbuso kaNkulunkulu ebantwini bonke ababefisa ukuzwa ngawo ngoba wayekwazi ukuthi uMbuso lo yiwo ozaqeda zonke izinhlupho ezisithwalise nzima lamuhla.

Uzwa njani ngalokho iBhayibhili elithembisa ukuthi uMbuso uzasenzela khona? Nxa kuyikuthi kuyakuthokozisa, kuyini ongakwenza ukuze ufunde okunengi ngawo? Kanti njalo ungenzani ukuze lawe uthole izibusiso lezi? Bala isihloko esilandelayo ukuze uthole izimpendulo.